“Anengneng” Da so Panangaro na Agagi

SI Yomara tan saray agagi ton si Marcelo tan Hiver et manaayam diad melag ya baryo ed Guatemala. Si Yomara so inmunan nampa-Bible study ed saray Tasi, insan nampaiyaral met la iray agagi to. Pero say problema, bulag irayan sanaagi, tan agda amta so manbasa na braille. Pero maan-anos imay mangiyaaral ed sikara. Sikato lay manbasa na saray parapo tan teksto no iyaralan to ra.

Say sakey nin problema et no panon iran makapiaral diad Kingdom Hall. Lapud bulag iran talo, agda sarag so manbiahen bukor, lalo la ta manga 40 minuto ya biahien so sankaasinggeran ya Kingdom Hall. Maong labat ta saray agagi et nanggaway eskedyul na mangabet ed sikara pian naatendian day amin ya aral. Nen wala lay asainmin da diad midweek ya aral, tinulongan met ira na agagi pian na-memorize day parte da.

Manlapu la nen Mayo 2019, wala lay aral diad mismon baryo ra kanian agda la kaukolan so manbiahe na arawi. Diad saman et walay sanasawan payunir ya linmipat ed lugar da. Ag-amta na sayan sanasawa so manbasa tan mansulat na braille, pero maanos dan inaral ta labay dan bangatan irayan taloran sanaagi. Linma rad library, inaral day braille, tan in-research da met no panon da itan ya ibangat ed arum.

Nen binangatan da imay taloran sanaagi, mapmaples iran akaaral! Kalabas labat na pigaran bulan, amta da lay manbasa na braille kanian lalo ran inmaligwas ed espiritual. Natan et regular payunir la si Yomara, Marcelo, tan Hiver. Ministeryal ya lingkor met la si Marcelo. Busy iran maong ed ministeryo tan diad kongregasyon, tan makaalis so seseg da.

Misatsalamat iyan sanaagi ed panangaro tan suporta na kongregasyon. “Manlapu la nen akabat mi iray Tasi, aliklikna mi so tuan panangaro,” so kuan nen Yomara. “Dakel so kakaaro mi ed kongregasyon, tan nalilikna mi ya parte kami na maar-aron pamilya diad interon mundo,” so kuan nen Marcelo. Mabiskeg so pananisia nen Yomara tan saray agagi to ya asingger da lan nanengneng ya magmaliw ya paraiso so interon dalin.—Sal. 37:10, 11; Isa. 35:5.