“Singger Kayo ed Dios, et Sikato so Onsingger Naani ed Sikayo”
Antis Tan Kayari—No Panon a say Biblia so Amasimbalo ed Sayan Too
MUSIKA so sankaimportantian ed bilay nen Rolf-Michael nensaman. Sikato so adik ed druga. Bilang sakey a tobonbalo diad Alemanya et sikatoy naniinum lay dakel ya alak tan andi-tundan angusar na LSD, cocaine, hashish, tan arum niran drugan angapekta ed panag-isip to.
Sanen sasalien toy mangipuslit na saray druga pian iloob to ed sakey a bansa diad Aprika, si Rolf-Michael so narel tan nipriso ed loob na 13 bulan. Satan ya inkipriso so angiter ed sikato na panaon a mannonot nipaakar ed tuan gagala na bilay.
Si Rolf-Michael tan say asawa to, si Ursula, so desperadon nananap ed kakanaan na bilay tan ed katuaan. Anggaman walaray makapadismayan naeksperiensya ra ed saray mankuan a Kristianon iglesia, pinilalek dan tuloy a nakabat so Dios. Ingen ta walaray tepet da ya ag-apenek na saray nanduruman grupo na relihyon. Niarum ni, anggapo ed sarayan relihyon so angiter ed sikara na determinasyon pian pasimbaloen so kabibilay da.
Diad saginonor et si Rolf-Michael tan si Ursula so nalmo na saray Tasi nen Jehova. Sanen nigapo da lay manaral na Biblia, atenyeg a maong si Rolf-Michael ed simbawa a: “Singger kayo ed Dios, et sikato so onsingger naani ed sikayo.” (Santiago 4:8) Determinado ton ‘impulisay so abangonan a panagbilay to, say inkatoo ton daan, tan ikawes so inkatoo a balo, a sikato so pinalsay Dios ed loob na kaptekan tan matuan kasantosan.’—Efeso 4:22-24.
Panon ya apasimbalo nen Rolf-Michael so personalidad to? Niparungtal ed sikato manlapud Biblia a “diad panamegley na suston pikakabat” et say inkatoo na sakey so “napasimbalo unong ed indengan na samay Sakey ya amalsa ed sikato,” salanti, si Jehova a Dios.—Colosas 3:9-11, NW.
Diad pakakagamor to na suston pikakabat, intunos nen Rolf-Michael so panagbilay to ed saray prinsipyo na Salitay Dios. (Juan 17:3) Mairap a nitunda so panag-usar na druga, balet binidbir nen Rolf-Michael so kaimportantian na iyasingger ed si Jehova diad pikakasi tan pakaeksperiensya ed tulong to. (1 Juan 5:14, 15) Akatulong met so maapit a pililimog ed saramay Tasi la nen Jehova, a manggugunaet a manggaway linawa na Dios.
Akatulong met ed si Rolf-Michael so impakapikabat ton say mundo so onlalabas tan sirin et saraman so manggagawa ed linaway Dios so mansiansia lawas. Lapud satan et pinili toy magnayon a bendisyon na maapit a siglaotan ed maaron Dios a si Jehova, imbes a say agmanbayag ya aro na mundo. (1 Juan 2:15-17) Si Rolf-Michael so atenyeg a maong ed saray salita ed Uliran 27:11: “Ana’ko, onkabat ka, tan paliketen mo so pusok, pian naebatan ko so mamalaw ed siak.” Oniay misalsalamat ton inkuan: “Ipapatnag na sayan bersikulo so kinaaralem na aro nen Jehova, lapud sikato so mangiiter na pankanawnawa ed saray totoo a mamaliket ed puso to.”
Singa si Rolf-Michael, say asawa to, tan say taloran anak da, nilasus nilibo so agunggonaan la diad panutumbok da ed saray prinsipyo na Biblia. Saratan ya indibidual so naromog ed saray kongregasyon na saray Tasi nen Jehova ed sankamundoan. Makapaermen, saray Tasi diad arum iran bansa so sililingon aakusaan bilang mauges a sekta a mamubuyak na saray pamilya. Papaneknekan na eksperiensya nen Rolf-Michael ya aliwa iran ontan.—Hebreos 4:12.
Inkuan nen Rolf-Michael a say Mateo 6:33, a mamapaseseg ed sikatayon anapen ya unona so espiritual iran bengatla, so pinagkagiya na pamilya to pian makapankurang ed suston kabibilay. Sikato tan say pamilya to so misalsalamat a maong ed si Jehova lapud panggagayagaan da so maliket a bilay ed pamilya bilang Kristianos. Sikaray mipakna ed liknaan na salmista sanen inkanta ton: “Anto kasi manepeg ya ibales ko ed Jehova a nipaakar ed amin na saray panamainawa to ed siak?”—Salmo 116:12.
[Blurb ed pahina 9]
Say Dios so mangiiter na pankanawnawa ed saray totoo a mamaliket ed puso to
[Kahon ed pahina 9]
Makatulong Iran Prinsipyo na Biblia
Saray onggendan et kabiangan ed saray prinsipyo na Biblia ya amakiwas ed arum pian mangiwaklit ed makaderal na bilay iran adiksion:
“O sikayo a mangaaro ed Jehova, gula yo so mauges.” (Salmo 97:10) No amoria la na sakey a too so inka-uges na makapatey iran agamil tan nabayuboan to so peteg a pambusol ed saratan, mainomay to lan gawaen no antoy makapaliket ed Dios.
“Miulop ka ed saray makabat a totoo, et sika naani makabat; balet say kaiba na saray maatiw manlikna na segsegang.” (Uliran 13:20) Pian nipulisay so druga tan arum niran pakaadikan, kaukolan a pilien a maong na sakey a too iray kaulop to. Say pamayuboy pikakaaro ed saray Kristianon ontulong ed sikaton mangipulisay ed saratan, so tuan makanakana.
“Agkayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios, a talonaan ton amin a pakatalos, bantayan to so kapusoan yo tan saray nonot yo ed Kristo Jesus.” (Filipos 4:6, 7) Say ontan a deen ed puso tan nonot so agnagamoran diad dinanman nin paraan. Tan say masimoon a panagmatalek ed Dios so ontulong ed sakey a mangarap ed saray problema, ya agmanguusar na makaadik iran druga.