Kasin Regular Kayon Manangiyabawag na Panarian?
1 Aliketan itayon amin sanen anampot so serbisyon taon nen Agosto 1999 diad sanga na Pilipinas a walaay 132,496 a manangipalapag. Balet say promedyon bilang na manangipalapag ed satan a taon et 128,106. Mapatnag ya arum ed saray manangipalapag tayo et mairap day magmaliw a regular a manangiyabawag na Panarian. Diad tua, apatnagan ed saray analysis report manlapud saray kongregasyon a masulok a 19,000 ed saray aktibon manangipalapag so anggapoy report ed pibibiang diad ministeryo a kada bulan. Panisiaan min say onggendan a panamaseseg so makatulong pian naremedyoan so situasyon.
2 Pablien so Pribilihyo: Nepeg a walaan itayo na aralem a panamabli’d pribilihyo tayo ya inabang ed arum so maong a balita na Panarian. Sayan kimey so mamaliket ed puso nen Jehova tan ontulong ed saray matuan-impanpuso a naamtaan day dalan ya ompugta ed bilay. (Uli. 27:11; 1 Tim. 4:16) Say regular a panagpulong so mamalaknab na eksperiensia tayo ed ministeryo tan manresulta ed liknaan na panggayaga tan walay agawaan.
3 Ireport so Kimey ed Lawak: Naliliwatan na arum ya akibiang ed lawak na kimeyan ya ireport ed dugan panaon so kimey da. Agtayo komon ipasen a say sagpot tayo et agla kaukolan ya ireport. (Ikompara so Marcos 12:41-44.) Talagan kaukolan tayon ireport so agawaan tayo! Say pakawalaan na organisadon tutumboken diad abung, singa say kalendaryo a pansulatan na oras ya inusar diad ministeryo so onkanan naynay a panonot pian tampol a gawaey suston report diad sampot na kada bulan.
4 Iter so Nakaukolan a Tulong: Nayarin napaaligwas iray uksoyan ed lokal parad panulong ed saramay mankaukolay tulong pian tuloytuloy iran makapibiang ed ministeryo. Say sekretaryo ed kongregasyon tan saray konduktor na panagaral na libro so nepeg a mangiyuksoy ed pigaran eksperiensiadon manangipalapag pian ontulong. No walay ananak yo odino iyaaralan na Biblia ya agbautismadon manangipalapag, ipasal iran ireport day agawaan da ed kada bulan.
5 Nonoten pay istorya ed bilay a, “Pisalsalamatay Andukey a Bilay Diad Serbisyo’d si Jehova,” diad Oktubre 1, 1997, a Panag-Bantayan. Si Sister Ottilie Mydland a taga-Norway so nagmaliw a regular a manangipalapag na maong a balita sakbay na inkabautismoan to nen 1921. Linmabas so pitomplo tan anem a taon, diad edad a 99, oniay inkuanto: “Maliket ak ta siansia nin posibli parad siak so magmaliw a regular a manangipalapag.” Agaylan abig ya awawey ya aligen na amin a lingkor nen Jehova!