Kasin say Relihyon so Sengegan na Saray Problema na Katooan?

“SANO ag-ipapaseseg na relihyon so gotgotan, singa itan druga a manggawa’d konsiensia na too ya agmakalikna tan mamano ed isip na too na saray pantasyan mangibuburi ed mauges iran nagagawa. . . . Pagmaliwen [to] so totoo a makisir-kanonotan, maanito, napno na panggula tan matakot.” Oniay inyarum ni na datin misionaryo na Metodista a nansulat ed satan: “Tua irayan akusasyon. Wala so mauges tan maong a relihyon.”​—Start Your Own Religion.

‘Peteg ya agmakatunongan itan a kritisismo,’ so nayarin ikuan na arum. Ingen, siopa ta so makapangiburi ed saray katuaan na awaran? Diad inkalapagan, say relihyon​—ya inukeran bilang “say panaglingkor tan panagdayew ed Dios odino ed labas nin too a pakayari​—so walaan na mabanbanday ya awaran. Satan so nepeg a mangibangat tan mamaseseg ed sikatayo. Balet, kaslakan lan satan so mangisasagyat na gotgotan, inkamapeget, tan panggula. Akin ya ontan?

Sakey a Manamalingon “Anghel na Liwawa”

Unong ed Biblia, simpli labat so ebat. Diad pangipaparungtal to ed inkasikato bilang “anghel na liwawa,” si Satanas a Diablo so mamapalingo ed minilyon a totoo pian patumboken ira ed saray bangat to imbes a dia ed saray bangat na Dios. (2 Corinto 11:14) Impabitar nen apostol Juan a malaklaknab so impluensya nen Satanas lapud “say sankamundoan [et] mandukdukol ed kaugsan.” (1 Juan 5:19) Kabat nen Juan a ‘titilaan [nen Satanas] so lapag a sankamundoan.’​—Apocalipsis 12:9.

Antoray pansusumpalan na saya? Iyaalibansa nen Satanas iray relihyoson sistema a diad palaway et ompapatnag a masanto. Saratan so walaan na “sakey a nengneng na ‘relihyon,’” balet niwawalwal so tuan kipapasen na saratan lapud mauges a bunga a papawalaen da. (2 Timoteo 3:5, J. B. Phillips; Mateo 7:15-20) Imbes a makatulong a manresolbi ed saray problema na katooan, say relihyon so magmamaliw la ingen a kabiangan na problema.

Agtampol ipapasen ya agmakabaliksan odino agmakatunongan itan ya ideya. Tandaan a say mismon nengneng na panamalikdo et agnaliklikas na sakey a papalikdoen. Angiter si apostol Pablo na sakey ya alimbawa na saya sanen insulat to: “Saray bengatla ya ibagat na saray Gentiles, ibagat da ed saray demonyo, ya aliwan dia ed Dios.” (1 Corinto 10:20) Maseguron abigla iratan a totoo diad impakamorian mandadayew ira ed saray demonyo. Abaloan dan mandadayew ira ed maong a klase na dios, odino dirios. Ingen, diad tua et sikaray pinalikdo na “saray mauges ya espiritu ed pasen a mangatatawen,” a manusuporta ed pansasagpot nen Satanas a palingoen so katooan.​—Efeso 6:12.

Alimbawa, konsideraen tayo no panon a napapalikdo tan napapalingo nen Satanas so dakel a mankuan a Kristiano a mangibabaliwala ed pasakbay nen apostol Juan nipaakar ed satan a mauges ya impluensya.​—1 Corinto 10:12.

Say Imbangat nen Jesus et Nanlapu ed Dios

“Say bangat ko,” kuan nen Jesu-Kristo, “agko kien, balet kien na angibaki ed siak.” (Juan 7:16) On, say imbangat to et nanlapud Makapanyarin-amin a Dios. Kanian saray bangat nen Jesus so mapuersa tan makaibangat ed saraman so dinmengel ed sikato. Saratan so ‘agmanggagawa’d konsiensia na too ya agmakalikna odino mamapano ed isip na too na saray pantasyan mangibuburi ed mauges iran nagagawa.’ Diad pidumaan, saray bangat nen Jesus so mangibubulos ed totoo manlapud relihyoson kalilingo tan saray pilosopiya na too a papawalaen na sakey a mundon “abilungetan so kalakal” to lapud panamalikdo na Diablo.​—Efeso 4:18; Mateo 15:14; Juan 8:31, 32.

Nabibidbiran iray tuan Kristiano, aliwan lapud panangibalikas lambengat na inkadeboto ra, noagta lapud pananisia a pakapatnagan na makapasagyat iran kalidad a papawalaen na masanton espiritu na Dios. (Galacia 5:22, 23; Santiago 1:22; 2:26) Say sankatalonggaringan ed sarayan kalidad tan pakabidbiran ed tuan Inkakristiano​—et say agnaparaan a kalidad ya aro.​—Juan 13:34, 35.

Balet, imanoen iyan makanan punto: Ag-inilaloan nen Jesus odino saray apostol to a mansiansia so Kristianon kongregasyon a singa ed orihinal ya inkiletneg na satan. Kabat da a walay panaon ya onlesa so apostasya tan agnapatnagan so tuan relihyon.

Walay Panaon ya Agnapatnagan so Tuan Relihyon

Diad ilustrasyon nipaakar ed trigo tan sisanyas, impasakbay nen Jesus a walay panaon a ngalngalin agnabidbiran so tuan relihyon. Pibasam pa so salaysay diad Mateo 13:24-30, 36-43. Si Jesus so angitanem na trigo ed uma, say “maong a bukel,” a mangililitrato ed matoor iran babangatan to a manutugyop ed orihinal a Kristianon kongregasyon. Impasakbay to a nasabi panaon et “say kabusol,” si Satanas a Diablo, so mangisibwag, diad uma na trigo, na “saray sisanyas”​—saray totoon mankuan a manutumbok ed si Jesu-Kristo balet diad tua et mangipupulisay ed saray bangat to.

Ag-abayag, kayari impatey na saray apostol nen Jesus, pinmatnag iray indibidual ya apaneknekan a “sisanyas,” a mangipipilit ed saray pikewet a bangat na totoo imbes a say “salita nen Jehova.” (Jeremias 8:8, 9; Gawa 20:29, 30) Bilang resulta, pinmarungtal ed mundo so pikewet tan palson Inkakristiano. Satan so dodominaen na say tinukoy na Biblia a “mauges”​—sakey ya abulok a klerigon klase a nigalet a tuloy ed “amin a panagsaol.” (2 Tesalonica 2:6-10) Impasakbay nen Jesus a manguman iyan kipapasen diad “anggaan na mundo.” Saray singa-trigon Kristiano so natipon ed pankakasakey tan “saray sisanyas” so naderal diad kaunoran.

Saya iman so palson Inkakristiano a responsable ed “sigpot ya inka-ignorante ed loob la na saray siglo” tan ed inkayat na espiritual a kabilungetan ed Kakristianoan diad tinmumbok iran siglo. Lapud masakbay lan impakamoria ed saya tan ed amin a kabandayan tan karawalan ya agawgawa manlapu la nensaman makasengeg ed relihyon, si apostol Pedro so ag-alingon angipasakbay a “lapu ed satan [saray mankuan a Kristiano] say dalan na katuaan napauges naani.”​—2 Pedro 2:1, 2.

“Teolohiya Nipaakar ed Sanok tan Panggula”

Peteg ya aliwan say Kakristianoan lambengat so amauges ed reputasyon na relihyon. Alimbawa, imanoen iray panmoria na pundamentalista nipaakar ed “agresibon inkadeboto,” ya unong ed inkuan na datin madre a si Karen Armstrong et apawala lapud “amin a manunan relihyoson tradisyon.” Unong ed si Armstrong, say sakey ya importantin subok ed dinanman a relihyon et say pangibangat na satan ed “praktikal a panangabagey.” Anto so agawaan na saray pundamentalistan relihyon nipaakar ed saya? Oniay insulat to: “Say pundamentalistan pananisia, balanglan Judio, Kristiano, odino Muslim, so agmakakapasa ed sayan importantin subok no magmaliw itan a teolohiya nipaakar ed sanok tan panggula.” (The Battle for God​—Fundamentalism in Judaism, Christianity and Islam) Balet kasin say “pundamentalista” a relihyon labat so agmakakapasa ed sayan subok tan nagmaliw a “teolohiya nipaakar ed sanok tan panggula”? Paneknekan na awaran a wala nira.

Diad tua, si Satanas so angiletneg na sankamundoan ya empiryo na palson relihyon, a nabibidbiran lapud sanok, panggula, tan ngalngalin agmanampot a panagpaagus na dala. Tinukoy na Biblia iyan empiryo bilang “Babilonia a Baleg, Ina na . . . saray karimdimla dia ed dalin,” tan inlitrato itan bilang sakey a balangkantis ya akakabayo ed singa-ayep a mapolitikan sistema. Makatantanda a sikato so walaan na eebatan ed “dala na . . . amin da a pinatey dia ed dalin.”​—Apocalipsis 17:4-6; 18:24.

Aliwan Amin et Apalikdo

Anggaman ontan, papaneknekan na awaran ya aliwan amin et apalikdo. Anggaman ed sankauddieman a panaon, “dakel nin maong a totoo so nanggawa na maabig anggaman mauges so maslak a walad kaliberliber da,” so inkuan nen Melvyn Bragg. Saray tuan Kristiano so nantultuloy ya ‘angigalang [ed Dios] ed espiritu tan katuaan.’ (Juan 4:21-24) Insian day inkasikara ed sankamundoan a relihyoson sistema ya akikalugoran bilang “mananuporta ed pakayari na militar.” Pinaliisan da so pakapilanor ed siglaotan na Iglesia tan Estado ya imparungtal na awaran bilang “paknaan a pinaletan nen Satanas, ya aliwan si Jesus na Nazaret.”​—Two Thousand Years​—The Second Millennium: From Medieval Christendom to Global Christianity.

Diad agano niran panaon, saray Tasi nen Jehova so nakakabatan lapud maabig ya impluensya ra. Pian agnamatikan ed dinanman a palson relihyon, saray sisiaen tan kiwakiwas da so ibabase ra lambengat ed impuyan a Salitay Dios, say Biblia. (2 Timoteo 3:16, 17) Tan singa ed saray Kristiano nen inmunan siglo, tutumboken da so imbilin nen Jesus ya “ag-ira taga mundo.” (Juan 15:17-19; 17:14-16) Alimbawa, diad Nazi Alemanya, agda inkompromiso iray Makristianon prinsipyo, kanian sikaray ginula unong ed ideolohiya na Nazi. Binusol ira nen Hitler lapud talindeg da. Oniay inkuan na sakey a libron-panaralan ed eskuelaan: “Tinumbok na saray Tasi nen Jehova . . . so bangat na Biblia ya agmangitagey na saray kampilan ed antokaman a sengegan. Kanian ag-ira nansundalo odino nanggawa na antokaman a manuporta ed saray Nazi. Bilang bales, impriso na SS so amin a pamilya na saray Tasi nen Jehova. Manga kakatlo ed amin a Tasi nen Jehova [ed Alemanya] so pinatey diad saray panamairapan a kampo.”​—Germany​—1918-45.

Siempre, walaray makpel met ya indibidual ed nanduruman relihyon a nanirap lapud saray sisiaen da. Balet ginawa itan na saray Tasi nen Jehova bilang nankakasakey a relihyoson ulop. Karaklan ed sikara so malet ya amemben ed manunan Makasulatan a prinsipyo ya: ‘Ontulok ed Dios bilang manuley imbes a diad totoo.’​—Gawa 5:29, NW; Marcos 12:17.

Say Sengegan na Problema

Kanian samet labat a katuaan a say relihyon so pansesengegan na amin a problema na katooan. Say palson relihyon so sengegan. Ingen, gagala na Dios a panampoten so amin a palson relihyon diad asingger lan arapen. (Apocalipsis 17:16, 17; 18:21) Onia so igaganggan to ed siopaman a mangaaro ed inkahustisya tan inkatunong: “Ompaway kayo ed sikato [salanti, say Babilonia a Baleg, a sankamundoan ya empiryo na palson relihyon], baley ko, pian agkayo nalanor ed saray kasalanan to, tan agkayo manlikna ed saray bakbak to: Ta saray kasalanan to sinmabi ra angga ed tawen, tan say Dios anonotan to so kaugsan to.” (Apocalipsis 18:4, 5) On, say Dios a mismo so pasasanoken na relihyon a ‘mangipapaseseg na gotgotan, manggagawa’d konsiensia na too ya agmakalikna, mamapano ed isip na too na saray pantasyan mangibuburi ed mauges iran nagagawa, tan pagmamaliwen to so totoo a makisir-kanonotan, maanito, napno na panggula tan matakot’!

Kaleganan ni, saramay mangaaro ed katuaan so titiponen na Dios ed tuan relihyon. Satan so relihyon a manutumbok ed saray prinsipyo tan bangat na sakey a maaro, makatunongan, tan maabagey a Manamalsa. (Miqueas 4:1, 2; Sofonias 3:8, 9; Mateo 13:30) Nayarian moy magmaliw a kabiangan na satan. No kaliktan mo so kaaruman ya impormasyon no panon a nabidbir so tuan relihyon, bulos kan mansulat ed saray angipalapag ed sayan magasin, odino patulongan ka ed anggan siopa ed saray Tasi nen Jehova.

[Litrato ed pahina 7]

Saray totoo ed amin ya abenegan so manggagayaga ed tuan relihyon