Makaaral ed Saray Eksperiensyadon Manangipalapag
Talagan papablien tayo ray agagid kongregasyon ya dakel lay eksperiensya da. Say arum et pigapigay taon lan matoor ya manlilingkor ed si Jehova. Wala ra met so mas agano ni, balet marundunong la rad ministeryo. Anengneng na sarayan manangipalapag no panon ya idadaulo nen Jesus legan na kaunoran iran agew so Kristianon kongregasyon diad impamalaknab tod panagpulong tan panagbangat ya kimey. (Mat. 28:19, 20) Lapud pibibiang dad ministeryo, naikdan iray “pakayari a mas mabiskeg nen say pakayari na too” pian nasarag da ray sarili dan problema tan subok. (2 Cor. 4:7) Dakel so naaralan tayod sarayan eksperiensyadon manangipalapag. No walay pankanawnawa, labalabay dan ibangat iray naaaralan da. (Sal. 71:18) Manggawa tayo siri’ paraan pian makaaral ed sikara. Panon tayon nagawaan itan?
Diad Ministeryo. Kaukolan ya ipasal iray manangipalapag ya balo ni o daiset ni eksperiensya pian magmaliw iran epektibo ed ministeryo. Makaaral iran maong no obserbaan da ray eksperiensyadon manangipalapag ed ministeryo. (Nengnengen so artikulo ed Pebrero 15, 2015 ya Panag-bantayan, “Pansiansiaen so Seseg Mod Ministeryo,” diad komatlon parapo ed subtitulon “Tulongan Iray Balon Publisher.”) Panon kayon atulongan diad impiulop yod saraman ya agagi ed ministeryo?
Nayarim kasin imbitaan so sakey ya eksperiensyadon manangipalapag ya miulop ed sika diad ministeryo? No matatken la odino makapuy, ompan no maminsan et nayarim ya awiten ed abung da so iyaaralan mo. Kayari yon angiyaral, tepetan so manangipalapag no anto ray naobserbaan to tan suhestion tod sika.
Milimog ed Sikara: Miulop ed saray eksperiensyadon manangipalapag pian mas nakabat mo ra. Imbitaan so sakey ed sikara diad panagdayew na pamilya yo tan interbyu yo. No agto la nayariay onlad abung yo, ompan sarag ton diad abung da gawaen so panagdayew na pamilya yo. Tepetan no panon ton nalmoy katuaan. Anto ray bendisyon ya naawat to? Anto ray naobserbaan ton inyaligwas ed kongregasyon yo? Anto ray panliliketan tod panlilingkor ed si Jehova?
Magmaliw ya makonsidera tan balanse ed saray iilaloan tayod sikara. Singa sikatayo met, saray abayag lan manangipalapag et nandurumay abilidad dad ministeryo. (Roma 12:6-8) Say arum et maedad la tan limitado lay panaon dan pilimog ed sikatayo. Balet dakel so naaralan tayod sikara lapud saray eksperiensya da ed matoor ya panlilingkor ed si Jehova.