Paaligwasen Iray Abilidad Tayod Ministeryo—Ipanengneng no Panon so Panaral na Biblia ya Usaren so Libron Ibabangat na Biblia

No Akin ya Importante: Dakel so totoon agda natatalosan no ibabaga tayon walay iyoopresi tayon libren panagaral na Biblia. Ompan say amta ra et kaukolan day milad sakey a grupo na saray manaaral. Kanian imbes ya iyopresi labat so panagaral, agta mas maabig no ipanengneng no panon so panaral? Diad pigaran minuto labat, anggan wala ka labat ed puerta, et sarag mon ipanengneng ed too ya mainomay tan balibali so panaral na Biblia.

No Panon Iyan Nagawaan:

Kayarin mikabat, tepetan so unabung no kasin interesado ed nagawad arapen.
Ibaga ya dakel a totoo so interesado met ed arapen, insan ipanengneng so karga na libron Ibabangat na Biblia ed pahina 2. Ibaga ya main-inomay ya natalosan so leksion ed sayan libro ya mangipapaliwawa ed ibabangat na Biblia nipaakar ed arapen tan arum ni ran topic, insan tepetan no anton kapitulo so labay ton naaralan.
Iderew so libro tan ibukay ed kapitulo ya pinili to. Ibaga ya saray tepet ed gapo na kapitulo et naebatan ed saray parapo.
Ipabasa ed unabung so unonan parapo no labay to. Insan basaen so tepet ed satan a parapo, tan pantongtongan so ebat. Basaen tan pantongtongan so teksto ed parapo ya onsuporta ed ebat. Ipanengneng mo ya agulisan so ebat ed librom.
Konsideraen so onsublay ya parapo, balet kerewen ed unabung ya ebatan toy tepet unong ed atalosan to.
Komendaan mo, tan pantongtongan no kapigan so pangituloy ed ontumbok ya leksion.
No matukoy, ipabantay so video ed jw.org/pag ya Antoy Gagawaen Sano Manaaral na Biblia?

Gawaen Iya Legan na Sayan Bulan:

Ipikasi ed si Jehova ya bendisyonan toy sagpot mon mangigapo na panangiyaral na Biblia.—Fil. 2:13.
Salien ya ipanengneng no panoy panaral na Biblia ya usaren so libron Ibabangat na Biblia, odino ipabantay so video ya Antoy Gagawaen Sano Manaaral na Biblia? anggan maminsan labat kada manpulong.