Tepet

◼ Kapigan a matukoy so pamorma na kaaruman a grupo na Panagaral na Kongregasyon ed Libro?

Say pamorma na balon grupo so nepeg a konsideraen sano nakaukolan ta pian namantini so ag-onsulok ed 15 ya onaatendi diad kada lugar a panaaralan na libro, pati diad Kingdom Hall. Akin ya irerekomenda iya?

Sano mansiansian melag iray grupo na Panagaral na Kongregasyon ed Libro, say konduktor so mas makapangiter na imano ed kada onatendi. Sakey ni, amin so walaan na magenap a pankanawnawan mankomento diad paraan a matukotukoy parad mapublikon panangiyabawag day pananisia ra. (Heb. 10:23; 13:15) Say pakawalaan na mas melag iran grupo ed pigaran lugar diad intiron nasasakopan a teritorya na kongregasyon so manggawan mas kombinienti so iyatendi ed Panagaral na Kongregasyon ed Libro tan saray miting parad lawak na serbisyo. Saray kongregasyon ya angarum ed bilang na saray lugar a panaralan so akaimano a say dagup a bilang na inmatendi ed panagaral na libro et dinmaak met.

Nayarin wala iray nikaduman sirkumstansia a matukoy so pamorma na sananey a grupo, anggano satan et mas daiset. Saya so nayarin tua ed nisulinek a lugar odino diad saray peles a panaaralan ya aseksek la odino anggapoy magenap a yurongan. No nakaukolan, sakey a grupo so nayarin pormaen a mantitipon ira no agew pian nagunggonaan iray maedad la, saray mantratrabaho ed labi, odino agagin bibii ya aliwan-Tasi iray kaasawaan da.

Kada grupo na panagaral na libro so nepeg a walay akaasain a pigaran mabiskeg ed espiritual tan aktibo iran manangipalapag ontan met ed kualipikadon konduktor tan managbasa. Saray agagin lalaki so nepeg ya ondampot pian nakapet irayan pankaukolan ed kongregasyon.

Saray mamatatken so makapangiyalibansa ed kiyabanti na kongregasyon diad paneguro a saray grupo na panagaral na kongregasyon ed libro et kabkaabigan labat ed bilang tan naasikason maong ed espiritual a paraan tan sikaray makapanaral diad kombinienti iran panaralan. Kapiganman a praktikal itan, say balon grupo so nepeg a naporma ta pian amin so sigpot a makaanamot ed saray gunggona na sayan nikadkaduman espiritual ya uksoyan. Kasin niyopresim so abung mo bilang lugar a panaralan na libro? Dakel a nanggawa la ed satan so makakagamor na espiritual iran bendision.