Kasin Walay Gunggona ed Pagmaliw a Matoor?
“AGAYLAN kabaleg so babayaran mon health insurance,” so kuan nen Karl, a sakey ya ahente na insurance.a “No dia ka ed kompanya mi, makagimper ka ed kada bulan na 20 a dolyar (U.S.), a balbaleg itan.”
“Nayarin tua ‘tan,” so inyebat nen Jens. “Balet ta pigay taon ak lan manbabayar na health insurance ko ed parehon kompanya. Tan agaylay abig na serbisyo ra diad apalabas, kanian labay koy mansiansian matoor ed sikara.”
“On, maabig a kalidad so katooran,” so inyebat nen Karl. “Ingen, balbaleg so nagagastos mo lapud panmamatoor mo!”
Duga si Karl. Mabetbet a say pagmaliw a matoor ed arum a too et nayarin pakagastosan. Mankaukolan met itan na panaon, biskeg, tan obligasyon. No ontan, kasin makagunggona so pagmaliw a matoor?
Mas Dakel so Mangirarayew nen say Manggagawa
Diad sakey a surbi a ginawa na Allensbach Opinion Research Institute diad Alemanya, 96 porsiento ed saramay tinepetan so angipasen ed inkamatoor bilang makapalikliket a kalidad. Tan nalmoan ed komaduan impansurbi na Allensbach ed limog na saray mantaon na 18 anggad 24 a walay 2 manlapud 3 a tinepetan so paborablin angipasen ed inkamatoor bilang praktikal.
Anggaman irarayew na karaklan so katooran, duma la balet no nipaakar ed aktual a pagmaliw a matoor. Alimbawa, diad pigaran bansa ed Europa, mabetbet ya agnipapatnag na saray sanasawa odino membro na pamilya so katooran ed balang sakey. Saray sankakaaro so mabetbet ya agmatoor ed balang sakey. Tan say katooran a mamapaelet nensaman ed relasyon na amo tan empleyado odino negosyante tan saray kustomer da et agla napatnagan natan. Akin kasi?
No maminsan, say okupadon kabibilay so manguupot ed panaon odino biskeg na liknaan pian nasumpal iray obligasyon a mankaukolan na katooran. Saray totoo a sinmaew ed pirerelasyonan ed arum et masuyat lan manmatoor ed anggan siopa. Nayarin mas lablabayen na arum so sakey a temporaryon klase na bilay ya ag-ira obligadon mangipatnag na katooran.
Antokaman so rason, say katooran et maabig a kalidad a mas dakel so mangirarayew nen say manggagawa. Kanian, imanoen pa irayan tepet: Kasin walay gunggona ed pagmaliw a matoor? No ontan, siopa so nepeg a panmatooran tayo, tan diad antoran paraan? Antoray gunggona ed pagmaliw a matoor?
[Saray paimano ed leksab]
a Sinalatan so pigaran kangaranan diad sayan artikulo tan diad ontumbok.
[Blurb ed pahina 3]
Say katooran et maabig a kalidad a mas dakel so mangirarayew nen say manggagawa