Say Dunong ed Itatalineng Tekep na Panangaro

“SALAMAT ed indengel mo ed siak.” Wala ta lay angibaga na ontan ed sika? Agaylan mapagalang a balikas itan! Say maong ya ondengel et papablien na amin lawarin totoo. Diad italineng a maong, nainawaan ed sikatayo so totoon nagogonigon odino nabebelatan la ed saray problema. Tan agta makatulong so pagmaliw tayon maong ya ondengel pian napabli tayo so totoo? Diad loob na Kristianon kongregasyon, say italineng a tekep na panangaro so importantin kabiangan na ‘pampapagalangan tayo ed sakey tan sakey pian manaayatan itayo ed aro tan dia ed saray maabig a gawa.’​—Hebreos 10:24.

Balet, dakel a totoo so aliwan marunong ya ondengel. Labalabay da labat so mangiter na bilin, mangisalaysay na dilin eksperiensya ra, odino mangibesngaw na punto de bista ra imbes ya ondengel ed ibabaga na arum. Say italineng sirin et talagan sakey a dunong. Panon tayon naaralan so italineng tekep na panangaro?

Say Manunan Nakakaukolan

Si Jehova so “Baleg a Managbangat” ed sikatayo. (Isaias 30:20, NW) Dakel so nibangat to ed sikatayo nipaakar ed itatalineng. Isipen pa so impanulong nen Jehova ed si propetan Elias. Lapud ataktakot ed saray panamagyaw nen Reyna Jezabel, binmatik si Elias diad kalawakan tan imbalikas ton labay to lay ompatey. Diman et akisalita ed sikato so anghel na Dios. Sanen impaliwawa na propeta so katatakot to, tinmalineng si Jehova insan impatnag To so baleg a pakapanyari To. Say resulta? Naandi so katatakot nen Elias kanian intuloy to lay asainmin to. (1 Arari 19:2-15) Akin a tatalinengen a maong nen Jehova iray pampapaga na saray lingkor to? Lapud iyaansakit to ira. (1 Pedro 5:7) Say manunan nakakaukolan sirin pian magmaliw itayon maong a dumerengel et say pangiyansakit ed arum, tan say pannodnonot ed kipapasen da.

Sanen akagawa na ambelat a kasalanan so sakey a laki diad Bolivia, inapresya to so panangiyansakit na sakey a kapananisiaan. Oniay insalaysay na sayan laki: “Saman so sakey ed makapaermen a parte na bilay ko. Agak la komon manlilingkor ed si Jehova natan no agak tinulongan na sakey ya agi a tinmalineng a maong ed siak. Agto tanton nansalita, balet apabiskeg ak a maong diad impakatebek kon sikatoy ontatalineng ed siak. Agko nakaukolan so solusyon ya ibaga to lapud amtak so gawaen ko. Say nakaukolan ko labat et walay makatalos ed naliliknak. Say intalineng to so angisalba ed siak manlapud pakaandian la komoy ilalo.”

Say matalonggaring ya Ehemplo tayo ed dunong ed itatalineng tekep na panangaro et si Jesu-Kristo. Kayari na impatey to, duara ed saray babangatan to a nanlapud Jerusalem so paarap ed sakey a baryo a 11 kilometro ed kaarawi. Maseguron dismayado ira. Kanian say apaolin Jesu-Kristo so akiulop ed sikara. Maalwar so impantepet to ed sikara pian natangguyor to iran mansalita, kanian inmebat iray babangatan. Imbalikas da iray iilaloan da tan say pakadidismaya tan pakawewetwet da. Sikara so inyansakit nen Jesus, tan say intalineng to tekep na panangaro so anagyat ed duaran babangatan pian ontalineng met. Insan “impaliwawa to ed sikara dia ed saray amin a Sulat so saray bengatla nipaakar ed sikato lanlamang.”​—Lucas 24:13-27.

Say italineng nin unona et sakey a maaron paraan pian natangguyor tayo so arum ya ondengel ed sikatayo. “Sinuppiat na atateng ko tan saray katulangan ko so paraan na pamapabaleg ko ed ananak ko,” so inkuan na sakey a bii ed Bolivia. “Asakitan ak ed imbaga ra, balet ta panduaruwaan ko so inkaateng ko. Diad saman a panaon, walay Tasi nen Jehova a binmisita ed siak. Intongtong to so nipaakar ed saray sipan na Dios. Balet, alikas ko ed panagtepet to’d opinyon ko a sikato so mabulos ya ondengel. Sikato so pinaloob ko, tan agnambayag et imbagak la ed sikato so problemak. Sikato so maanos a dinmengel. Tinepet to no anto so labay ko parad ananak ko tan no anto so liknaan na asawak nipaakar ed satan. Maong ta walay sakey a mabulos ya ontalineng pian talosan to ak. Sanen impanengneng to ed siak so ibabaga na Biblia nipaakar ed bilay na pamilya, asegurok a say pitotongtongan ko et mangiyaansakit ed kipapasen ko.”

“Say aro . . . agto anapen so kien to,” kuan na Biblia. (1 Corinto 13:4, 5) Say kabaliksan sirin na italineng tekep na panangaro et say pangipaliis tayo ni ed interes tayo. Kakaukolanen na satan ya erepen tayo so telebisyon, itunda so pambabasa na peryodiko, odino erepen so cell phone sano itotongtong ed sikatayo na arum so nipaakar ed seryoson bengatla. Say italineng a tekep na panangaro so mankabaliksan na interesado tayon tuloy ed iisipen na arum a too. Kakaukolanen na satan a paliisan tayo so pansalita nipaakar ed inkasikatayo a singa say, “Ipapanonot na satan so agawa ed siak nensaman.” Anggaman naabobonan so ontan diad makaaron pantotongtong, nakaukolan tayon ipaliis iray personal ya interes tayo sano itotongtong na sakey so seryoson problema to. Say puron interes ed arum so nipatnag ed sakey nin paraan.

Ontalineng Pian Natalosan a Maong so Nalilikna na Sakey

Aliwa labat a samploran paliwawa nen Job so nadngel na saray kakaiba to. Balet, oniay inkelyaw nin siansia nen Job: “O komon ta walaan ak na sakey ya ondengel ed siak.” (Job 31:35) Akin? Lapud say intalineng da et agmakapaligliwa. Agda inyansakit si Job tan agda met tinalosan so liknaan to. Anggapo so pililikna ra bilang masimpatiyan ondedengel. Balet oniay insimbawa nen apostol Pedro: “Mankakasakey komon so nonot yo, maabagey kayo komon, manaaroan kayo a singa sanaagi, masibeg tan mapaabeba ed kanonotan.” (1 Pedro 3:8) Panon tayon nipatnag so pililikna? Sakey lan paraan et say pangipatnag na panangiyansakit tayo ed liknaan na arum a too tan talosan iratan. Say masimpatiyan balikas a singa say “talagan makapadismaya itan” odino “seguro agda ka atalosan” et sakey a paraan pian nipatnag so panangiyansakit tayo. Say sakey nin paraan et say pangulit tayo ed ibabaga na too, a mangipatnag ya atalosan tayo so imbaga to. Say italineng tekep na panangaro so mankabaliksan a manimano itayon maong ya aliwa labat ed saray salita noagta ontan met ed saray agnibebesngaw a liknaan.

Si Roberta so sakey ya eksperiensyadon sigpot-panaon a ministro na saray Tasi nen Jehova. Oniay insalaysay to: “Walay panaon ya adismaya ak ed ministeryok. Kanian akitongtong ak ed ombiabiahen manangasikaso. Sikato so tinmalineng a maong tan tinalosan to so liknaan ko. Impatnag to ni ingen ya atalosan to so katatakot ko ed posiblin pankritiko to ed awawey ko. Siak so pinaseguroan na agi a natatalosan to iray liknaan ko, lapud naeksperiensya to lan mismo so naliliknak. Satan so akatulong ed siak pian makapantultuloy.”

Sarag tayo kasi so ontalineng anggano agtayo mipakna ed walan nibabaga? Sarag tayo kasin pisalamatan so sakey ta sikatayo so angibagaan toy nalilikna to? On. Panon to no say malangwer nin anak a laki so akapikolkol ed eskuelaan odino say anak a tinedyer nin marikit so sinmempet tan inkuan ton labay to lay miinaroan? Agta mas maabig no ontalineng ni so ateng insan talosan to so nononoten na kalangweran sakbay ton ipaliwawa so manepeg tan agmanepeg a walna?

“Say simbawa ed puso na too sikato so singa aralem a danum,” so inkuan na Uliran 20:5, “balet say too a makatalos sikato so naagwat to.” No say makabat tan eksperiensyadon too et agmanisimbawa no agkerewen ed sikato, nayarin nakaukolan a sikatoy pansalitaen tayo ni pian manimbawa ed sikatayo. Ontan met so kipapasen sano ontalineng itayo tekep na panangaro. Nakaukolan so pakatebek pian napansalita tayo so sakey a too. Makatulong so pantepet, balet ta nepeg itayon maalwar ed saray itepet tayo ya agla uusisaen iray pribadon pamaakaran. Nayarin makatulong so pangisuheri a say manbebesngaw et onggapo ed saray bengatlan komportable ton ibaga. Alimbawa, say asawan bii a walaay problema ed panamaley to so nainomayan a makapansalita no onggapo nin mangitongtong ed impankabat tan impankasal dan sanasawa. Say too a nagmaliw ya inaktibo ed Kristianon ministeryo so nayarin nainomayan diad pangisalaysay to ni no panon so impakaamta toy katuaan.

Ontalineng Tekep na Panangaro​—Sakey ya Angat

Sakey ya angat so italineng ed sakey a binmarong ed sikatayo lapud say natural a tendensia tayo et idepensa so inkasikatayon dili. Panon tayon arapen so ontan a mairap a kipapasen? “Say mabanayar ya ebat ipaliis to so sanok,” so kuan na Uliran 15:1. Pian makaebat itayo tekep na kaumildian, mapangasin pansalitaen ni so too insan maanos a dengelen so ibebesngaw ton sakit na linawa.

Say sangsangan so mabetbet a nagawa ed baetan na duaran too a say piulit da et say imbaga da la. Isipen na satan a duaran too ya ag-ondedengel so sakey ed sikara. Agaylan abig no ontunda so sakey ed sikara insan ontalineng a maong! Siempre, importante ya ipatnag so panagdangka tan ibalikas so dilin liknaan to ed maalwar tan maaron paraan. Ibabaga ed sikatayo na Biblia: “Say mamokpok ed saray bibil to sikato so makabat.”​—Uliran 10:19.

Aliwan natural so pakawalaan na abilidad ya ontalineng tekep na panangaro. Balet ta naaralan itan a dunong diad panamegley na panagsagpot tan disiplina. Seguradon makagunggona so pakagamor ed satan a dunong. Say idengel a maong sano mansasalita so arum et sakey a pakapatnagan na panangaro tayo. Satan so mamaliket met ed sikatayo. Agaylan makabat sirin so pamayubo tayo na dunong ed itatalineng tekep na panangaro!

[Paimano ed leksab]

[Litrato ed pahina 11]

Sano ontatalineng, nepeg tayo nin ipaliis iray dilin interes tayo

[Litrato ed pahina 12]

Sakey ya angat so italineng ed sakey ya ombabarong