Tepet

◼ Nayari kasin ireport na duaran ateng so oras ya inusar da ed regular a pampamilyan panagaral da?

Anggaman saray kaamaan so manunan responsable ed panamabaleg ed ananak da diad “kadudusa tan panamilin na Katawan,” say ama tan ina so walaan na betang ed panangipasal ed ananak da. (Efe. 6:4) Papasesegen na Biblia iray ananak: “Ana’ko, denglen mo so panangibangat na amam, tan agmo ikaindan so pamatunong nen inam.” (Uli. 1:8) Say sakey ya importantin aspekto na panangipasal na atateng et say pampamilyan panagaral na Biblia.

Diad apalabas, say mangireport labat ed oras et samay ateng a mangikokondukta ed pampamilyan panagaral ed agbautismadon ananak, anggaman sikaran duay akibiang ed panagaral. Balet, saya so inuman la. No legay panagaral na pamilya et sikaran duan ateng so naniba ed panagbangat ed ananak da, sirin nayari dan dua ya ireport so ag-onsulok ed sakey oras ed sakey simba. Siempre, kaslakan a saray atateng so manguusar na aliwa labat a sakey oras ed sakey simba ed pangipapasal ed ananak da. Say pangipasal ed ananak et mangilalanor ed mantultuloy a sagpot ed biang na duaran ateng. (Deu. 6:6-9) Balet, say maslak ya oras ya irereport a binulan ed lawak na serbisyo et say nagagawaan ed lawak. Kanian, ag-onsulok ed sakey oras ed kada simba so ibilang, anggano onsulok na sakey oras so panagaral, ya aliwa labat a maminsan ed sakey simba ya ikokondukta, odino aliwan bansag so panagaral ya ikokondukta ed kada anak. Sakey labat ya ateng so mangireport na pamilyan panagaral na Biblia tan sakey labat a panagpawil kada simba.