Akapangigapo Ka La Kasi Panangiyaral na Biblia Diad Unonan Imbisitam?

Sano iyoopresi tayoy panangiyaral na Biblia, walaray mangibagan ag-ira interesado odino manaaral met la ra kunoy Biblia diad simbaan da. Agda amtan balibali tan makapalikliket so iyoopresi tayon panangiyaral ta nayarin isipen dan pareho met lanlamang itan ed impanaral day Biblia diad arum a relihyon. Kanian, imbes ya iyopresim ni labat so panangiyaral, akin ta no idemostram la itan a tampol diad unonan ibisitam, anggan pigaran minuto labat? Oniay alimbawa to ‘tan: Agmo labat ibabaga’d sikara a maong kan manluto, insan ka ni ompawil pian iyawitan mo ray lutom. Pataway mo la ran tampol! Nia ay so sakey a presentasyon a base ed suhestion a walad pahina 6 na Enero 2006 na Ministeryo Tayo ed Panarian, a nagawaan diad pigara labat a minuto.

“Parad sika, onsabi ni kasi panaon ya nasumpal irayan salita? [Basaen so Isaias 33:24 tan abuloyan ya onebat.] Walay makapainteres ya ipanengneng ko’d sika nipaakar ed satan.” Iter ed unabung so libron Ibabangat na Biblia, tan ibukay ed pahina 36, parapo 22. Basaen so tepet a walad leksab na pahina tan kerewen ed sikato ya anapen toy ebat legan mon babasaen so parapo. Insan basam lamet so tepet, tan dengel ka ed ebat to. Manbasa kayoy sakey nin teksto. Mangitilak kay tepet ya ebatan ed ontumbok ya ibisitam, tan iyeskedyul so espisipikon agew ya ipawil mo. Akapangigapo ka lay panangiyaral na Biblia!