No Panon a Makatulong ed Sikatayo so Uksoyan a Panagaral na Kongregasyon ed Libro
1. Panon a makatulong ed sikatayo iray limaran sinimban pantitipon?
1 Nanduruma so panangikondukta tan gagala na kada sakey ed limaran sinimban pantitipon tayo. Balet, amin na saratan so importante pian natulongan itayon “manpapagalangan . . . ed sakey tan sakey pian manaayatan itayo ed aro tan dia ed saray maabig a gawa.” (Heb. 10:24, 25) Antoray pigaran nikaduma tan makagunggonan aspekto na uksoyan a Panagaral na Kongregasyon ed Libro?
2. Antoran gunggona so nagamoran diad iyatendi ed melag a grupo na panagaral na libro?
2 Ontulong ed Iyaligwas ed Espiritual: Kaslakan et mas daiset so bilang na grupo na panagaral na libro no ikompara ed bilang na onaatendi ed arum a pantitipon na kongregasyon. Ontulong iya pian mas mainomay a napaaligwas so pankakaaro a lapuan na espiritual a tulong. (Uli. 18:24) Kasin panggugunaetan yon nakabat so amin a kagrupo yo ed panagaral na libro, nayarin diad pangiyopresi yo ed balang sakey a miulop ed sikayo diad panagpulong? Say uksoyan a panagaral na libro so ontulong met ed manangasikaso na panagaral na libro a naamtaan iray nikaduman sirkumstansya na kada sakey ed grupo to ta pian niiter so personal a panamaseseg.—Uli. 27:23.
3. Panon a makapaseseg so uksoyan a panagaral na libro diad pankomento ontan met ed iyatendi na saray iyaaralan na Biblia?
3 Kasin inimbitaan yo la iray iyaaralan yo na Biblia a mila ed sikayon onatendi ed panagaral na libro? Saray interesado a masuyat ya onatendi ed babaleg iran pantitipon so nayarin agtanto nababaingan no onatendi ed mas melag a pantitipon, nagkalalo la no diad abung. Lapud maligsan awawey na balang sakey, mas mainomay ed saray kalangweran tan ed saray balo nin mililimog a mankomento. Tan lapud say grupo et mas melag, walaan itayo na pankanawnawan mibiang tan mangidayew ed si Jehova.—Sal. 111:1.
4. Say uksoyan parad panagaral na libro so nayarin kombinienti ed antoran paraan?
4 Saray panagaral na libro so kaslakan a gagawaen diad lugar ya asingger ed saray manangipalapag diad nasasakopan na teritorya. Anggaman aliwan posibli parad amin so iyasain ed lugar a sankaasinggeran ed sikara, say iyatendi ed akaasainan a panagaral na libro so nayarin mas asingger nen say iyatendi ed arum a pantitipon na kongregasyon. Say pasen a panaaralan na libro so nayarin nausar met a pantitiponan antis ya ompaway ed lawak na kimeyan.
5. Panon itayon natulongan ed ministeryo na manangasikaso tayo ed panagaral na libro?
5 Tulong ed Ministeryo: Say manangasikaso na panagaral na libro so interesadon ontulong ed balang sakey pian nawalaan na regular, makabaliksan, tan maliket a pibibiang ed ministeryo. Kanian, panggugunaetan toy mikimey ed amin a kagrupo to, a mangiter na personal a tulong ed nanduruman aspekto na ministeryo. No naimano yon mairap so sakey ya aspekto na ministeryo, a singa say panagpawil, ipaamta yo ed manangasikaso yo na panagaral na libro. Nayarin piulopen to kayo ed sakey ya eksperiensyadon manangipalapag a kagrupo yo. Onaligwas so abilidad yo ed panangiyaral na Biblia diad pangimanon maong ed maabig iran metodo ed panagbangat na manangasikasoy panagaral na libro legan ton ikokondukta so panagaral.—1 Cor. 4:17.
6. Akin a panggunaetan tayon minabang a maong ed uksoyan a panagaral na libro?
6 Agaylan maaron uksoyan so Panagaral na Kongregasyon ed Libro! Sayan maaron uksoyan nen Jehova so ontulong ed sikatayo pian napansiansia so mabiskeg ya espiritual a talindeg tayo legan na mairap iran panaon a pambibilayan tayo.—Sal. 26:12.