No Panon ya Ipapatnag na Saray Manangasikaso ed Panagaral na Kongregasyon ed Libro so Personal ya Interes
1 Denisinyo so Panagaral na Kongregasyon ed Libro pian “posibli a naikdan na personal ya atension so espiritual ya ibubulaslas na kada indibidual. . . . Dia so pakapatnagan ed maaron-kaabigan nen Jehova tan say matamoy a panangasikaso to ed totoo to.” (om p. 75; Isa. 40:11) Say manangasikaso ed panagaral ed libro so walaan na importantin betang ed panangiter na ontan a personal ya atension.
2 Diad Panagaral ed Libro: Inggagala a mansiansian melag iray grupo na panagaral ed libro pian nakabat a maong na manangasikaso ed panagaral ed libro iray membro ed grupo to. (Uli. 27:23) Kaslakan et walaray pankanawnawa a manlilimog sakbay odino kayari na panagaral kada simba. Diad loob na sakey bulan et nayarian ton napitongtongan so amin lawarin membro ed grupo. Ontulong iya ed saray membro ed panagaral ed libro pian agnababaingan ya onasingger ed sikato sano nipapaarap ira ed saray subok odino mankaukolan ira na panamaseseg.—Isa. 32:2.
3 Panggugunaetan na manangasikaso ed panagaral ed libro a pasesegen so amin ed grupo a mankomento legan na panagaral. Gagawaen to iya diad pangikokondukta na panagaral ed mapangasi tan matamoy a paraan. (1 Tes. 2:7, 8) Pambabanikelan ton makapibiang so amin ed diskusyon, pati saray ugugaw. No nababaingan so arum a mankomento, nayarin sikatoy personal ya ontulong diad pangi-asain lan masakbay ed sikara a mambasa ed teksto odino mankomento ed partikular a parapo. Odino nayarin ibangat to iran mankomento ed dilin salita ra.
4 No say katulongan na manangasikaso ed panagaral ed libro et sakey a ministeryal a lingkor, say manangasikaso so mangiyarunsa ed sikato ya ikondukta so panagaral a maminsan ed kada duay bulan. Diad ontan et naobserbaan na manangasikaso so katulongan to tan mangiter na makatulong iran suhestion. Agaylan abig ya uksoyan pian natulongan iray agagin lalaki ya onaligwas ed dunong da ed panagbangat!—Tito 1:9.
5 Diad Lawak na Ministeryo: Sakey ed saray manunan responsabilidad na manangasikaso ed panagaral ed libro et say panangidaulo ed panag-ebanghelyo. (Num. 27:16, 17) Sikatoy manggagawa na praktikal iran uksoyan parad pampulong na grupo tan pampepelengan ton tulongan so amin ed grupo a makapanggayaga diad ministeryo ra. (Efe. 4:11, 12) Pian nagawaan iya, gagawaen ton kalat a nakaiba so kada membro ed grupo diad panagpulong. Sikato met so mikikimey ed manangasikaso na serbisyo a niyarunsa iramay malabay ya onaligwas ed arum ya aspekto na ministeryo ra a tulongan na mas eksperiensyadon manangipalapag.
6 Bilang Maaron Managpastol: Say manangasikaso ed panagaral ed libro so interesado ed saraman so matalag a makapibiang ed panagpulong lapud saray kipapasen da. Seseguroen to a saramay nalilimitaan lapud maedad la odino lapud agmakaalis ed abung tan saramay temporaryon alimitaan lapud graben sakit so makapikabat ed probisyon a naabuloyan iran mangireport na oras ed lawak na serbisyo a tunggal 15-minuto odino onsulok ni no ag-ira makapangireport na sakey oras diad sakey bulan. (Determinaen na Congregation Service Committee no sioparay onkualipika ed sayan probisyon.) Sikatoy walaan met na interes ed saramay kabiangan ed grupo a nayarin inaktibo, a manggugunaet ya ontulong ed sikaran makapankimey lamet a kaibay kongregasyon.—Luc. 15:4-7.
7 Agaylan pisasalamat tayo lapud maaron interes ya ipapatnag na saray manangasikaso ed panagaral ed libro! Say personal ya atension ya iiter da so ontutulong pian “amin so makarateng ed pankakasakey na pananisia . . . , dia ed sukat na kinaatagey na inkapno nen Kristo.”—Efe. 4:13.