No Akin a Nakaukolan Tayo so Panagaral na Kongregasyon ed Libro
1. Panon a ginmapo so uksoyan na Panagaral na Kongregasyon ed Libro?
1 Nen 1895, saray grupo na panagaral na saray Estudyante na Biblia, a tawag ed saray Tasi nen Jehova nensaman, so kabkabat a Dawn Circles for Bible Study. Saray tomo na Millennial Dawn so inusar bilang basiyan ed panagaral. Diad saginonor et tinawag irayan miting a Berean Circles for Bible Study. (Gawa 17:11) Maslak et manbabana so melag a grupo ed sakey ya ayaman diad labi a kombeniente ed sikara. Sarayan miting so gapoan na Panagaral na Kongregasyon ed Libro.
2. Panon itayon makapibiang ed pakapampapasesegan diad panagaral ed libro?
2 Panamaseseg tan Tulong: Lapud ginagalan pansiansiaen a melag iray grupo na panagaral ed libro, baleg so pankanawnawa na amin ya inmatendi ya ibesngaw so pananisia ra. Say resulta et makapanpapasesegan odino ‘makaligliwa ed balang sakey so pananisia na sananey.’—Roma 1:12.
3, 4. Panon ya ontulong ed sikatayo so uksoyan na panagaral ed libro a manumpal ed ministeryo tayo?
3 Say pangobserba ed paraan na panagbangat na manangasikaso ed panagaral na libro so ontulong ed sikatayo ya “agamilen . . . ed matunong so salita a tua.” (2 Tim. 2:15) Imanoen no panon ton idadanet iray Makasulatan a basiyan na materyal. No ontukoy ed publikasyon ya aaralen, nayarin ipabitar to iray manunan punto diad pansaran repaso, ya uusaren so Biblia lambengat. Say maabig ya ehemplo to so makatulong ed sikatayo a napaaligwas tayoy panagbangat tayo ed Kristianon ministeryo.—1 Cor. 11:1.
4 Nilikud ni’d panangikondukta na sinimban leksion, say manangasikaso na panagaral ed libro so mangidaulo ed panagpulong. Bilang kooperasyon ed manangasikaso na serbisyo, sikatoy manggawa na praktikal iran uksoyan parad lawak na kimeyan. Panggunaetan ton tulongan so amin ed grupo a manumpal ed responsabilidad da bilang Kristiano a mangipulong ed maong a balita tan manggawa na saray babangatan.—Mat. 28:19, 20; 1 Cor. 9:16.
5. Anto so nitarya a personal a tulong panamegley na panagaral ed libro?
5 Say manangasikaso na panagaral ed libro so interesado ed espiritual a pankaabigan na balang sakey ed grupo. Ipapatnag to iyan interes diad saray miting ed kongregasyon tan legan a mikikimey ed arum ed lawak na serbisyo. Aanamoten to met so pankanawnawa a mamaseseg ed espiritual sano ondadalaw ed saray ayaman na saray agagi. Amin komon so agmasuyat ya onkerew na espiritual a tulong ed manangasikaso na panagaral ed libro sano kaukolan da so tulong.—Isa. 32:1, 2.
6. (a) Panon ya apabiskeg na saray miting ed memelag iran grupo iray agagi tayo ed pigaran bansa? (b) Panon kayon agunggonaan a mismo ed uksoyan a panagaral ed libro?
6 Manpapabiskegan: Diad saray bansa ya apegetan so kimey na totoo na Dios, saray agagi so maslak a mantitipon ed memelag iran grupo. Oniay nanonotan na agin laki: “Anggaman insebel iray Kristianon aktibidad mi, sano posible et gagawaen mi so sinimban miting mi, a 10 anggad 15 so kada grupo. Diad saray miting et napapabiskeg kami ed espiritual, namparan diad panagaral mi ed Biblia tan diad panlilimog mi kayari panagaral. Pankokomparaen mi iray eksperiensya mi, tan saya so akatulong ed sikamin natebek a nampadpara so pipupuligesgesan mi.” (1 Ped. 5:9) Komon ta manpapabiskegan itayo met diad sigpot a panuporta ed uksoyan na Kongregasyon ed Panagaral na Libro.—Efe. 4:16.