Panagaral na Pamilya a Mangitarok na Gayaga

“Lapu ed pikakabat saray silir napano ed saray amin a mabli tan makapaliket a kaykayamanan,” kuan na Biblia. (Uliran 24:4) Sarayan mablin de-balor a bengatla so aliwa lambengat a materyal a kaykayamanan noagta sasaglawien toy matuan aro, maridios a takot, tan mabiskeg a pananisia. Peteg a pabulaslasen na ontan iran kualidad so bilay na pamilya. (Uliran 15:16, 17; 1 Pedro 1:7) Balet, pian nagamoran iratan, kaukolan tayon itarok so pikakabat na Dios ed sankaabungan tayo.

SAY ulo na pamilya so akanresponsabli’d panangipurek ed sayan pikakabat ed saray membro na pamilya. (Deuteronomio 6:6, 7; Efeso 5:25, 26; 6:4) Sakey ed sankaabigan a dalan pian nagawaan iya et diad regular a panagaral na pamilya. Agaylan makapaliket iya parad saray mibibiang no nikondukta so panagaral ed paraan a makaibangat tan makapalikliket! Konsideraen tayo pa sirin so pigaran makanan bengatla diad panangikondukta na epektibon panagaral na pamilya.a

Sankaepektiboan so panagaral na pamilya no regular itan. No mandependi itan ed andiay getman uksoyan odino no nanonotan labat, maseguron magmaliw itan a mataltalag. Kanian nepeg mon ‘saliwen so panaon’ parad panagaral. (Efeso 5:15-17) Sakey ya angat so pamili’d regular ya oras a kombinienti ed amin. “Nan-irapan min pansiansiaen a regular so panagaral min sankapamilyaan,” so impatua na sakey ya uloy pamilya. “Sinali mi so nanduruman oras anggad nilira min siansia so dugan oras a medyo onlalabi la a matukoy parad sikami. Natan et regular lay pampamilyan panagaral mi.”

Bektaman a walaan kayo lay matukoy ya eskedyul, alwaran ya agpasasaleten iray pakadisturboan ed panagaral. “No bilang ta onsabi iray bisita legan na panagaral mi,” nanonotan nen Maria,b a 33 to la natan, “Palooben ira nen Daddy pian manalagar anggad sano nasumpal lay panagaral mi. Tan no walaray tawag ed telepono, basta ibaga ton sikatoy ontawag la nagogonoyan.”

Balet, agto labay ya ibagan anggapo lay panangitukoy-tukoy. Nayarin onlesa iray emerhensya odino ag-ilaloan iran nagawa, tan ompan kapilitan a kansilaen odino ikuntang so panagaral a sanpaminsan. (Eclesiastes 9:11) Balet alwaran ya ag-aabuloyan so antokaman ed saraya a mangamper ed rutina yo.​—Filipos 3:16.

Kaunongay kabayag na panagaral? Si Robert, a matalonan amabaleg ed anak ton bii tan laki, so angikuan: “Kaslakan et sabien toy sakey oras iray panagaral mi. Sanen ugugaw niray ananak mi, nampelengan min pansiansiaey interes da ed loob na oras diad pangonsidera’d nanduruman bengatla, singa bilang et pigaran parapo ed artikulon aaralen ed Say Panag-Bantayan, apilin bersikulos ed Biblia, tan kabiangan na arum a publikasyon.” Nanonotan ni nen Maria: “Sanen siak tan say duaran atsik so ugugaw ni, ngalngalin 20 minuto labat so panagaral mi a mamidua odino mamitlon danay ed loob na sakey simba. Legan na ibabaleg mi, say panagaral mi et sabien to lay sakey oras odino onsulok ni.”

Antoy Kaukolan Tayon Aralen?

No morekdeken iyan tepet sano atugyop lay amin pian manaral et manresulta ed inkasaew tan kadarak ed kabliay panaon na panagaral. No ontan so kipapasen, anggapoy pihon nailaloan na ananak tan agmabayag et naandi interes da. Kanian pilien lan masakbay so sakey ed saray publikasyon na Sosyedad ya aralen.

“Say matoor tan makabat ya aripen” so angitarya na daakan a publikasyon a panpilian. (Mateo 24:45-47) Nayarin usaren yoy sakey a libron agni inaral na pamilya. Tan agaylan liket a konsideraen so apilin kabiangan na Insight on the Scriptures no wala irayan tomo ed lenguahe yo! Alimbawa, nayarian yon repasoen so artikulon nipaakar ed Pangdem na Katawan legan na saray simba sakbay na Memoryal. Panggagayagaan na dakel a pamilya so pangipaparaan ed Panagaral na Panag-Bantayan parad simba. Balet itatarya met na segundaryo iran artikulo na Say Panag-Bantayan so ekselentin materyal ya aaralen. Say ulo na pamilya, a makaamta’d espiritual a pankaukolan na pamilya, so walad magmaong a kipapasen pian desidien no dinan a publikasyon so kaukolan ya aralen.

“Lawas min aaralen so sakey a publikasyon a pinili lan asakbay,” so nanonotan nen Maria. “Balet sano onlesa so sakey a tepet odino situasyon ed eskuelaan, insan ombaling kami ed matukoy ya impormasyon.” Saray nikaduman panpapagaan, a singa saray probleman aarapen na saray tobonbalo diad eskuelaan, panag-date, ekstra-kurikular ya aktibidades, tan arum nira, so talagan onlelesa. Sano nagawa iya, sukimaten iray artikulo odino impormasyon a manasaglawi’d walan problema. No nalmo yo so impormasyon ed sankabaloan ya isyu na Say Panag-Bantayan odino Awake! a labay yon kobrian a tampol kaibay pamilya, agmasuyat a mangiyuksoy ed satan. Siempre, marakep no pakabatan a masakbay iray membro na pamilya nipaakar ed pananguman. Balet seguroen a pawilen so inyeskedyul a materyal no naasikaso lay pankaukolan.

Pansiansiaen a Mapalna so Kaliberliber

Sankaabigan so pakapanaral no mareen so kipapasen. (Santiago 3:18) Kanian bayuboan so relaks, ingen kagalgalang, a kaliberliber. Inkuan na sakey ya uloy pamilya diad Estados Unidos: “Balanglan diad sala odino balkon so panaraalan mi, manaasinggeran kami imbes a manaarawian ed sakey a maawang a kuarto. Parad sikami, mamawala iya na maligsan liknaan.” Tan oniay panlikliketan nen Maria a nanonotan: “Sikamin sanaagin bibii so naabuloyan a mamili no iner ed dalem na abung so panaralan mi ed satan a simba. Komportabli so liknaan mi no onia.” Tandaan a say dugan liwawa, suston alasir na yurongan, tan masayaksak tan maayos a kaliberliber so mamawalay inkapalna. Say panmerienday sankapamilyaan kayari na panagaral et pagmaliwen ton makapaliket met itan a labi.

Desidien ni ingen na arum a pamilya so sanpaminsan a pangimbita’d arum met a pamilya diad panagaral da, a lalon mamainteres tan mamalaknab ed nanduruman komento. Sano naimbitaan iray balobalo nin a mibiang ed sayan uksoyan, nagunggunaan iran manimano’d eksperiensiadon ulo na pamilya a mangikonduktay panagaral na pamilya.

Gawaen a Mabilabilay so Biblia

Gawaen a mabilabilay so panaoy panagaral parad ananak, tan sigugunaet dan talaranan iratan. Nagawaan yo iya diad pamaseseg yo’d angkelag nin ananak a mangidrowing na saray eksena ed Biblia. No matukoy, paimari ed ananak iray ebento tan drama ed Biblia. Parad saray malangwer nin ananak et agkapilitan so itumbok ed pormal a tepet-tan-ebat a metodo. Say pambasa odino pangistoryay nipaakar ed saray karakter ed Biblia so makapaliket a paraan pian nipurek iray maridios a prinsipyo. Nanonotan ni nen Robert, ya asalambit ed akadkauna: “No maminsan et manbasa kami na saray salaysay ed Biblia, a mansusublayan, a basaen iray ‘imbalikas’ na saray karakter ed Biblia ya akaasainan mi.” Pampilien iray ananak na karakter a labay dan ilitrato ed pambasa ra.

Say pangusar ed saray mapa tan tsart so ontulong ed saray angkabaleg lan ananak a mangilitrato’d saray pasen tan itsura na dalin ya akagawaan na saray ebenton pantotongtongan. Mabitar, tekep na daiset ya imahinasyon, magmaliw a mabilabilay tan mandumaduma so panagaral na pamilya. Tan nawalaan so ananak na panpirawat ed Salitay Dios.​—1 Pedro 2:2, 3.

Tulongan so Balang Sakey a Mibiang

Pian panliketan na ananak so panagaral, nepeg da met a nalikna a sikaray kabiangan. Balet, sakey ya angat so pamaseseg ed ananak a walaay nanduruman edad pian mibiang. Balet oniay ibabaga na sakey a prinsipyoy Biblia: “Say manuley [mangiimaton, NW], tekepan to na seseg.” (Roma 12:8) Makatulong so pagmaliw ya entusiastiko, lapud makaalis so inka-entusiasmo.

Ibibiang nen Ronald so limay-taon ya anak ton bii, si Dina, a pambasaen to ed saray subtitulo na materyal ya aaralen tan pakomentoan toray litrato. Legan a manasingger so Memoryal na impatey nen Kristo nen imbeneg a taon, inyapasakey to’d matukoy iran ilustrasyon ed libron The Greatest Man Who Ever Lived.c Impaimano to: “Akatulong iya ed sikaton natalosan so kaimportantian na ebento.”

Parad samploy-taon ya anak ton bii, si Misha, inyarum nen Ronald so sananey a paraan. “Binmulaslas si Misha anggad punton natalosan to so aliwa lambengat ed saray ilustrasyon noagta say kabaliksan ya ililitrato na saratan,” so inkuan nen Ronald. “Kanian sanen sisingbaten so libron Revelation​—Its Grand Climax At Hand!,d insentro mi ed kabaliksan na saray ilustrasyon, tan akatulong iya ed sikato.”

Legan ya ontitin-edyer laray ananak, panggawaen iray praktikal ya aplikasyon na materyal a sisingbaten. Sano onlesa iray tepet legan na panaaral, iyasain iray partin i-research. Ginawa itan nen Robert sanen say 12-anyos ton si Paul so tinmepet nipaakar ed balobalo nin aporman klab ed eskuelaan a mangilalanor ed ay-ayam a Dungeons and Dragons. Inanap nen Paul tan saray arum ed pamilya ed say Watchtower Publications Index, tan nirepaso ra itan diad panagaral na pamilya ra. “Bilang resulta,” kuan nen Robert, “atalosan a tampol nen Paul a satan ya ay-ayam et makapuy parad saray Kristiano.”

Panapanaon ya iyaasain met nen Robert so panag-research. Anonotan na asawa to, si Nancy: “Sano i-research miray apostoles nen Jesus, balang sakey ed sikami so naasainan na sakey ya apostol kada simba. Agaylan liket so pakanengneng ed ananak a maligligsan mangipaparungtal ed report da diad panagaral min sankapamilyaan!” Say pan-research dan mismo tan panginabang da’d impormasyon ed pamilya so ontulong ed ananak pian ‘ombaleg ed arap nen Jehova.’​—1 Samuel 2:20, 21.

Say panagtepet​—punto-de-bista tan manangitonton iran tepet​—so maabig met a dalan pian nipibiang iray ananak. Angusar so Manunan Managbangat, si Jesus, na punto-de-bistan tepetepet, a singa say, ‘Anto so isisipen mo?’ (Mateo 17:25) “No bilang ta walay tepet na sakey ed sikami, ag-itan direktan eebatan na atateng mi,” so nanonotan nen Maria. “Lawas dan uusarey manangitonton a tepetepet, ya ontutulong ed sikamin mankatunongan ed pamaakaran.”

Mitalosan​—Agmamapasyodot!

Napalaknab so gayaga na panagaral na pamilya no nibesngaw na amin a presenti so punto-de-bista tan liknaan da ya agnatatakot ompan nakantiawan. Balet inkuan na sakey ya ama, “say maong a pitatalosan legan na panagaral na pamilya so posibli lambengat no lukas so linya na pitatalosan ed arum a panaon.” “Agmakapankuankuanan ya ontan no panaon lambengat na panagaral.” Diad antokaman a paraan, paliisan so botaktak iran komento a makapasakit, a singa say, ‘Kasin satan labat so naibagam?’ Abaloan ko et walay ibagam ya importanti’; ‘Anggapoy kabaliksay ibabagam’; Bueno, anto met so nailaloan ed sika? Ugaw ka nin talaga.’ (Uliran 12:18) Magmaliw a maabagey tan mapangasi ed ananak yo. (Salmo 103:13; Malaquias 3:17) Panliketan so gunaet da, tan suportaan ira legan dan pambabanikelan ya iyaplikay naaaralan da.

Kaukolan a say atmospera na panagaral na pamilya et ontalos ed nonot na ugugaw so panangibangat. “No gapoan mon peteken so ananak,” impaliwawa na sakey a matalonan ateng na apatiran ananak, “singa ka akaarap ed masugnar a dumerengel.” Diad ontan ya atmospera, nayarin ag-onsepsep so impormasyon. Kanian aggagawaen iray sesyon na panagaral a panaoy panagdisiplina tan pananusa. No kaukolan iratan, gawaen iya’d saginonor tan bilang indibidual.

Makanakana so Pansasagpot

Mankakaukolan na panaon tan sagpot so pangipaalagey ed maespiritual a pamilya. Balet iyaabawag na salmista: “Nia, saray ugugaw sikara so sakey a tawir nen Jehova; tan say bunga na eges sikato so tumang to.” (Salmo 127:3) Tan nimatalek ed atateng so responsabilidad a “bangatan [so ananak] ed kadudusa tan panamilin na Katawan.” (Efeso 6:4) Kanian bayuboan so dunong ed panangikonduktay epektibo tan makapaliket a panagaral na pamilya. Gawaen moy anggaay nayarian mo a mangitaryay “gatas a maespiritu ya andian na saol [a manlalapu ed salita, NW],” ta pian saray anak yo so ‘ombaleg ed kilalaban.’​—1 Pedro 2:2; Juan 17:3.

[Saray paimano ed leksab]