Nayarian Kasi na Too a Panampoten so Kairapay-bilay?
MINILYON a totoo so binmaleg ya ag-akaeksperiensya na kairapay-bilay. Agdan balot asali so naugip a narasan odino mankegkeg lapud betel. Anggaman kuan, dakel ed sikara so walaan na panangabagey ed saray mairap-bilay tan mansasagpot a tuloy pian tulongan ira.
Balet, sasagmaken nin siansia na totoo so kairapay-bilay makasengeg ed guerra sibil, delap, kelang, tan arum niran problema. Saratan so mamabangongot ed saray Aprikanon mandedependi labat ed panagdalos. Napapaskar so arum a taynan iray ayaman da tan onalis ed angkakabaleg a syudad odino manayam bilang refugee ed sananey a bansa. Arum a manaayam ed baryo et onaalis ed saray syudad lapud naiingganyo ira ed saray panamaseguron onasensoy bilay da.
Saray syudad ya aseksek na totoo so mabetbet a kawalaan na saray mairap-bilay. Ngalngalin anggapo la so lugar a napantanamanan. Kaslakan lan mairap so pakalmo na trabaho. Lapud pirmin inkadesperado na amayamay, sikara lay manggagawa na krimen pian manbilay. Saray manaayam ed syudad so oneey-ey parad tulong, balet agnayarian na saray gobierno na too a resolbien so onderenden a kairapay-bilay. Oniay indatak na The Independent na London, ya anukoy ed report na Nasyones Unidas a pinmaway nen Nobyembre 2003: “Lalon ondarakel so totoo ed mundo a naeerasan.” Inkuan ni na satan: “Diad interon mundo et kakalkulaen a 842 milyon a totoo natan so agmamangan na susto—tan ondarakel lamet itan, lapud walay kaaruman a 5 milyon a totoon naeerasan kada taon.”
Say sangan opisina na saray Tasi nen Jehova ed Abalaten ya Aprika so makakaawat a sagpaminsan na saray sulat a manlalapud saray totoon manasagmak na kairapay-bilay. Alimbawa, oniay insulat na sakey a lakin taga-Bloemfontein: “Anggapo so trabahok, tan mantatakew ak la diad syudad kapiganman a walay pankanawnawa. No agko gawaen itan, naerasan kami ed loob na pigaran agew—nilikud ni ed makapaketel a betel. Anggapon balot so naromog a trabaho. Dakel so manaakar-akar ed karsada pian mananap na trabaho tan naakan. Walaray nanenengneng ko a mankakalikal ed saray basuraan pian mananap na nakan. Arum so manbibikkel. Dakel so nagogonigon tan naandian lay ilalo a singa siak. Singano anggapo lay nailaloan ed arapen. Kasin ag-iya naiimano na Dios, ya amalsa ed sikatayo a mankaukolan na nakan tan kawesen?”
Walaray makaligliwan ebat ed sarayan kapagaan na saman a laki. Unong ya ipabitar na onggendan ya artikulo, naromog irayan ebat diad saray pahina na Salitay Dios, say Biblia.