No Panon a Nipasal a Manpulong Iray Balo Ni

1. Antoy aliknam sanen pirprimerom so manpulong?

¹ Nanonotan mo ni imay pirprimerom ya impanpulong diad kabkaabungan? Nayarin mannerbiyos kan maong ed saman. Seguradon pisalsalamatan moy tulong na kaibam, ompan samay mangiyaaral ed sikay Biblia odino arum nin manangipalapag. Natan ta dakel lay eksperiensyam ed ministeryo, sarag mo met lan ipasal a manpulong iray balobalo ni.

2. Antoray nepeg a naaralan na saray balon manangipalapag?

² Kaukolan a naaralan na saray balon manangipalapag iray paraan pian nigapoy tongtongan, naibasay Biblia ed unabung, napawil iray interesado, tan makapangigapo tan mangikonduktay panangiyaral na Biblia. Nepeg da met a naaralan so pampulong ed nanduruman paraan, a singa say panagpulong ed lansangan tan ed lugar na negosyo. Natulongan mo iran onaligwas ed sarayan aspekto panamegley na ehemplom tan saray suhestion mo.

3. Panon tayon natulongan so arum panamegley na ehemplo tayo?

³ Manbangat Panamegley na Ehemplom: Impanengneng nen Jesus ed saray papatumbok to no panon so pampulong. (Luc. 8:1; 1 Ped. 2:21) Sano akipaknaan kan miulop ed balobalo nin manangipalapag diad ministeryo, mangiparaan na simplin presentasyon a sarag ton aligen, a singa saramay naromog ed publikasyon tayo. Insan, maabig no sika ni mansalita ed unona odino anggad komaduan abung pian naimatonan toy presentasyon mo. Kada kayari pitongtong mo’d unabung, tepetan mo no antoray naobserbaan to ed impitongtong mo. Ditan to namoria so kaimportantian na piulop ed arum diad ministeryo tan sirin et mas mainomay ton awaten so suhestion mo’d sikato kayari pitongtong to’d unabung.

4. Panon tayon natulongan so balon manangipalapag kayari tayon naobserbaan so presentasyon to?

⁴ Mangiter na Saray Suhestion: Inikdan nen Jesus iray disipulo to na instruksion no panoy pampulong da. (Mat. 10:5-14) Sarag mo met a tulongan so balon manangipalapag ed ontan a paraan. Dengel kan maong no betang to lay mansalita. Insan kaalis yo’d samay abung, mangiter na espisipiko tan sinseron komendasyon, anggano walaray naobserbaan mon aspekto a papaaligwasen to ni. Antis ka balet a mangiter na suhestion, nayarin obserbaan mo ni no kasin inmaligwas la ed saman ya aspekto diad onsublay a pitongtong to. Ompan mannerbiyos met labat. Tandaan mo met ya aliwan pareparehoy abilidad na saray manangipalapag, tan nandurumay paraan na balang sakey.​—1 Cor. 12:4-7.

5. Antoy nayari tayon ibaga sano labay tayoy mangiter na suhestion?

⁵ No maminsan et onkerew ed sika na suhestion so sakey a manangipalapag. No bilang ta andi, sika lay manggaway paraan pian natulongan mo. Panon mon gawaen iya diad mataktikan paraan? Oniay itetepet na arum ya eksperiensyadon manangipalapag: “Sarag toy mangiter na suhestion?” odino, “Antoy nibagam ed samay impitongtong mo ey?” Sarag mo met ya ibagan, “Nen balobalo ak met ni, nairapan ak ed . . . balet ta akatulong ed siak so . . . ” Maabig a no maminsan et saniba yon nengnengey ibabaga na libron Reasoning. Pian agmet balet nabuntonan na impormasyon, mangiter na suhestion ed sakey labat ya aspekto na presentasyon to.

6. No nipaakar ed ministeryo, panon a ‘pataremen na balatyang so kapara ton balatyang’?

⁶ ‘Pataremen Na Balatyang so Balatyang’: Si Timoteo ya eksperiensyadon ebanghelisador et pinaseseg nen Pablo a mantultuloy a manbangat tan onaligwas. (1 Tim. 4:13, 15) Anggano pigay taon ka lan manpupulong, kaukolan ya itultuloy mo nin paaligwasen so dunong mo ed satan. Makaaral ka ed saramay nakakaulop mo ed ministeryo, anggan ed saramay agni tanton eksperiensyado. Tan komon et lawas kan akaparaan ya maaron ontulong ed arum, lalo la ed saray balo ni pian magmaliw iran marundunong a ministro na maong a balita.​—Probirbio 27:17, Maung a Balita.