Nayarian Yo Kasin Pausar so Ayaman Yo?
1 Nen inmunan siglo et impausar na dakel a Kristiano iray ayaman da parad saray pantitipon na kongregasyon. (1 Cor. 16:19; Col. 4:15; Filem. 1, 2) Diad arum iran kongregasyon natan et kulang iray pasen parad saray grupo na Panagaral na Kongregasyon ed Libro tan saray pantitiponan parad lawak na serbisyo. Lapud saya et arum a grupo na panagaral ed libro so walaan na 30 odino onsulok ni ya onaatendi, a sinmulok lan maong ed irerekomendan bilang a 15.
2 Sakey a Maabig a Pribilehyo: Ninonot yo la kasi a pausar so ayaman yo parad Panagaral na Kongregasyon ed Libro? Matukoy parad sayan gagala so babaleg a silir a satan so malinis, maliwawa, tan walaan na maabig a bentilasyon. Lapud say panagaral ed libro et sakey a miting na kongregasyon tan kabiangan na uksoyan nen Jehova pian ibangat so totoo to, say panaral ed libro diad abung yo so maabig a pribilehyo. Dakel so mangibabaga a nagugunggonaan ira ed espiritual diad pangiyoopresi ed ayaman da a nausar ed onian paraan.
3 No isipen yon matukoy so ayaman yo, ipangasin ipaamta ed saray mamatatken. Nayarin manaanap ira na kaaruman iran pasen. No aliwan posibli so panaral ed libro diad ayaman yo, kasin nayari so mantitipon ditan parad lawak na serbisyo? Anggano anggapo ni so pankaukolan natan, saray mamatatken so naliketan a makaamtan akaparaan so ayaman yo. Nayarin nawalaan kayo na pribilehyo dia ed arapen.
4 Ipanengneng Iray Maabig a Walna: Sano mantitipon diad pribadon ayaman, amin ya onaatendi so nepeg a manrespeto ed kagawaan na akan-abung. Nepeg a seguroen na atateng a mandeen so ananak da ed nidesignan pasen a panaralan, ya ag-ira onloloob-loob ed saray pribadon pasen na abung. Nepeg met ya ipanengneng so konsiderasyon ed saray kakaabay, ya alwaran so pakadisturbo ed sikara.—2 Cor. 6:3, 4; 1 Ped. 2:12.
5 Papasesegen itayo na Hebreos 13:16 ya aglilingwanan so ‘panggawa na maabig tan say pannanabang: ta say Dios napaliket a maong ed sarayan bagat.’ Say pangiyopresi ed ayaman yo a nausar parad pantitipon na kongregasyon so maabig a paraan pian ninabang yo ed arum iray maabig a bengatla tan pian ‘nigalang yo si Jehova panamegley na [mablin] kaykayarian yo.’—Uli. 3:9.