Kasin Aamperen na Neutralidad so Makristianon Panangaro?

SAY pagmaliw a Kristiano so aglabat mangilaktip ed pambasa na Biblia, pampikasi, tan pankanta na saray himno kada Simba. Lalanoren na satan so panggawa na saray bengatla a para ed Dios tan ed totoo. Oniay ibabaga na Biblia: “Aleg a mangaro itayo ed salita o dia ed dila; noag dia ed gawa tan dia ed katuaan.” (1 Juan 3:18) Walaan si Jesus na masimoon a panangiyansakit ed arum, tan sikato so labay ya aligen na saray Kristiano. Pinaseseg nen apostol Pablo iray kapananisiaan to a lawas iran manggawa na ‘daakan a kimey na Katawan.’ (1 Corinto 15:58) Balet anto ta so kimey na Katawan? Kasin laktipen na satan so pansagpot ya umanen so totontonen na gobierno pian nagunggonaan iray mairap-bilay tan saray nalalames? Ontan kasi so ginawa nen Jesus?

Anggaman pinaseseg si Jesus a mibali ed mapolitika iran pamaakaran odino midapag ed arum, agton balot ginawa itan. Impulisay to so opresi nen Satanas a nawalaan na pakayari ed amin a panarian na mundo, agto akisangsangan nipaakar ed panagbayar na buis, tan inmarawi sanen nankakasakeyan na karaklan a sikatoy gawaen dan ari. (Mateo 4:8-10; 22:17-21; Juan 6:15) Balet say inkaneutral to so ag-angamper ed sikaton manggawa na pakagunggonaan na arum.

Inteen nen Jesus so imano to ed kimey a mangitarok na permanentin pankaabigan na arum. Anggaman say impamakan to ed liman libo tan impamaabig to ed saray mansasakit so angitarok na temporaryon pakainawaan ed daiset a totoo, nitarya so maandon bendisyon parad sankatooan lapu ed bangat to. Si Jesus so ag-akabkabat bilang manangorganisa na saray kampanya parad pisikal ya itutulong, noagta bilang sakey a “Managbangat.” (Mateo 26:18; Marcos 5:35; Juan 11:28) Oniay inkuan to: “Nisengeg ed saya nianak ak tan nisengeg ed saya linma ak dia ed mundo, pian tasian ko so katuaan.”​—Juan 18:37.

Pangipulong ed Bengatlan Magmaong nen say Politika

Say katuaan ya imbangat nen Jesus et aliwan teorya ed politika. Imbes, niyapasakey itan ed Panarian a sikaton mismo so magmaliw ya Ari. (Lucas 4:43) Sayan Panarian et sakey a mangatatawen a gobierno, ya onsalat ed amin ya administrasyon na too tan mangitarok na permanentin kareenan ed katooan. (Isaias 9:6, 7; 11:9; Daniel 2:44) Kanian satan lambengat so tuan ilalo na katooan. Agta lalon maaro so pangiyabawag ed ontan a seguradon ilalo ed arapen nen say pamaseseg ed totoo a manmatalek ed kapara ran too a mangitarya na maligen ya arapen? Oniay ibabaga na Biblia: “Agyo iyan so panmatalek yo ed saray priprinsipe, nisay dia ed anak na too, a dia ed sikato anggapo so tulong. Say panlinlinawa to ompaway, ompawil ed dalin to; dia ed satan lanlamang ya agew saray nonot to natawtaw ira. Maliga so too a say Dios nen Jacob so tulong to, et say ilalo to wala ed Jehova a Dios to.” (Salmo 146:3-5) Kanian imbes ya ibaki nen Jesus iray babangatan to ya ipulong so mas maabig a paraan a pangorganisa na saray gobierno, imbangat to ira a mangipulong ed “ebanghelyo na panarian.”​—Mateo 10:6, 7; 24:14.

Sirin, saya so ‘kimey na Katawan’ a niganggan a gawaen na saray Kristianon managpulong. Lapud kakaukolanen ed saray uuleyan na Panarian na Dios a manaaroan ira ed sakey tan sakey, ontalona so Panarian ed pamaandi na kairapay-bilay diad asimbang a panangiyutob ed kaykayarian na katooan. (Salmo 72:8, 12, 13) Saya so maong a balita kanian manepenepeg iyan ipulong.

Natan, saray Tasi nen Jehova so organisadon manggagawa ed sayan ‘kimey na Katawan’ diad 235 a daldalin. Bilang panguunor da ed ganggan nen Jesus, sikaray marespeto ed amin a gobierno. (Mateo 22:21) Balet uunoren da met irayan salita to parad papatumbok to: “Aliwa kayo a taga mundo, noag say pinili ta kayo ed mundo.”​—Juan 15:19.

Arum a datin manusuporta ed politika so anguman kayari ran inusisa a maong so Biblia. Oniay inkuan na sakey ya Italyanon politiko a membro na Catholic Action, organisasyon a kontrolado na iglesia: “Siak so akibiang ed politika, lapud moriaen kon say sakey a too so nepeg a walaan na aktibon betang ed mapolitika tan sosyal ya iyaaligwas na sosyedad.” Kayari ton inmekal bilang mayor na syudad pian ipulong so Panarian na Dios bilang sakey a Tasi nen Jehova, impaliwawa to no akin ya onsasaew iray sagpot na masimoon a totoo ed politika. “Onia so kipapasen na mundo, aliwan lapud agmanggugunaet iray desentin totoo pian paaligwasen iray kipapasen na sosyedad, noagta lapud saray masimoon a pansasagpot na pigara so natatalonaan na inkauges na dakel.”

Say pansiansian biig ed politika pian ipulong so alenleneg a tuan ilalo na katooan so agmangaamper ed saray tuan Kristiano a tulongan so arum diad praktikal iran paraan. Naaaralan na saramay natutulongan dan magmaliw ya uuleyan na Panarian na Dios ya umanen so makaderal iran ugali, respetoen so autoridad, paaligwasen so bilay na pamilya ra, tan nawalaan na asimbang a panmoria ed materyal a kayamanan. Nagkalalon importante, tutulongan na saray Tasi nen Jehova so totoo a napanggayagaan so maapit a pisisiglaotan ed Dios.

Nagugunggonaan so komunidad a panaayaman na saray mangipupulong ed Panarian na Dios. Balet nagkalalo ni, iwawanwan da so totoo a manmatalek ed sakey a gobierno a peteg tan mangitarok na permanentin kareenan ed amin a mangaaro ed Dios. Lapud neutral ira, bulos irayan Kristiano a mangitarya na magnayon tan praktikal a tulong a wala natan.

[Kahon/Litrato ed pahina 7]

Sakey a Politiko a Nagmaliw a Manangipulong na Panarian na Dios

Sanen ugaw ni, naaralan nen Átila so teolohiya parad kawayangan (liberation theology) ed saray pari na parokya diad Belém, Brazil. Sikatoy aliketan sanen nadngel to a diad kaunoran et agla manirap so katooan, tan sikato so akiulop ed grupo na aktibista, a ditan to naaralan so panangorganisa na saray panagprotesta tan kampanya ya isusumlang ed gobierno.

Balet panliliketan met nen Átila so pangibabangat ed ugugaw a kabiangan ed grupo, ya uusaren to so libron niiter ed sikato a Listening to the Great Teacher.a Sisingbaten na satan so nipaakar ed maabig a kondukta tan itutulok ed saray autoridad. Lapud saya et nan-umamengan nen Átila no akin a saramay manusuporta ed teolohiya parad kawayangan so agmanguunor ed saray atagey ya estandarte nen Jesus ed moral tan no akin a nalilingwanan na arum iray totoon maniirap sano agamoran da la so pakayari. Sikatoy sinmian la ed grupo. Diad saginonor, tinmoktok ed puerta to iray Tasi nen Jehova tan intongtong da ed sikato so nipaakar ed Panarian na Dios. Ag-abayag et sikatoy nanaral na Biblia tan naaralan to so tuan solusyon parad paniirap na katooan.

Legan na panaaral to, si Átila so onaatendi ed seminar na Katoliko nipaakar ed relihyon tan politika. “Saraya so duaran nandumaan a paraan na panangusisa ed parehon situasyon,” so impaliwawa na saray instruktor. Sikatoy onaatendi met ed miting diad Kingdom Hall. Agaylan baleg a pandumaan! Sakey lan bengatla et anggapo so mansisigarilyo, oniinum, odino mabanday iran lurey. Denesidi to so mila ed sikara diad panagpulong a kimey, tan agnambayag et sikatoy abautismoan. Natalosan to la natan no akin a say teolohiya parad kawayangan so aliwan peteg a solusyon ed saray problema na mairap-bilay.

[Paimano ed leksab]

[Saray litrato ed pahina 6]

Say inkaneutral na saray Kristianon ministro so agmangaamper ed sikara ya ontulong ed arum