Istorya na Bilay

Agamoran Ko ‘Iray Pirawat na Pusok’

UNONG ED SALAYSAY NEN DOMINIQUE MORGOU

Akasabi ak a siansia ed Aprika nen Disyembre 1998! Agamoran ko la so pirawat ko sanen ugaw ak ni. Naliliketan ak no nononoten ko so nipaakar ed maaawang a lugar ed Aprika tan saray makapasagyat ya ayayep. Natan et akakar ak lan mismo diman! Ontan met, tinmua so sananey nin piugagep ko. Nagmaliw ak a sigpot-panaon ya ebanghelisador a nanlingkor ed sananey a bansa. Parad dakel et singano imposible itan. Makapkapuy so pakanengneng ko, tan aakaren ko iray mabuer a karsada diad saray purok ed Aprika diad tulong na sakey a giya ya aso ya imbangat a nakabisado iray karsada diad saray syudad ed Europa. Isalaysay ko pa ed sikayo no panon ak ya akapanlingkor diad Aprika tan no panon ya impagamor nen Jehova ed siak ‘iray pirawat na pusok.’​—Salmo 37:4.

NIANAK ak nen Hunyo 9, 1966, diad abalaten a Pransya. Siak so sankayugtanan ed pitoran sanaagi​—duaran laki tan limaran bii​—ya amin mi et inasikaso na maaron atateng. Balet, walay makapaermen ya agawa ed bilay ko sanen ugaw ak ni. Singa si baik, nanay ko, tan sakey ed saray atsik, akatawir ak na sakit a nanresulta ed sigpot ya impakabulag ko.

Bilang sakey a tin-edyer, kinaukolan kon sungdoan so panangiduma ed rasa, panaglabi, tan pansimpisimpitan, a sengegan na impanrebeldek ed sosyedad. Kaleganan na sayan mairap a panaon so inyalis mi ed rehyon na Hérault. Diman et walay makatantandan agawa.

Sakey a kabuasan na Simba, walay duaran Tasi nen Jehova a linma ed abung mi. Kabat ira nen nanay kanian pinaloob to ira. Si Nanay so tinepetan na sakey ed sikara no nanonotan to ni imay insipan to ed sikara nensaman ya awaten ton siansia so panangiyaral ed Biblia. Anonotan itan nen Nanay tan intepet to, “Kapigan tayo sirin onggapo ey?” Nampaknaan da a manaral ira kada Simbay kabuasan, tan diad ontan et si nanay so ginmapon nanaral na “katuaan na ebanghelyo.”​—Galacia 2:14.

Inmaralem so Pakatalos Ko

Nansagpot a maong si nanay pian natalosan tan natandaan to so aaralen to. Lapud bulag, kinaukolan ton ipatlep so amin a bengatla. Maan-anos iray Tasi ed sikato. Siak balet, kapag no onsabi la iray Tasi, onamot ak ed kuartok tan ompaway ak labat no akaalis la ra. Balet, sakey a ngarem, si Eugénie, a sakey ed saray Tasi, so akikabat ed siak tan kinatongtong to ak. Imbaga to’d siak a panampoten na Panarian na Dios so amin a pansimpisimpitan, pambubusolan, tan panaglabi diad mundo. “Say Dios lambengat so makaresolbe ed saratan,” so inkuan to. Kasin labay ko ni so mangamta na nagkalalo? Diad tinmumbok ya agew, ginmapo ak a nanaral na Biblia.

Balon amin ed siak iray naaralan ko. Atalosan ko la a say Dios so temporaryon mangiyaabuloy ed karelmengan diad dalin lapud makatunongan iran rason. (Genesis 3:15; Juan 3:16; Roma 9:17) Naaralan ko met ya ag-itayo paulyanan nen Jehova ya andian na ilalo. Imparungtal to ed sikatayo so alay abig a sipan ton bilay ya andi-anggaan diad paraison dalin. (Salmo 37:29; 96:11, 12; Isaias 35:1, 2; 45:18) Diad satan a Paraiso et onabig la so pakanengneng ko, a kalkalnan naaandi ed siak.​—Isaias 35:5.

Nanlingkor Ak a Sigpot-Panaon

Nen Disyembre 12, 1985, insimbolok so dedikasyon ko ed si Jehova diad bautismo ed danum, ya inalig koy atsik Marie-Claire, a nanggawa la na ontan a kundang. Ag-abayag et nampabautismo met lay kuyak a Jean-Pierre, pati say pinablik ya ina.

Diad kongregasyon mi, wala so pigaran regular payunir, odino sigpot-panaon ya ebanghelisador. Apaseseg ak ed liket tan inkaligsa ra parad ministeryo. Anggan si atsik Marie-Claire, a walay deperensya to ed mata tan sinulongan na balatyang so sakey a bikking to, so linmoob ed sigpot-panaon a serbisyo. Anggad natan et sikatoy mantutultuloy a mamapaseseg ed siak diad espiritual. Lapud pakapililimog ko ed saray payunir diad kongregasyon mi tan diad loob na pamilya mi, siak so asagyat ya onloob met ed sigpot-panaon a serbisyo. Kanian nen Nobyembre 1990, nampayunir ak diad syudad na Béziers.​—Salmo 94:17-19.

Say Impanalonak ed Pakakadismaya

Diad ministeryo, atulongan ak ed inkamaasikaso na arum a payunir. Anggaman ontan, nadidismaya ak no maminsan lapud saray limitasyon ko tan pirawat ko a mas dakel ni komon so nagawaan ko. Balet, si Jehova so amabiskeg ed siak legan na saratan a panaon na pakakadismaya. Nansukimat ak diad Watch Tower Publications Index, ya inanap ko iray istorya na bilay na saray kaparak a payunir a walaay deperensya ed pakanengneng. Nikelawan ak lapud dakdakel so aromog ko! Sarayan praktikal tan makapaseseg a salaysay so angibangat ed siak a pablien no antoy nasarag kon gawaen tan awaten iray limitasyon ko.

Pian naasikaso iray pankaukolan ko, nantrabaho ak bilang managlinis diad saray shopping mall, a wala met iray kaibak a Tasi. Sakey ya agew, naimanok iray katrabahoan ko a papawilen dan linisan iray lugar a kapkapanlinis ko. Mapatnag a dakel so nalalabsanan kon dutak. Inanap koy Valérie, a sakey met a payunir a mangidadaulo ed grupo mi bilang managlinis, tan kinerew ko ed sikaton prangkaen to ak no kasin naiirapan la so arum lapud siak. Sikatoy mapangasin angibaga’d siak a makauley ak lan mandesidi no agko la nayarian so trabaho. Kanian, nen Marso 1994, inmekal ak la ed satan a trabaho.

Natatalonaan ak lamet na liknaan na inkaandi-kakanaan. Siak so masimoon a nampikasi ed si Jehova, tan amtak a dinengel to iray ey-ey ko. Maminsan lamet, say panagaral na Biblia tan saray Makristianon publikasyon so akatulong a maong ed siak. Tan anggaman onkakapuy so pakanengneng ko, lalon ombibiskeg so pilalek kon manlingkor ed si Jehova. Anto kasi so nagawaan ko?

Nanalagar Ak Diad Primero, Insan Biglan Nandesisyon

Nan-aplay ak parad panangipasal diad Rehabilitation Center for the Blind and Visually Impaired diad Nîmes tan diad kaunoran et naaprobaan ak a manpasal ed loob na taloy bulan. Makagunggonan tuloy iman. Atalosan ko no antoy nalalanor ed sakit ko tan naaralan koy onadapta ed satan. Lapud napililimogan ko iray totoon walaan na nanduruman klase na sakit, amoriak a mablin tuloy so ilalok bilang Kristiano. Anggan panon et walaan ak na gagala tan walay nagawaan kon makagunggona. Niarum ni et akaaral ak na Pranses a Braille.

Diad insempet ko, naimano na pamilyak ya agunggonaan ak a tuloy ed impanpasal ko. Balet, say sakey a bengatlan agko labalabay et say amputin baston a kaukolan kon usaren. Mairap kon aksobien a kaukolan koy mangusar na ontan a “bislak.” Maabig komon no walaan ak na sananey a katulongan​—a nayarin sakey a giya ya aso.

Angipawit ak na aplikasyon ko parad sakey ya aso balet inkuan da a kaukolan koy manalagar a mabayag. Sakey ni, say ahensia so kaukolan nin man-imbestiga lapud agbasta iiter ed siopaman so giya ya aso. Sakey ya agew, imbaga ed siak na biin mangipapakurang na asosasyon parad saray bulag a say lokal a tennis club so mangiter na sakey a giya ya aso ed sakey a bulag odino makapuy so pakanengneng to a manaayam ed lugar mi. Imbaga ton siak so anonotan to. Awaten ko kasi itan? Atebek ko so panangiwanwan nen Jehova ed pamaakaran tan inawat ko itan a maaron opresi. Anggaman ontan, kaukolan ko nin alagaren so isabi na aso.

Sankanonot Ko nin Siansia so Onla’d Aprika

Legan kon manaalagar, inteen koy nonot ko ed sananey a bengatla. Unong ya asalambit ko ed gapo, talagan labalabay ko so makaonla ed Aprika manlapu la’d inkaugaw ko. Anggaman onkakapuy lay pakanengneng ko, lalon ombibiskeg itan a pilalek ko, nagkalautla ta naamtaan kon dakdakel so totoo ed Aprika ya interesado ed Biblia tan malabay a manlingkor ed si Jehova. Asalambit ko nensaman ed si Valérie a labay koy ombisita diad Aprika. Labay to ak kasin ibaan? Sikatoy inmabobon, kanian nansulat kami ed pigaran sangan opisina na saray Tasi nen Jehova ed Aprika a mansasalitay Pranses.

Akaawat kami na ebat manlapud Togo. Malikeliket ak, tan impaibasak itan ed si Valérie. Makapaseseg iman a sulat, kanian inkuan nen Valérie: “No ontan, onla ta sirin.” Kayari min sinulatan iray agagi diad sangan opisina, imbaga ra a mitalosan ak ed si Sandra, sakey a payunir ed Lomé, say kabiseran syudad. Sinmipot kami nen Disyembre 1, 1998.

Agaylan midumaan so kaliberliber, balet makapalikliket! Kadapo na eroplano diad Lomé, sikami so inmepas tan alikna min singano sinmakulob ed sikami so petang ed Aprika. Inabet kami nen Sandra. Agkami nin balot akapannengnengan, balet alikna min tampol a singano abayag kami lan sankaaro. Sakbay a tuloy na insabi mi diman, si Sandra tan say kaulop ton si Christine, so aturo bilang espisyal payunir diad Tabligbo, sakey a melag a baley a nisulinek. Kanian awalaan kami na pribilehyon miulop ed sikara diad balon asainmin da. Nampirmi kami diman ed loob na duay bulan, tan sanen inmalis kami la, ninonot ko so ompawil lamet.

Malikeliket Ak Lapud Akapawil Ak Lamet

Diad Pransya, namparaan ak a tampol parad komaduan pambiahek a paonla ed Togo. Diad tulong na pamilyak, niyarunsak so panayam diman ed loob na anem bulan. Kanian nen Setyembre 1999, nan-eroplano ak lamet a paarap ed Togo. Balet ta bukbukor ko la ed saman. Isipen pa so liknaan na pamilyak sanen inmalis ak a manbukbukor anta walay deperensya na pakanengneng ko! Balet agda kaukolan so manaburido. Pinaseguroan ko iray ateng ko a saray kakaarok, a nagmaliw lan singa kapamilyak, so manaalagar ed siak diad Lomé.

Agaylay liket ko lapud akapawil ak diad lugar a dakdakel so totoon interesado diad Biblia! Ordinaryo labat so pakanengneng ed totoon manbabasa na Biblia diad karsada. Diad Tabligbo et sika ni so tawagen na totoo pian mitongtong nipaakar ed Biblia. Tan agaylan pribilehyo so pakapiayam ed simplin pundoan na duaran agagin bibii ya espisyal payunir! Akaaral ak na sananey a kultura, a duma so panmoria ed bengabengatla. Manuna ed amin, naimanok a saray Kristianon agagi diad Aprika et iyuuna ra so intereses na Panarian diad bilay da. Alimbawa, say panakar na dakel a kilometro a paonla ed Kingdom Hall so aliwan babeng ed pakaatendi ra ed saray pantitipon. Dakel met so naaralan kon leksion manlapud inkaligsa tan inkamaparawes da.

Sakey ya agew, sanen pasempet kami la manlapud lawak na kimeyan, imbagak ed si Sandra a natatakot ak lan ompawil ed Pransya. Kinmapuy lan maong so pakanengneng ko. Inisip ko iray maingal a karsada ed Béziers a napnoy totoo, saray takayan diad saray ayaman a bilding, tan dakerakel nin bengatla a mamairap ed bilay na sakey a limitadoy pakanengneng to. Diad pidumaan, saray karsada diad Tabligbo so mareen, anggaman aliwan sementado, tan daiset so totoo tan aliwan seksekan ed dalan. Panon ak nin makapambilay diad Pransya, natan ta nipasal ak la ed Tabligbo?

Kalabas na duay agew, tinmawag si nanay pian ipaamta a manaalagar la ed siak so eskuelaan a mangipapasal ed saray giya ya aso. Akaparaan la so makalakal tan malangwer nin Labrador a manngaran na Océane pian magmaliw a “matak.” Nitarya lamet iray pankaukolan ko tan naandi iray kapagaan ko. Kayari na anem bulan a maliket a panaglingkor ed Tabligbo, pinmawil ak ed Pransya pian alaen si Océane.

Kayari na pigaran bulan na impangipasal ed si Océane, sikatoy impudir da ed siak. Diad gapo et aliwan mainomay. Kaukolan min talosan so sakey tan sakey. Balet kalkalnan amoriak a kakkaukolan ko si Océane. Diad tua et sikatoy nagmaliw lan kabiangan na bilay ko. Anto so reaksion na totoo ed Béziers sano onla ak ed abung da a walay kaibak ya aso? Siak so rerespetoen da tan maomaong ira ed siak. Nagmaliw a “bayani” si Océane diad lugar mi. Lapud papaliisan na dakel a totoo so sakey a toon walaay deperensya, akatulong ed siak so impakawalaan ko na aso pian nitongtong so sakit ko ya agnababaingan. Komportable iray totoo tan dedengelen da ak. On, main-inomay ko so mangigapo na tongtongan lapud kaibak si Océane.

Kaibak si Océane a Linma ed Aprika

Agko alingwanan so Aprika, kanian namparaan ak parad komatlon pambiahek. Diad saman et kaibak la si Océane. Siak so inibaan met na malangwer nin sanasawa, si Anthony tan Aurore, tan say kaarok a si Caroline​—ya amin da et payunir a kaparak. Sinmabi kami diad Lomé nen Setyembre 10, 2000.

Diad primero et dakdakel so natatakot ed si Océane. Pigpigara ni so totoo ed Lomé ya akanengneng la na ontan kabaleg ya aso, lapud angkekelag so maslak ya aso ed Togo. Sano nanengneng na arum a sikatoy abalkesan, iisipen da a sikatoy masebesebeg ya ayep a kaukolan a banoen. Nipaakar ed si Océane, naaralan to la so mangiyagel tan akaparaan a manprotekta ed siak no walay antokaman a nalikas ton peligro. Agnambayag et naaralan a siansia nen Océane so onadapta diad balon kaliberliber. Sano abalkesan, wala so trabaho to​—a mareen, responsable, tan mansiansia ed dikingan ko. Sano naukbaran la, sikatoy magalagalaw, a no maminsan et magantil. Dakel so panliliketan min dua bilang saniba.

Sikamin amin so naimbitaan a miayam ed pundoan di Sandra tan Christine diad Tabligbo. Pian napikabkabatan na saray agagi diman si Océane, inimbitaan mi ra ya ombisita ed sikami tan impaliwawak so kimey na sakey a giya ya aso, no akin a nakaukolan ko itan, tan no panon so nepeg ya ikiwas da no kaarap da. Inmabobon iray mamatatken a kaukolan kon ipila si Océane diad Kingdom Hall. Lapud aliwan kaslakan so onian uksoyan diad Togo, satan so inyanunsio ra ed kongregasyon, ya impaliwawa ra so pamaakaran. No nipaakar ed ministeryo, mimila labat ed siak si Océane sano manggawa ak na panagpawil tan sano mangiyaral ak na Biblia​—saray kipapasen a mas mainomay a natalosan no akin a sikatoy kaibak.

Makapaliket lawas so panagpulong diad sayan teritorya. Siak so naynay a misalsalamat ed inkamakonsidera na saray maomaong a totoo, ya ipapatnag dan mismo itan ed saray kiwas da, a singa say inkagunaet dan mangitarya ed siak na yurongan. Nen Oktubre 2001, akila ed siak si nanay ko diad komapat ya impanbiahek ed Togo. Kayari na taloy simba et sikatoy pinmawil ed Pransya, ya apaseguroan tan malikeliket.

Misalsalamat ak a maong ed si Jehova lapud siak so akapanlingkor ed Togo. Mailalo ak ed si Jehova a mantultuloy ton ipagamor ed siak ‘iray pirawat na pusok’ legan a mantutultuloy kon uusaren so amin a wala ed siak diad panaglingkor ed sikato.a

[Paimano ed leksab]

[Saray litrato ed pahina 10]

Malikeliket ak a naynay no nononoten ko so nipaakar ed maaawang a lugar ed Aprika tan saray makapasagyat ya ayayep

[Litrato ed pahina 10]

Kaibak si Océane diad saray panagpawil

[Litrato ed pahina 11]

Inmabobon iray mamatatken a kaukolan kon ipila si Océane diad saray pantitipon