Report na Saray Manangiyabawag na Panarian
Say Matuan Totoo so Makapangidadayew ed si Jehova
DIAD sankadalinan, saray Tasi nen Jehova, ugaw man odino matakken, so kabkabat lapud inkamatua ra. Konsideraen pa iray alimbawan nanlapud taloran kontinente.
Sakey ya agew sanen onsempet lan manlapud eskuelaan so 17-años a si Olusola, sikatoy akarokdok na pitaka. Inter to iman ed prinsipal, a nambilang ed kuarta a mankantidad na 6,200 naira (manga $45, U.S.). Impawil na prinsipal imay pitaka ed samay maestron akabalang ed satan. Lapud apresasyon na maestro, inikdan to si Olusola na 1,000 naira (manga $7, U.S.) tan imbaga ton pambayar iman nen Olusola ed saray babayaran ed eskuelaan. Sanen naamtaan na arum ya estudyante so agawa, binalaw day Olusola. Kayari na pigaran simba, walay estudyanten abalangan na kuarta, kanian kinerew ed saray managbangat a sansakeyen dan anapan so amin ya estudyante. “Alagey ka dia labat,” so inkuan na maestro ed si Olusola. “Amtak ya agka mantakew lapud sakey ka ed saray Tasi nen Jehova.” Nalmo so kuarta ed duara ed saramay estudyanten lalakin nambalaw ed si Olusola tan sikara so pirmin dinusa. Onia so insulat nen Olusola: “Agaylay liket ko ta kabkabat ak bilang sakey ed saray Tasi nen Jehova ya agbalot mantakew, tan lapud satan et nirarayew si Jehova.”
Sakey ya agew sanen onsipot la si Marcelo, a taga-Argentina, anengneng to so sakey a porpolyo a pigaran metro labat so kaarawi na satan manlapud beneg na abung to. Say porpolyo so inloob to ed abung insan sikaran sanasawa so maalwar a nanlukas ed satan. Asurprisa ran maong lapud anengneng da so baleg a kantidad na kuarta, credit cards, tan pigaran apirmaan a tseke, a sakey ed saratan et mankantidad na sakey milyon a pesos. Diad sakey a resibo, walay anengneng dan numero na telepono. Tinawagan da so akankayarian tan inyareglo day pangipawil ed porpolyo tan saray karga na satan diman ed pantratrabahoan nen Marcelo. Ompatnag ya aburido so akankayarian sanen sinmabi. Inkuan na amo nen Marcelo ed sikato a mankalmado labat lapud ta si Marcelo et sakey ed saray Tasi nen Jehova. Bilang tumang ed impakalmo ed porpolyo, say makankayarian so angiter ed si Marcelo na 20 pesos (manga $6, U.S.) labat. Nampasnok so amo ed sayan melag a kantidad lapud pandinayewan ton maong so inkamatua nen Marcelo. Saya so angiter ed si Marcelo na pankanawnawan mangipaliwawa a bilang sakey ed saray Tasi nen Jehova et labay to so magmaliw a matua ed amin a panaon.
Manlapud Kyrgyzstan so ontumbok ya eksperiensya. Si Rinat, sakey ya anem-años a laki, so akalmo na pitaka a kayarian na biin manaayam ed asingger ed sikara. Walay 1,100 som (manga $25, U.S.) ed pitaka. Sanen impawil nen Rinat so abalang a pitaka ed samay bii, binilang na bii so kuarta insan inkuan to ed ina nen Rinat a kulang iman na 200 som (manga $5, U.S.). Imbaga nen Rinat ya anggapo so inala to. Insan amin da so nananap ed nababalang nin kuarta tan nalmo ra itan diad lugar ya akalmoan ed pitaka. Mandinayew so bii. Imbalikas to so pisasalamat to ed si Rinat tan ed ina to lapud impawil day kuarta to, tan lapud Makristianon impamabaleg ed si Rinat.