Kasin Gagawaen Moy Betang Mo Pian Natugyop so Suston Report?
1 Dakel a salaysay ed Biblia so mangilalaktip ed saray espesipikon bilang, a makatulong ed kipasabi na malinew a deskripsion ed agawa. Alimbawa, si Gideon a walaan labat na 300 a sundalo so anaeg ed kampo na Midian. (Uko. 7:7) Pinatey na anghel nen Jehova so 185,000 a sundalo na Asirya. (2 Ara. 19:35) Diad Pentecostes 33 K.P. et manga 3,000 so abautismoan, tan ag-abayag kayari na satan et dinmakel iray mananisia ed ngalngalin 5,000. (Gawa 2:41; 4:4) Mabitar ed sarayan salaysay a nansagpot a tuloy iray lingkor na Dios nensaman pian natugyop so kompleto tan suston rekord.
2 Igaganggan itayo na organisasyon nen Jehova natan ya ireport so kimey tayo ed lawak na serbisyo kada bulan. Say matoor a pikokoopera tayo ed sayan uksoyan so ontulong ed epektibon pakaasikaso ed kimey a panagpulong. Nayarin iparungtal na saray report a mankaukolan na imano so sakey ya aspekto na ministeryo odino nakaukolan so dakel nin komikimey ed sakey a parte na lawak. Diad kongregasyon et nabidbiran na mamatakken iramay walaay potensyal a mamaaligwas ed ministeryo ra ontan met ed saramay mankaukolan na tulong panamegley na saray report ed lawak na serbisyo. Tan saray report nipaakar ed aligwas na panangipulong na Panarian so makapaseseg parad interon Kristianon impanaagi. Kasin gagawaen moy betang mo pian makatulong ed katugyop na suston report?
3 Say Dilin Responsabilidad Mo: Diad mantapos na bulan, kasin nairapan kan makanonot ed akimeyan mo diad ministeryo? No ontan, akin ya ag-irekord so kimey mo kada pibiang mo ed lawak na serbisyo? Arum so manguusar na kalendaryo odino planner. Arum so mangaawit na blankon panagsulatan na report ed lawak na serbisyo. Kada mantapos so bulan, iter a tampol so report mo ed manangasikaso na panagaral ed libro. Odino, no labay mo, nayarim ya ipelag so report mo diad kahon a parad report diad Kingdom Hall. No alingwanan mon inter so report mo, tampol lan asinggeran so manangasikaso yo na panagaral ed libro imbes ya alagden a sikatoy onasingger ed sika. Say inkamapeleng mon mangireport ed kimey mo et panangipatnag na respeto ed uksoyan nen Jehova tan maaron konsiderasyon ed saray agagin apabtangan a mangolekta tan manugyop ed saray report.—Luc. 16:10.
4 Betang na Manangasikaso na Panagaral ed Libro: Bilang alerto tan maimanon pastol, say manangasikaso na panagaral ed libro so interesado ed kimey na grupo diad interon bulan. (Uli. 27:23) Amta to no kasin regular, makabaliksan, tan magayagan mibibiang so kada manangipalapag tan aliston mangiter na tulong no walay ag-akapibiang ed interon bulan. Mabetbet a nakaukolan so panamaseseg, praktikal a suhestion, odino pangitagar a miiba ed sikato diad lawak na serbisyo.
5 Diad mantapos na bulan, seguroen na manangasikaso na panagaral ed libro a sinumpal na amin ed grupo so responsabilidad dan mangireport ed kimey da pian nipawit na sekretaryo so suston report na kongregasyon diad sangan opisina ya ag-onlampas ed petsa sais na ontumbok a bulan. Legan a manasingger lay pantapos na bulan, makatulong no panonotan to so grupo tan mangitarya la na saray panagsulatan na report diad pasen a panaaralan ed libro. No walaray mililingwan ed panangireport na kimey da, nayarian toy mangiter na manepeg iran panonot tan panamaseseg ed sikara.
6 Makatulong so tampol a pangiter ed saray report tayo ed lawak na serbisyo pian natugyop so report a suston mangipapatnag ed agawaan tayo diad lawak. Kasin gawaen moy betang mo diad tampol a pangireport ed kimey mo kada bulan?