Apaseseg Iray Nangraduar ed Gilead a Mansalita na ‘Saray Makapakelkelaw a Gawa’
WALAY inmatendi a 6,635 a nanlapud 52 a daldalin diad programa na impangraduar na koma-115 a klase na Watchtower Bible School of Gilead nen Setyembre 13, 2003.
Nadngelan da so nibase ed Biblia a panamaseseg ed 48 ya estudyante na klase ya itarok da ‘iray makapakelkelaw a gawa na Dios’ ed saray totoo diad 17 a daldalin. (Gawa 2:11) Ditan so panmisionaryoan na saray nangraduar.
Diad manangilukas iran balikas nen Stephen Lett, a membro na Mananguley ya Ulop na saray Tasi nen Jehova tan nantsirman ed impangraduar, oniay impanonot to ed saray estudyante: “Sano onla kayo la ed saray asainmin yo, inerman itan odino antokaman iray sirkumstansyan kidungetan yo, mas dakel so walad dapag yo nen saray onsumpa ed sikayo.” Diad impangaon to ed kapitulo 6 na Komaduan Arari, pinanonotan nen Brother Lett iray estudyante a makapanmatalek ira ed pananulong nen Jehova a Dios tan ed saray nilaksalaksan anghel legan ya ipapakabat da ‘iray makapakelkelaw a gawa na Dios.’ (2 Arari 6:15, 16) Nidunget iray Kristiano nen inmunan siglo diad isusumpa tan agpananginenen ed panagpulong tan panagbangat a kimey da, tan ontan met iran sirkumstansya so kidudungetan na saray Kristianon misionaryo natan. Balet, makapanmatalek ira ed tulong a manlapud tawen ontan met ed mangaraldalin ya organisasyon nen Jehova.—Salmo 34:7; Mateo 24:45.
Salitaen ‘Iray Makapakelkelaw a Gawa na Dios’
Kayari na manangilukas iran komento na tsirman, si Harold Corkern, a membro na Branch Committee ed Estados Unidos, so angipaliwawa ed teman “Petepeteg Iran Iilaloan—Tombok ed Magayaga tan Maaligwas a Panaglingkor.” Impabitar nen Brother Corkern a makadismaya iray ag-asumpal ya iilaloan, unong ya ipapabitar na Uliran 13:12. Balet, say pakadismaya so mabetbet a manlalapu ed saray aliwan peteg ya iilaloan ya ag-asumpal. Saray nangraduar so nakaukolan a walaan na asimbang tan realistikon panmoria ed inkasikaran dili tan ed arum. Nepeg ya ilaloan dan makagawa ira na pigaran kalilingoan, balet saratan so agnepeg ya alablabas a mamaermen ed sikara legan dan tutulongan so arum a makatalos ed “saray makapakelaw a gawa na Dios.” Pinaseseg nen Brother Corkern iray balon misionaryo a manmatalek ed si Jehova, say “mananumang ed saray mananap ed sikato.”—Hebreos 11:6.
Say tinmumbok ed programa et si Daniel Sydlik, sakey a membro na Mananguley ya Ulop, a nampaliwawa ed teman “Say Ilalo na Kristiano—Anto Itan?” Oniay inkuanto: “Say ilalo et sakey a positibon kalidad a nepeg a niwala ed sakey a Kristiano. Satan so estandarte na kaptekan a mangitarok ed sakey diad manepeg a relasyon ed Dios. Say sakey ya aliwan Kristiano so imposiblin nawalaan na ilalo a singa ed iilaloan tayo.” Intuloy nen Brother Sydlik a deneskribe so nanduruman aspekto na ilalo na Kristiano ya ontulong ed sakey pian mansiansian positibo anggaman ed saray kairapan ed bilay. “Lapud ilalo, sarag tayon arapen so bilay tekep na apasimbalon inkaseet tan matalonan espiritu.” Lapud ilalo, say sakey a Kristiano so natulongan a makatebek a si Jehova et Dios na gagala tan sikatoy makapanliket a manlingkor ed Sikato.—Roma 12:12.
Si Wallace Liverance, a registrar na Gilead School, so amaseseg ed saray estudyante a “Manakar Kayo ya Unong ed Espiritu.” (Galacia 5:16) Impabitar to no panon so intunda lawari nen Baruc, say sekretaryo nen Jeremias, a mankurang unong ed espiritu. Sinmabi so panaon a tinmayer si Baruc tan ginegemtan to iray angkabaleg a bengatla parad inkasikato. (Jeremias 45:3, 5) Insan impabitar nen Brother Liverance a walara so angibeneg ed si Jesus tan impulisay day espiritual a katuaan, a nakaukolan ed kilalaban. Say makasengeg et agda atalosan so imbangat to, tan sikara so adismaya lapud ag-agawa so iilaloan dan dili ed saman a panaon. (Juan 6:26, 27, 51, 66) Unong ed saratan a salaysay, anto so naaralan na saray misionaryo, a say kimey da et ipaarap so imano ed Manamalsa tan ed gagala to? Pinaseseg iray estudyante ya agmaniisip ed pakawalaan da na posisyon, a paderleng ira ed totoo, odino usaren da so teokratikon asainmin pian nagunggonaan ira a mismo.
“Magmaliw Kayo Kasin Manangiter Odino Manangawat?” so intepet na instruktor na Gilead a si Mark Noumair. Imbase to iray komento to ed Uko-ukom 5:2, a no iner et nandinayewan iray Israelita lapud mabulos ya impanboluntaryo ra a manserbi ed armada nen Barak. Saray estudyante na Gilead so kinomendaan lapud espiritu ra ya inmebat ed tawag na Babaleg a Barak, si Jesu-Kristo, a nagkalalon mibiang ed espiritual a pibabakal. Nepeg ya interesado iray sundalo nen Kristo a makagamor ed panangabobon na samay sakey a nampalistaan da. Oniay impanonot nen Brother Noumair ed saray estudyante: “Sano iyapasakey tayo la so pamaliket tayo ed inkasikatayo, ontunda itayo lan mibakal ed kabusol. . . . Say panagmisionaryo et aliwan nipaakar ed sika. Nipaakar itan ed si Jehova, ed inkasoberano to, tan ed nasusumpal a linawa to. Ag-itayo manlilingkor bilang misionaryo lapud labay tayon paliketen itayo nen Jehova, sikatayo so manlilingkor ed sikato lapud sikatoy inaro tayo.”—2 Timoteo 2:4.
Say instruktor na Gilead a si Lawrence Bowen so tinmumbok bilang tsirman na sakey a diskusyon ed partin “Pasantos Mo Ra ed Katuaan.” (Juan 17:17) Inkuan to a saray estudyante na koma-115 a klase so apasantos a ministros na Dios. Legan na paneeskuela ra, akibiang met ira ed lawak na ministeryo, a nanggunaetan dan inanap iray matuan-impapuson manangaro na katuaan. Singa si Jesus tan saray akadkaunan babangatan to, saray estudyante so agmansasalita unong ed ‘inkasikaran dili.’ (Juan 12:49, 50) Sikara so maseseg ya angiparungtal ed apuyanan tan manangiter-bilay a salita na katuaan. Saray panangiyakto tan saray eksperiensya na saray estudyante so angipatnag ed mabiskeg ya epekto na Biblia ed saramay akatongtong da.
Makapaseseg Iran Bilin tan Eksperiensya
Ininterbio nen Anthony Pérez tan Anthony Griffin, a membro na Service Department na sanga ed Estados Unidos, iray membro na Branch Committee a nanlalapud nanduruman parte na mundo. Siningbat na sarayan lalaki iray angat ya arapen na saray balon misionaryo tan angitarya ira na praktikal a simbawa a nibase ed personal ya eksperiensya ra. Arum ed saray angat so angilaktip ed pandurumaan ed kultura, say ampetang a klima ed interon taon, odino say kipapasen na relihyon tan politika a miduma ed apasalan la na saray estudyante. Anto so makatulong ed saray misionaryo pian ontalona ira ed balo iran kaliberliber da? Say aro ed si Jehova, aro ed totoo, ya ag-ira onlilingay, tan ag-ira onkikiwas a bengatbengat. Oniay inkuan na sakey a membro na Branch Committee: “Saray totoo ed bansan inki-asainan tayo so nambilay la ditan ed loob na dakel lan siglo antis tayo. Maseguron makapambilay tan makaadapta itayo ditan. No nidunget itayo ed saray kairapan, moriaen tayo iratan bilang pankanawnawan napaaligwas so walna tayo. Manmatalek kayo ed pikakasi tan ed espiritu nen Jehova, tan naeksperiensya yo so katuaan na saray salita nen Jesus, ‘Wala ak ed sikayo.’—Mateo 28:20.
Si Samuel Herd, a membro na Mananguley ya Ulop, so angiter ed kapantokan a parte na programa panamegley na paliwawa ton, “Mantultuloy a Salitaen so Nipaakar ed Makapakelkelaw Iran Gawa na Dios.” Say inkiyibung na masanton espiritu nen agew na Pentecostes 33 K.P. so amabiskeg ed saray babangatan nen Jesus a mansalita nipaakar ed ‘saray makapakelkelaw a gawa na Dios.’ Anto so makatulong ed saray balon misionaryo pian makapansalita ira tekep na ontan met ya inkaseseg ed Panarian na Dios? Say masanton espiritu. Pinaseseg nen Brother Herd iray nangraduar ya estudyante a magmaliw a “marlang ed espiritu,” a panliketan da iray asainmin da, ya agdan balot lilingwanan so impangipasal ed sikara. (Roma 12:11) “Say Biblia et makapakelaw a bengatla a ginawa na Dios,” so inkuan nen Brother Herd. “Agbalot leglemewen so kakanaan na satan. Mabilay so mensahe na satan. Apektaen na satan so sankaimportantian iran kabiangan na saray bengatla. Usaren itan pian ipetek iray bengatla ed kabibilay yo. Abuloyan itan a manguman ed paraan na panag-isip yo. Bantayan so abilidad yon manisip diad panaral, pambasa, tan pandalepdep ed Kasulatan . . . Gawaen yon kalat tan determinado yon usaren so inkipasal yo ed Gilead pian mantultuloy kayon mansalita nipaakar ed ‘saray makapakelaw a gawa na Dios.’”
Kayari na impamasa ed saray pabano a nanlapud interon mundo tan ed impangiter ed saray diploma, binasa na sakey ed saray nangraduar so sulat na klase a mangibabalikas ed apresasyon da ed panangipasal ya agamoran da. Insan sinampotan nen Brother Lett so maliket ya okasyon diad impanukoy to ed 2 Awaran 32:7 tan Deuteronomio 20:1, 4. Diad impangisiglaot to ed kaunoran iran komento to diad manangilukas a paliwawa to, oniay impanampot to: “Kanian sikayo ran pinabli min nangraduar, tandaan yo a diad ipikal yo, legan kayon manmamartsan paarap ed espiritual a pibabakal diad balo iran asainmin yo, si Jehova so mimartsa ed sikayo. Agbalot lilingwanan so katuaan a mas dakel so walad dapag yo nen saray onsumpa ed sikayo.”
[Kahon ed pahina 25]
SARAY ESTATISTIKA NA KLASE
Bilang na saray nirepresentan bansa: 7
Bilang na saray bansan angiyasainan: 17
Bilang na saray estudyante: 48
Promedyon edad: 33.7
Promedyon taon ed katuaan: 17.8
Promedyon taon ed sigpot-panaon a ministeryo: 13.5
[Litrato ed pahina 26]
Koma-115 a Nangraduar a Klase na Watchtower Bible School of Gilead
Diad listaan ed leksab, saray dasig so anumeroan a manlapud arap a pabeneg, tan saray ngaran so akalista manlapud kawigi a manpakawanan ed kada dasig.
(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3) Beckett, M.; Nichols, S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.