Espisyal ya Isyu na Awake! ya Iyopresi no Nobyembre!
1 Dakel a totoo so walaay masimoon a tepetepet nipaakar ed kakanaan na Biblia. Nayarin onia iray nitetepet da: Akin et nibagan Salita na Dios itan, anta totoo so angisulat ed satan? Akin et panmatalkan ko so Biblia a mangiwanwan ed kabibilay ko? Antoray gunggona sano ipanaon tan pansagpotan kon basaen tan aralen so Biblia? Anton patalos na Biblia so nepeg kon usaren? Saratan so pigaran tepet ya inebatan na espisyal ya isyu na Awake! ed Nobyembre ya apauloan na “Can You Trust the Bible?”
2 Kaliktan tayon malaknab so kibunog na sayan espisyal ya isyu na Awake! ed teritorya tayo. No nayadyari, mibiang kayo ed panagkabkaabungan na kongregasyon yo ed amin a Sabado na Nobyembre. Ipanengneng iyan magasin ed saray kakanayon, kakaabay, katrabaho, mamaestra, kaklase, tan ed saray papawilen yo. Kapagno mansasaliw odino manbiabiahe, mangawit kayo na pigaran kopya. Saray mamatatken et pinaseseg a mangorder na kaaruman iran kopya pian magenap so suplay na kongregasyon.
3 Mangigapo na Panangiyaral na Biblia: Sano akapangipalima na onian magasin, sarag yo lan iletneg so panangiyaral na Biblia antis a manampot so tongtongan. Alimbawa, nayari yon ibaga: “No ontumbok, labay kon ipanengneng ed sikayo so ebat na Biblia ed tepet ya ‘Anto so gagala na Dios ed dalin?’” Diad ipawil yo et mangawit na libron Ibabangat na Biblia tan ipanengneng ed akan-abung so pahina 4-5, odino singbaten iray parapo 1-3 na kapitulo 3. Nia ni sakey a nayarin ibaga: “No ontumbok, labay kon pantongtongan tayo so sakey a propesiya na Biblia a nagagawa la natan.” Diad ipawil yo, ipanengneng ed akan-abung so kapitulo 9 na libro tan singbaten iray parapo 1-3. Odino nayarin onia labat lay ibaga ed akan-abung: “Dakel a totoo so mangibabagan mairap a talosan so Biblia. No ontumbok, labay kon ipanengneng ed sikayo so paraan pian mainomay yon natalosan so mismon Biblia yo.” Diad ipawil yo, iparungtal so libron Ibabangat na Biblia, tan idemostra so panagaral.
4 Diad Biblia labat so pakaromogan ed “saray masanto a Sulsulat” ya ontulong ed sikatayon magmaliw a “makabat ed kilalaban.” (2 Tim. 3:15) Kanian, amin tayo so malabay a makulikulin mibiang diad panangibunog ed sayan espisyal ya isyu na Awake! pian natulongan so totoo a naaralan day manmatalek ed Biblia!