Tulongan Moy Manangasikaso na Panagaral na Kongregasyon ed Libro
1 Balang sakey ed sikatayo so makakagamor na dakel a gunggona diad Panagaral na Kongregasyon ed Libro. Nen imbeneg a bulan et siningbat tayo no panon a susumpalen na manangasikaso na Panagaral na Kongregasyon ed Libro so betang to. Balet anto so nitulong tayo ed sikato ta pian nagunggonaan itayo tan saray arum?
2 Sinimban Onatendi: Lapud pansiasiansiaen a melag iray grupo na panagaral, importante so iyatendim. Gawam a kalat so sinimban iyatendi. Makatulong ka met diad isabi ed suston oras, ta saya so mangiyabuloy ed manangasikaso pian nigapo toy panagaral diad mauksoy a paraan.—1 Cor. 14:40.
3 Makapabiskeg Iran Komento: Say sananey a paraan a makatulong ka et diad pamparaan a maong tan diad pankomento na makapabiskeg. Kaslakan et sankaabigan iray komento a manutukoy ed sakey labat a punto, tan saya so managyat met ed arum a mankomento. Paliisan so pangomento ed interon parapo. No say punto ed materyal et anenyeg ed liknaan mo, palaknaben so sisingbaten diad panginabang ed ideyam panamegley na pankomentom.—1 Ped. 4:10.
4 No walaan ka na pribilehyon manbasa na saray parapo parad pankaabigan na grupo, panseetan mon sumpalen itan ya asainmin. Say maong a panagbasa so ontulong ed maaligwas a panagaral.—1 Tim. 4:13.
5 Panagtasi Bilang Grupo: Saray miting parad lawak na serbisyo so gagawaen diad dakel a lugar a panaaralan na libro, tan say panuportam ed sarayan uksoyan so ontulong ed manangasikaso diad pangidadaulo to ed panagpulong a kimey. Moriaen irayan uksoyan bilang pankanawnawa pian lalon napaapit ed saray agagim tan pian napaseseg ira.
6 Saray Report ed Lawak na Serbisyo: Say pangiter a tampol ed report mo ed lawak a serbisyo diad sampot na kada bulan so sananey nin paraan pian natulongan so manangasikaso. Nayarim ya iter so report mo ed sikato odino ipelag itan ed kahon diad Kingdom Hall a nigana parad saray report ed serbisyo. Nayarin usaren na sekretaryo so kahon pian tugyopen iray report ed lawak na serbisyo a kinolekta na saray manangasikaso na panagaral ed libro.
7 Naapresya so pitutulongan mo ed manangasikaso na Panagaral na Kongregasyon ed Libro. Nagkalalo ed amin, napaseguroan ka a si Jehova so ‘miulop ed espiritum.’—Fil. 4:23.