Espisyal a Paway na Awake! ya Iyopresi no Setyembre
1 Panliliketan lawari na amin so pakarengel ed uni na saray manok tan say pakanengneng ed onseselek ya agew. Balet, agbibidbiren na dakel a totoo a saratan et pinalsa na maaron mangatatawen ya Ama. Walaan itayo na nikaduman pankanawnawa pian tasian si Jehova bilang Manamalsa diad pangibunog ed espisyal a paway na Awake! (Isa. 40:28; 43:10) Say Setyembre a paway so akasentro ed teman “Is There a Creator?” (“Wala Kasi so Manamalsa?”)
2 Diad Teritorya: No posible, iyeskedyul yo ed kada Sabado so pibiang yo ed panagkabkaabungan a ministeryo kaiba so kongregasyon. Siempre, nayarian yon iyopresi so espisyal ya isyu ed arum a panaon diad interon simba. Saray maestro odino maestra tan arum niran mantratrabaho ed lawak na edukasyon so maseguron interesado ed sayan paway. Manggawa sirin na nikaduma iran uksoyan pian bisitaen iratan a totoo diad teritorya yo.
3 No walay interesado, itilakan yo na sakey a tepet ya ebatan yo ed ontumbok ya ibisita yo. Alimbawa, nayarian yon itepet no akin ya aabuloyan na maaron Manamalsa so sobra lan paniirap. Insan diad ipawil yo, nayarin iparungtal yo so kapitulo 1 odino kapitulo 11 na libron Ibabangat na Biblia. Odino nayarin pilien yon itepet so nipaakar ed gagala na Manamalsa diad dalin, insan pantongtongan yo so kapitulo 3 sano ompawil kayo.
4 Diad Eskuelaan: No maneeskuela kayo, akin ta no regaloan yo na espisyal ya Awake! iray maestro odino maestra yo pati saray kaeskuelaan yo? Say pangitapew yo labat na sakey a kopya diad desk yo so nayarin managyat ed arum pian mantepet nipaakar ed saray sisiaen tayo. Nayarin walaray pankanawnawa yon usaren so impormasyon ed satan sano idedepensa yo so pananisia yo legan na diskusyon ed klase odino sano manpaparaan kayo na report. Pian natulongan kayo, walad sayan isyu so artikulon “Young People Ask” ya apauloan na “How Can I Defend My Belief in Creation?”
5 Si Jehova so manepeg ya igalang tan igloria lapud impamalsa to. (Apo. 4:11) Nigalang tayo so Manamalsa tayo tan natulongan tayo so arum diad maseseg a pangiyopresi ed Setyembre a paway na Awake!