Si Jehova so Mananulong Tayo
“Say tulong ko onsabi a manlapu ed Jehova, a sikato so nanggawa na tawen tan dalin.”—SALMO 121:2.
1, 2. (a) Akin a nibaga ya amin tayo et panapanaon a mankaukolan na tulong? (b) Anton nengneng na Mananulong si Jehova?
SIOPA ed sikatayo so agbalot mankaukolan na tulong? Diad tua, amin tayo so panapanaon a mankaukolan na tulong, pian natalonaan so ambelat a problema, naanosan so makapaot-ot ya impakaandi pinabpabli, odino pian nasungdoan so mairap a subok. Sano mankaukolan na tulong iray totoo, sikara so mabetbet ya onaasingger ed manangiyansakit a kaaro. Onlemew so liknaan sano nibesngaw ed ontan a kaaro so sakey a pakabebelatan. Balet ta limitado lambengat so nitulong na kaparan too. Niarum ni, arum so aglawas makayarin ontulong sano nakaukolan itan.
2 Balet, wala so Mananulong a walaan na andi-geter a pakayari tan daakan a nitulong. Niarum ni, papaseguroan to itayo ya agto itayon balot paulyanan. Sikato imay Sakey ya impakabat na salmista, ya oniay inyabawag to tekep na sigpot a panagmatalek: “Say tulong ko onsabi a manlapu ed Jehova.” (Salmo 121:2) Akin a kombinsido iyan salmista a sikato so tulongan nen Jehova? Pian naebatan itan a tepet, usisaen tayo so Salmo 121. Makatulong so panusisa ed satan ta pian natalosan tayo no akin a matalek itayo met a makapanilalo ed si Jehova bilang Mananulong tayo.
Sakey ya Ag-onsaew a Lapuan na Tulong
3. Dinan iran kapalandeyan so nayarin tinangay na salmista, tan akin?
3 Ginmapo so salmista diad impangipabitar to ed impamalsa nen Jehova ed amin a bengatla bilang basiyan na kompiyansa to: “Itangay ko so matamatak ed saray palpalandey: Iner so panlapuan na tulong ko? Say tulong ko onsabi a manlapu ed Jehova, a sikato so nanggawa na tawen tan dalin.” (Salmo 121:1, 2) Say salmista so aglambengat tinmangay ed dinanman a palandey. Sanen nisulat irayan salita, say templo nen Jehova so walad Jerusalem. Satan a syudad, a walad tagey na kapalandeyan na Juda, so piguratibon ayaman nen Jehova. (Salmo 135:21) Say salmista so nayarin tinmangay ed kapalandeyan na Jerusalem ya angipaalageyan ed templo nen Jehova, a matalek a maniilalo ed pananulong nen Jehova. Akin a segsegurado so salmista a sikato so natulongan nen Jehova? Lapud Sikato so “nanggawa na tawen tan dalin.” Singano oniay ibabaga na salmista, ‘Seguradon anggapo so makaamper ed itulong ed siak na makapanyarin-amin a Manamalsa!’—Isaias 40:26.
4. Panon ya impabitar na salmista a si Jehova so lawas maniimano ed saray pankaukolan na totoo to, tan akin a makaligliwa itan?
4 Insan insalaysay na salmista a si Jehova so lawas maniimano ed saray pankaukolan na saray lingkor to: “Sikato agto abuloyan so salim a nagalaw: Say mangokomis ed sika ag-ontemeg. Nengneng mo, say mangokomis na Israel ag-ontemeg nisay naugip.” (Salmo 121:3, 4) Agnaabuloyan na Dios a “nagalaw” odino naparukol iramay manmamatalek ed sikato, ya agla ra makabangon. (Uliran 24:16) Akin ya andi? Lapud si Jehova et singa alerton managpastol a manbabantay ed saray karnero to. Agta makaligliwa itan? Agton balot ilikdem iray mata to ed saray pankaukolan na totoo to. Sikara so babantayan to ed agew tan labi.
5. Akin a si Jehova et nikuan a walad “nikawanan”?
5 Lapud matalek so salmista a si Jehova so matoor a Mananalimbeng ed totoo to, oniay insulat to: “Si Jehova sikato so managkomis [odino, manbabantay] ed sika: si Jehova sikato so tarong mo ed nikawanan mo. Bangno agew say banwa agto ka naani pasakitan, nisay bulan no ontan a labi.” (Salmo 121:5, 6) Diad Pegley Bukig, say siroman so makapangitarya na nakaukolan a proteksion parad sakey a manaakar a managbaroy manlapud makaatong a petang na agew. Si Jehova et singa siroman na totoo to, a salimbengan to ira manlapud mansasnit a petang na saray desyang. Imanoen pa so nikuan a si Jehova so walad “nikawanan.” Diad saray pambabakal nensaman, say kawanan a lima na sundalo so agnasalimbengan na samper a sankabembenan na kawigin lima to. Say sakey a matoor a kaaro so nayarin mangiter na proteksion diad italindeg tan pibakal to ed nikawanan na sundalo. Singa ed satan a kaaro, si Jehova so matoor ya ontalindeg ed dikingan na saray mandadayew ed sikato, a lawas akaparaan ya ontulong ed sikara.
6, 7. (a) Panon itayon pinaseguroan na salmista a si Jehova so agbalot ontundan ontulong ed totoo to? (b) Akin a makapanmatalek itayo a singa say salmista?
6 Kasin ontunda si Jehova ya ontulong ed totoo to? Ag-itan balot nagawa. Oniay inkuan na salmista: “Si Jehova yagel [odino, bantayan] to ka a yarawi ed amin a mauges; sikato yagel to so kamarerwam. Si Jehova yagel to so kapapaway mo tan kaloloob mo a manlapu ed natan tan angga ed angga.” (Salmo 121:7, 8) Diad bersikulo 5, inkuan na salmista a: ‘Si Jehova so mankokomis [odino, manbabantay] ed sika,’ salanti, nagagawa itan ed kaplesan a panaon. Balet oniay insulat na salmista ed sarayan bersikulo: ‘Si Jehova et iyagel [odino, bantayan] to ka,’ salanti, diad arapen. Napaseguroan sirin iray tuan managdayew a say tulong nen Jehova et anggad arapen. Anggan iner so laen da, antokaman so desyang ya arapen da, sikara so lawas tulongan to.—Uliran 12:21.
7 On, say managsulat na Salmo 121 so matalek a say makapanyarin-amin a Manamalsa so manbabantay ed saray lingkor to tekep na inkamatamoy na manangiyansakit a managpastol tan inkaseet na alerton managbantay. Walaan itayo na amin a rason pian manmatalek a singa say salmista, lapud agmanguuman si Jehova. (Malaquias 3:6) Kabaliksan kasi na satan a sikatayo so lawas naproteksionan ed pisikal? Andi, balet no mantultuloy itayon manilalo ed sikato bilang Mananulong tayo, sikato so manalimbeng ed sikatayo manlapud amin a bengatla a nayarin maneral ed espiritualidad tayo. Natural labat ya itepet, ‘Panon itayon tutulongan nen Jehova?’ Usisaen tayo so apatiran paraan na panutulong to ed sikatayo. Diad sayan artikulo et singbaten tayo no panon so impanulong to ed saray lingkor to diad panaon na Biblia. Insan, diad ontumbok ya artikulo, konsideraen tayo no panon so panutulong to ed totoo to natan.
Tulong Manlapud Saray Anghel
8. Akin ya agla pankelawan ya interesadon maong iray anghel ed pankaabigan na mangaraldalin a lingkor na Dios?
8 Si Jehova so walaan na igaganggan a minilmilyon ya angheles. (Daniel 7:9, 10) Sarayan espiritun ananak so matoor a manusumpal ed linawa to. (Salmo 103:20) Kabkabat da a si Jehova so mangaaron maong ed saray totoon mandadayew ed sikato kanian labay ton tulongan ira. Agla pankelawan no akin ya interesadon maong met iray anghel ed pankaabigan na saray mangaraldalin a lingkor na Dios. (Lucas 15:10) Maseguro sirin a panliketan na saray anghel so pausar ed si Jehova pian tulongan iray totoo. Diad antoran paraan ya inusar nen Jehova iray anghel pian tulongan iray totoon lingkor to nensaman?
9. Mangiter na sakey ya alimbawa no panon ya inikdan na Dios na pakayari iray anghel pian protektaan so matoor a totoo.
9 Saray anghel so inikdan na Dios na pakayari pian protektaan tan iliktar iray matoor a totoo. Duaran anghel so tinmulong ed si Lot tan ed saray mamarikit to pian makaliktar ed kaderal na Sodoma tan Gomorra. (Genesis 19:1, 15-17) Sakey ya anghel so anigway na 185,000 ya Asiryanon sundalo a mamapagyaw ed Jerusalem. (2 Arari 19:35) Sanen nibuntok si Daniel ed ungib na saray leon, si Jehova so ‘angibaki na anghel to, tan pinepetan to so saray sangi na saray leon.’ (Daniel 6:21, 22) Sakey ya anghel so angibulos ed si apostol Pedro manlapud pangawan. (Gawa 12:6-11) Sinalambit na Biblia so dakel niran alimbawa na impanalimbeng na saray anghel, a mamepekder ed ibabaga na Salmo 34:7: ‘Say anghel nen Jehova so mankakampamento ed liberliber na saray ontakot ed sikato, tan iliktar to ra.’
10. Panon so impangusar nen Jehova ed sakey ya anghel pian pasesegen si propeta Daniel?
10 Inusar met nen Jehova iray anghel pian pasesegen tan pabiskegen iray matoor a totoo. Sakey a makapatenyeg ya alimbawa so naromog ed Daniel kapitulo 10. Diad saman a panaon et nayarin ngalngali la 100 a taon so edad nen Daniel. Adismayan maong so propeta lapud impankibalatar na Jerusalem tan ed inkaabala na kipaalagey-lamet na templo. Sikato so agonigon met kayari ton anengneng so makapataktakot a pasingawey. (Daniel 10:2, 3, 8) Say Dios so maaron angibaki na anghel pian sikatoy pasesegen. Aminpiga a pinanonotan na anghel si Daniel a sikato so “inad-aro a maong” na Dios. Say resulta? Oniay inkuan na masiken lan propeta ed anghel: “Pinabiskeg mo ak.”—Daniel 10:11, 19.
11. Anto so sakey ya alimbawa no panon a nausar iray anghel pian iwanwan so kimey a panangipulong na maong a balita?
11 Inusar met nen Jehova iray anghel pian iwanwan so kimey a panangipulong na maong a balita. Si Felipe so inwanwan na sakey ya anghel pian ipulong si Kristo ed sakey ya Etiopen eunoko, a nampabautismo ed saman. (Gawa 8:26, 27, 36, 38) Kayarin tuloy na saman, kinaliktan na Dios a say maong a balita so nipulong ed saray ag-agalsiman a Gentil. Diad sakey a pasingawey, pinmayawar so sakey ya anghel ed si Cornelio, sakey a Gentil a matakot ed Dios, tan sikato so inwanwan to pian ipatawag si apostol Pedro. Sanen si Pedro so aromog na saray imbaki nen Cornelio, inkuan da: “Si Cornelio . . . pinasakbayan na Dios lapu ed panamegley na sakey a masanto ya anghel, pian patawag to ka ed abung to, pian dengelen to ed sika so saray salita.” Akila ed sikara si Pedro, tan saray primeron ag-agalsiman a Gentil so nagmaliw a kabiangan na Kristianon kongregasyon. (Gawa 10:22, 44-48) Isipen pa no anto so nalikna yo sano naamtaan yon tinulongan kayo na anghel pian nakatongtong so sakey a toon nikiling ed kaptekan!
Tulong Panamegley na Masanton Espiritu
12, 13. (a) Akin a saray apostol nen Jesus so walaan na maabig a rason pian manisia a natulongan ira na masanton espiritu? (b) Diad anton paraan a pinabiskeg na masanton espiritu iray Kristiano nen inmunan siglo?
12 Sakbay a tuloy na impatey to, pinaseguroan nen Jesus iray apostol to ya ag-ira napaulyanan. Say Ama so mangiter ed sikara na mananulong odino “managligliwa, salanti say espiritu santo.” (Juan 14:26) Saray apostol so walaan na maabig a rason pian manisia a natulongan ira na masanton espiritu. On, say apuyanan a Kasulatan so napno na saray alimbawa no panon ya inusar nen Jehova so masanton espiritu, say sankabiskegan ed amin a puersa, pian tulongan so totoo to.
13 Diad dakel ya inkagawa, say masanton espiritu so nausar pian pabiskegen so totoo a manggawa na linawa nen Jehova. Say masanton espiritu so angiter na pakayari ed saray Ukom pian iliktar so Israel. (Uko-ukom 3:9, 10; 6:34) Satan met ya espiritu so amabiskeg ed saray Kristiano nen inmunan siglo pian makapantultuloy ira ed panagpulong tekep na inkakpel anggaman ed amin a nengneng na isusumpa. (Gawa 1:8; 4:31) Say matalonan impakasumpal da ed ministeryo ra so mabiskeg ya ebidensya na ikukurang na masanton espiritu. Wala ni kasi so makapangipaliwawa no panon a say “totoon andi-aral tan kabanyakan” so makapangikayat ed mensahe na Panarian diad interon mundo nensaman?—Gawa 4:13; Colosas 1:23.
14. Panon ya inusar nen Jehova so masanton espiritu to pian naliwawaan so totoo to?
14 Inusar met nen Jehova so masanton espiritu to pian naliwawaan so totoo to. Diad tulong na espiritu na Dios, nipatalos nen Jose iray mapropetikon kugkugip nen Faraon. (Genesis 41:16, 38, 39) Diad panamegley na espiritu to, imparungtal nen Jehova ed saray mapaabeba iray gagala to balet ta niyamot iratan ed saray mapaatagey. (Mateo 11:25) Kanian, nipaakar ed saray bengatlan itatarya nen Jehova “ed saray mangaro ed sikato,” oniay inkuan nen apostol Pablo: “Say Dios impuyan to ra ed sikami ed panamegley na espiritu.” (1 Corinto 2:7-10) Peteg a natalosan na sakey so linawa na Dios diad tulong lambengat na masanton espiritu.
Tulong Manlapud Salitay Dios
15, 16. Anto so nibaga a gawaen nen Josue ta pian sikatoy onkiwas a makabat?
15 Say apuyanan a Salita nen Jehova so “maabig a pakaaralan” tan ontulong itan ed saray lingkor na Dios pian ‘anggapo so pankulangan da, a nabangatan ira a maong ed amin a gawa a maabig.’ (2 Timoteo 3:16, 17) Lugan na Biblia so dakel ya alimbawa no panon a saray totoo na Dios nensaman so atulongan ed saray kabiangan na nisulat lan Salita to.
16 Say Kasulatan so tinmulong pian nitarya so makagunggonan panangigiya ed saray mandadayew ed Dios. Sanen nimatalek ed si Josue so responsabilidad a mangidaulo ed Israel, oniay nibaga ed sikato: “Sayan libro na ganggan ag-onarawi ed sangim, noag ingen sikato so umamengen mo ed agew tan labi, pian naimatonan mo a gawaen so unong na amin a nisulat ed sikato: ta dia ed ontan nagawam so dalan mo a maaligwas, tan dia ed ontan maong so kasumpalan mo.” Imanoen pa ya ag-insipan na Dios ed si Josue so mamilagron pakawalaan na kakabatan. Imbes, no basaen tan dalepdepen nen Josue so “libro na ganggan,” sikato so onkiwas a makabat.—Josue 1:8; Salmo 1:1-3.
17. Panon ya atulongan si Daniel tan Arin Josias panamegley na saray kabiangan na Kasulatan a wala nensaman ed sikara?
17 Say nisulat a Salita na Dios so tinmulong met pian niparungtal so linawa tan gagala to. Alimbawa, atalosan nen Daniel manlapud saray sulat nen Jeremias no kaunongan kabayag so pankibalatar na Jerusalem. (Jeremias 25:11; Daniel 9:2) Konsideraen met no anto so agawa legan na uley nen Arin Josias na Juda. Diad saman a panaon, say nasyon so kinmasipa ed si Jehova, tan mapatnag a saray arari so agnanggawa na personal a kopya ra na Ganggan tan agda met itan tinumbok. (Deuteronomio 17:18-20) Balet sanen aapigeren so templo ed saman, aromog so ‘mismon libro na ganggan,’ a posiblin insulat nen Moises. Nayarin saman imay orihinal a teksto, ya asumpal manga 800 a taon ed akadkauna. Kayarin imbasa ed sikato so lugan na satan, amoria nen Josias so pirmin impakasumlang na nasyon ed linawa nen Jehova, kanian sikato so mapekder a kinmiwas pian gawaen so nisulat ed libro. (2 Arari 22:8; 23:1-7) Agta mabitabitar a saray totoo na Dios nensaman so atulongan na saray kabiangan na Sagradon Kasulatan a walad sikara?
Tulong Panamegley na Saray Kapananisiaan
18. Akin a nibaga tayo a si Jehova so mismon lapuan na tulong no walay tuan managdayew ya ontulong ed arum?
18 Say tulong ya itatarya nen Jehova so mabetbet a manlalapu ed saray kapananisiaan. On, say Dios so mismon panlalapuan na tulong no say sakey a mandadayew et ontulong ed arum. Akin ya ontan so nibaga tayo? Lapud duaran rason. Unona, nalalanor so masanton espiritu na Dios. Satan ya espiritu so mamapawala na bunga, a mangilaktip ed aro tan kamaongan, ed saramay manggugunaet a paiwanwan ed satan. (Galacia 5:22, 23) Kanian, sano napakiwas so sakey ed saray lingkor na Dios ya ontulong ed arum, satan so pakapatnagan na ikukurang na espiritu nen Jehova. Komadua, sikatayo so apalsa unong ed indengan na Dios. (Genesis 1:26) Saya so mankabaliksan a sarag tayon ipatnag iray kalidad to, a kabiangan so panangasi tan panangabagey to. Kanian, no walay lingkor nen Jehova ya ontutulong ed arum, nipapatnag so kalidad na samay aaligen a peteg a Lapuan na satan a tulong.
19. Unong ed nidalatdat ed Biblia, panon so impanulong nen Jehova diad panamegley na saray kapananisiaan?
19 Diad samay panaon a nisulat so Biblia, panon so impanulong nen Jehova panamegley na saray kapanisiaan? Si Jehova so mabetbet a mamakiwas ed sakey ed saray lingkor to pian manimbawa ed arum, a singa say impangiter nen Jeremias na manangisalbay-bilay a simbawa ed si Baruc. (Jeremias 45:1-5) Panapanaon, saray tuan managdayew so apakiwas a mangitarya na materyal a tulong ed saray kapananisiaan, a singa ed impanggunaet na saray Kristiano ed Macedonia tan Acaya a tulongan iray mankaukolan ya agagi ra ed Jerusalem. Inkuan nen apostol Pablo a say ontan ya inkamabunlok so suston amawala na balikas na “pisasalamat ed Dios.”—2 Corinto 9:11.
20, 21. Diad antoran sirkumstansya ya apabiskeg si apostol Pablo ed saray agagi a taga-Roma?
20 Nagkalalo lan makapatenyeg iray salaysay no panon a nanggunaetan na saray lingkor nen Jehova so pamaseseg tan pamabiskeg ed balang sakey. Konsideraen so alimbawa a manasaglawi ed si apostol Pablo. Sanen paarap la ed Roma bilang sakey a priso, si Pablo so dinmalan ed karsada na Roma a kabkabat bilang say Dalan nen Appio. Say sampot a pambaroyan et aliwan marakep, lapud say dalanan na saray managbaroy et mapitek tan abeban pasen.a Amta na saray agagi ed kongregasyon na Roma ya onsabi si Pablo. Anto so ginawa ra? Kasin nanalagar labat ira ed abung da diad syudad anggad insabi nen Pablo insan sikatoy abeten da?
21 Say managsulat na Biblia a si Lucas, ya angiba ed si Pablo ed impanbaroy to, so mangisalaysay ed sikatayo nipaakar ed agawa: “Nanlapud man [Roma] saray agagi, nen nadngelan da kami, linma ra ya inabet da kami angga ed Plaza nen Appio, tan saray Talora a Taberna.” Sarag yo kasin ilitrato ed nonot yo so eksena? Lapud amta ran onsabi si Pablo, walay sakey a grupo na agagi a nambaroy manlapud Roma pian onabet ed sikato. Say arum a kaiba ed grupo so nanalagar ed Plaza nen Appio, say kabkabat a tundaan na saray managbaroy a ngalngali 74 a kilometro manlapud Roma. Say arum ya agagi so nanalagar ed Talora a Taberna, sakey a tundaan a ngalngali 58 a kilometro manlapud syudad. Anto so reaksion nen Pablo? Oniay inreport nen Lucas: “Nen anengneng to ra nen Pablo, akisalsalamat ed Dios, et binmiskeg so linawa to.” (Gawa 28:15) Isipen pa a say impakanengneng to lambengat ed saratan ya agagi a nansagpot a maong pian manbaroy ed satan a dalan so makapabiskeg tan makaligliwa la ed si Pablo! Tan siopa so akisalamatan nen Pablo ed saratan a maaron tulong? Akisalamatan to so nanlapuan na satan, si Jehova a Dios.
22. Anto so tinaon a teksto tayo parad 2005, tan anto so konsideraen tayo ed ontumbok ya artikulo?
22 Malinew, satan so mismon impabitar na apuyanan a rekord nipaakar ed saray pidedeneng na Dios. Sikato so Mananulong ya anggapoy kapara. Matukoy, say tinaon a teksto na saray Tasi nen Jehova parad 2005 et saray salita ed Salmo 121:2: ‘Say tulong ko et manlalapu ed si Jehova.’ Balet panon so panutulong nen Jehova ed sikatayo natan? Saya so konsideraen ed ontumbok ya artikulo.
[Paimano ed leksab]
a Say Romanon manag-anlong a si Horace (65—8 K.K.P.), ya akapambaroy met la ed satan a lugar, so nankomento nipaakar ed kairapan ed sayan kabiangan na panagbaroy. Deneskribe nen Horace so Plaza nen Appio ya “apusek na saray bangkero tan kuripot iran akanggawa na inuman.” Inreklamo to so nipaakar ed “makapageget iran ageyet tan patapatang” tan say “marutak” a danum.
Kasin Natandaan Yo?
Diad antoran paraan a tinmulong si Jehova—
• diad panamegley na saray anghel?
• diad panamegley na masanton espiritu to?
• diad panamegley na apuyanan a Salita to?
• diad panamegley na saray kapananisiaan?
[Blurb ed pahina 15]
Say tinaon a teksto parad 2005 et: ‘Say tulong ko et manlalapu ed si Jehova.’—Salmo 121:2.
[Litrato ed pahina 16]
Akisalamatan nen Pablo so Dios lapud tulong a naawat to ed saray agagi ed Roma