No Panon a Napagmaliw ya Iyaaralan na Biblia Iray Napapalimaan na Magasin
1 Legan na Abril tan Mayo, iyopresi tayo so Say Panag-Bantayan tan Awake! tekep na gagalan makapangigapo na saray panangiyaral na Biblia ed libron Ibabangat na Biblia sano ompawil itayo. Walad leksab iray pigaran makatulong a suhestion. Tandaan a saraya so nepeg ya itukoy ed teritorya yo tan ibalikas ed natural a paraan. Usar yo labat iray arum nin paraan ya epektibo ed sikayo.
2 Usaren so Manangigapo Iran Pahina: Say sakey a napampilian et say pangibaga na singa onia sano ompawil kayo: “Saray magasin ya intilak ko ed sikayo so mangipapaimano ed Biblia. Imanoen no akin ya importantin tuloy so pambasa ed Biblia.” Basaen so Isaias 48:17, 18; Juan 17:3; odino sananey a matukoy a teksto. Insan kayarin imparungtal so libron Ibabangat na Biblia tan aderewan na sakey a kopya so unabung, nayari yon ibaga iray onggendan:
◼ “Iikdan itayo na Biblia na peteg ya ilalo parad arapen.” Ipanengneng ed unabung iray pahina 4-5 tan itepet, “Dinan ed sarayan sipan so labay yo lan nagawa?” Iparungtal ed unabung so kapitulo a manisingbat ed Makasulatan a sipan a pinili to, tan no onabuloy et pantongtongan a magano so sakey odino duaran parapo.
◼ Odino nayarin ibaga yo, “Eebatan na Biblia so sankaimportantian iran tepet ed bilay.” Ipaimano ed unabung so pahina 6, tan tepetan no kasin naumameng to met la so anggan dinan ed saray tepet diad leksab na pahina. Ibukay ed kapitulo a pakaromogan na ebat, tan pantongtongan a magano so sakey odino duaran parapo.
◼ Odino nayarin ipabitar yo so pigaran titulo a lugan na libro tan itepet no dinan ed saratan so makapainteres ed sikato. Ibukay ed satan a kapitulo, tan idemostran magano so panagaral na Biblia.
3 Mangitilak na Tepet Diad Primeron Impakapitongtong: Say sananey nin pampilian et say pangiyuksoy lan unona ed ibisita lamet diad primeron impakapitongtong. Sano inawat na unabung iray magasin, mangitepet na sakey tan isipan ya ebatan itan ed ontumbok a bisita yo. Panggunaetan ya iyuksoy so ipawil, tan seguroen a tooren itan ya inyuksoy yo. (Mat. 5:37) Sano ompawil kayo, itepet lamet ed unabung imay tepet yo, tan basaen tan singbaten a magano so sakey odino duaran espisipikon parapo ed libron Ibabangat na Biblia a mangebat ed tepet. Derewan na sakey a kopya ta pian nitumbok to. Niraya so pigaran alimbawa.
◼ No say nipalima yon magasin et manisingbat ed onloloor iran kipapasen na mundo, onia so nayari yon ibaga: “Diad ontumbok et pantongtongan tayo so ebat na Biblia ed tepet ya, Antoran pananguman so gawaen na Dios ed dalin?” Usaren so pahina 4-5 sano ompawil kayo. Odino nayari yon itepet so onia, “Kasin linawa na Dios iray nagagawan trahedya?” Diad ontumbok ya ibisita, ipanengneng ed unabung iray parapo 7-8 ed kapitulo 1.
◼ No say nipalima yon magasin et nipaakar ed pamilya, antis kayon onalis et nayari yon itepet so onia: “Anto so nayarin gawaen na kada membro na pamilya pian mas maliket so kabibilay na pamilya?” Sano ompawil kayo, pantongtongan so parapo 4 na kapitulo 14.
◼ No say magasin ya impalima yo et nipaakar ed inkanapanmatalkan na Biblia, nayari yon itepet so onia parad ontumbok a pantongtong yo: “Kasin susto so Biblia unong ed siensia?” Diad ipawil yo, pantongtongan so parapo 8 ed kapitulo 2.
4 Sakbay a manpatanir, mamalesa na sananey a tepet pian ebatan ed ontumbok ya ibisita. Sano niletneg la so regular a panagaral, danayen a singbaten so libro. Panon to no ag-inawat na unabung so libron Ibabangat na Biblia? Siansian nayari yon ituloy ya iyawitan na saray magasin tan isingbat iray Makasulatan a punto ed sikato. Legan yon babayuboan so interes to, nasabi panaon et nayarin awaten to met la so panagaral na Biblia.
5 Binilin itayo nen Jesus a ‘manggawa na babangatan.’ (Mat. 28:19, 20) Kanian, say manunan kalat sano mangitilak itayo na saray magasin et pian ibangat so katuaan ed saray matuan impanpuso. Legan na Abril tan Mayo, panggunaetan so pangigapo na panangiyaral na Biblia sano nipalima so Say Panag-Bantayan tan Awake!
[Tepetepet Parad Panagaral]
1. Anto so kalat tayo legan na Abril tan Mayo?
2. Panon tayon nausar iray manangigapon pahina ed libron Ibabangat na Biblia pian nigapo so panangiyaral na Biblia?
3. Panon itayon makapangigapo na panangiyaral na Biblia sano nipalima iray magasin a manisingbat ed (a) onloloor iran kipapasen na mundo? (b) pamilya? (c) inkanapanmatalkan na Biblia?
4. Anto so nepeg tayon gawaen no say unabung et ag-angawat ed libron Ibabangat na Biblia?
5. Akin a nepeg tayon panggunaetan so mas ni nen say pangitilak labat na saray magasin ed totoo?