“Manimano ed No Panon so Italineng Mo”

SAY panagtalineng so makanan kabiangan ed panagaral. Impluensiaan to met so paniilalo na sakey a too parad kililiktar. Sanen ipaparaan nen Jehova ya iliktar so totoo to manlapud inkaaripen ed Ehipto, inikdan toray instruksion panamegley nen Moises, ya angibaga ed saray mamasiken na Israel ed no anto so nepeg dan gawaen ta pian nilaban iray panguloan da manlapud manamatey ya anghel. (Exo. 12:21-23) Insan saray mamasiken so angipasabi ed sayan impormasyon ed kada sankaabungan. Saya so ginawa panamegley na salita. Saray totoo so nakaukolan ya ontalineng a maong. Panon so inkiwas da? Inreport na Biblia: “Ginawa na amin ya ananak na Israel so unong na ingganggan nen Jehova ed si Moises tan Aaron. Ontan so ginawa ra.” (Exo. 12:28, 50, 51, NW) Bilang nansumpalan, naeksperiensia na Israel so makapakelkelaw ya inkiliktar.

Natan, sikatayo so ipaparaan nen Jehova ed mas babaleg a kililiktar. Peteg, say instruksion ya iter to so mankaukolan na masimoon ya imano tayo. Say ontan ya instruksion so niiiter diad saray miting ed kongregasyon. Kasin sigpot kan nagugunggonaan ed ontan iran pantitipon? Mandependin tuloy ed no panon so italineng mo.

Kasin natandaan mo iray manunan punto na instruksion a niiiter diad saray miting? Kasin niyugalim, a sinimbasimba, ya anapen iray dalan pian iyaplikam ed dilin bilay mo so niiiter ya instruksion odino inabang itan ed arum?

Iparaan Mo so Pusom

Pian sigpot a nagunggonaan ed instruksion a nitatarya ed saray Kristianon pantitipon, nakaukolan tayon iparaan so kapusoan tayo. Say kaimportantian ed panggawa na ontan so nipabitar ed samay agawa legan na uley nen Arin Josafat na Juda. Makpel a tinalindegan nen Josafat so tuan panagdayew. ‘Inekal to so saray atagey a pasen tan saray Ashera a nanlapu ed Juda’ tan ginanggan toray prinsipe, Levita, tan saserdote a mangibangat ed Ganggan nen Jehova ed totoo diad amin a syudad na Juda. Siansia, “saray atagey a pasen ag-ira nakal.” (2 Awa. 17:6-9; 20:33) Say panagdayew ed saray palson dirios tan say agmanepeg a nengneng na panagdayew ed si Jehova ya inagamil ed saray paganon atagey a pasen so nigalet a maong kanian ag-iratan naandi.

Akin ya agbinmayag so epekto na instruksion ya inyareglo nen Josafat? Intuloy na kuritan: “Agmet impasen [“imparaan,” NW] na baley so saray puso ra ed Dios na saray atateng da.” Nadngel da balet ag-ira kinmiwas unong ed satan. Nayarin liknaen dan makapakesaw so pambiahe ed templo diad Jerusalem pian mangiyapay na saray bagat. Antokaman so agawa, saray kapusoan da so ag-apakiwas na pananisia.

Pian agniyanor ed saray dalan na mundo nen Satanas, nepeg tayon iparaan iray kapusoan tayo a mangawat ed instruksion ya itatarya nen Jehova natan. Panon? Sakey ya importantin dalan et diad panamegley na pikakasi. Kaukolan ya ipikasi tayo a naawat tayoy instruksion na Dios tekep na pisasalamat. (Sal. 27:4; 95:2) Saya so ontulong ed sikatayon mangapresya ed saray sagpot na agagi tayo ya, anggaman ag-ayadyari et papausar ira ed si Jehova pian ibangat so totoo to. Pakiwasen itayo na satan a misalamat ed si Jehova ya aliwan dia lambengat ed saray balon bengatla a nanaaralan tayo noagta ontan met ed pankanawnawan mamaaralem na apresasyon tayo ed saray bengatlan naaralan tayo la. Diad pilalek tayon gawaen a nagnap so linawa na Dios, ipikasi tayo: “Bangatan moak, O Jehova, nipaakar ed dalan mo. . . . Pankasakey moy pusok ya ontakot ed ngaran mo.”​—Sal. 86:11, NW.

Iyapasakey Moy Imanom

Walaray dakel a makasbel ed pantalineng tayon maong. Saray kanonotan tayo so nayarin nakulapotan na saray kapagaan. Saray ingal tan galaw ed limog na saray dumerengel odino diad paway na pantitiponan so nayarin manisturbo ed sikatayo. Say ag-inkakomportable so nayarin sengegan a nairapan itayon mangisentro ed nonot. Mabetbet a saray walaan na ankelag ya ananak et naaapag so imano ra. Anto so ontulong ed sikatayon niyapasakey so imano tayo ed programa?

Saray mata tayo so naapektoan a maong ed no iner so pangiyapasakeyan tayo ed imano tayo. Iteen iray matam ed manpapaliwawa pian natulongan kan mangisentro ed nonot mo. No sikato so mangisitas na sakey a teksto ed Biblia​—anggan samay kabisadom la​—anap mo itan, tan tumbok mo legan a babasaen to. Aglilingawen iray panlalapuan na ingal odino galaw. No saray mata so maneseksek ed nonot mo na saray makadisturbon impormasyon, dakel so nasaew mon nipaparungtal ed plataporma.

No nairapan kan mangiyapasakey ed programa lapud walay “makagonigon iran nononoten,” manpikasi ed si Jehova nipaakar ed ikalmada na nonot tan puso a nakaukolan ed panimano. (Sal. 94:19, NW; Fil. 4:6, 7) Ulit-uliten itan a gawaen no nakaukolan. (Mat. 7:7, 8) Saray miting ed kongregasyon so tarya nen Jehova. Makapanmatalek ka a labay ton nagunggonaan ka ed saratan.​—1 Juan 5:14, 15.

Ontalineng ed Saray Paliwawa

Nayarin nanonotan moray labalabay mon punto a nadngel mo ed saray paliwawa. Anggaman ontan, say italineng ed sakey a paliwawa so manasaglawi ed mas nen say basta pangolekta na saray manunan punto. Say sakey a paliwawa so singa pambiahe. Anggaman nayarin walaray makapainteres a bengatlan nanengneng ed dalan, say manunan bengatla et say sabien, say gagala. Say manpapaliwawa so nayarin mangipapaarap ed saray dumerengel ed sakey a konklusyon odino sikara so pakiwasen to.

Imanoen so impanpaliwawa nen Josue ed nasyon na Israel a nikurit ed Josue 24:1-15. Say gagala to et say pamakiwas ed totoo pian ontalindeg a malet ed tuan panagdayew diad sigpot ya isian da ed panagtalintao na kaliberliber a nasyones. Akin a satan so importantin tuloy? Say ikakasmak na palson panagdayew ed saman so mangiter na seryoson kapeligroan ed maabig a talindeg na nasyon ed si Jehova. Inmebat so totoo ed kerew nen Josue diad impangikuan da: “Arawi pa komon a manlapu ed sikami ya ikaindan mi si Jehova pian manlingkor kami ed saray arum a dirios. . . . Manlingkor kami ed Jehova.” Et ontan so ginawa ra!​—Jos. 24:16, 18, 31.

Legan ya ontatalineng ka ed sakey a paliwawa, salien mon tebeken so gagala na satan. Nonoten no panon a saray punton paleletawen na manpapaliwawa et mangitonton diad pakadampot ed satan a puntirya. Tepetan mo so inkasika ed no anto so kakaukolanen na impormasyon ed sika a gawaen.

Ontalineng Legan na Saray Diskusyon

Say Panagaral ed Panag-Bantayan, Panagaral na Libro ed Kongregasyon, tan saray kabiangan na Service Meeting so nikokondukta bilang tepet-tan-ebat iran diskusyon ed niimprintan materyal a nibase’d-Biblia.

Say italineng legan na diskusyon so, diad arum a pamaakaran, et singa pibibiang ed tongtongan. Pian sigpot a nagunggonaan, ontalineng a maong. Obserbaan so kipapaarapan na diskusyon. Imanoen no panon so pangidadanet na konduktor ed tema tan saray manunan punto. Onebat ed nonot ed saray tepet to. Ontalineng legan ya isasalaysay tan iyaaplika na arum so materyal. No talosan so impormasyon manlapud punto-de-bista na arum et nayarin mangiter ed sika na duman panmoria ed sakey a kabisadon suheto. Mibiang ed pansasalatan na saray punto-de-bista diad pangibalikas mo ed pananisiam.​—Roma 1:12.

Say panaral a masakbay ed nipabtang a materyal so ontulong ed sikan makapibiang ed diskusyon tan natumbok iray komento na arum. No mairap mon aralen a maong so materyal lapud saray sirkumstansya, nayarin ilugar mo so pigaran minuto a pamarlas ed impormasyon sakbay na miting. Say panggawa ed saya et tulongan to kan lalon nagunggonaan ed diskusyon.

Italineng Diad Saray Asamblea tan Kombension

Diad saray asamblea tan kombension, nayarin dakel iray pakadisturboan nen say diad saray miting ed kongregasyon. Lapud saya et lalon makapaangat so italineng. Anto so ontulong ed sikatayo?

Sakey ya importantin gawaen et say magenap a pampainawa ed labi. Sakbay ya onggapo so programa ed kada agew, isentro lay nonot ed tema. Imanoen so tema na kada paliwawa, tan talaranan no anto so ipresenta. Usaren mon maong so Biblia. Naiimano na dakel a totoo a say pangalay antikey iran nota ed saray manunan punto so makakatulong ed sikaran niyapasakey so kanonotan da ed programa. Isulat so instruksion a nononoten mon iyaplika ed dilin bilay mo tan ministeryom. Singbaten so pigaran punto legan a sika so manbiahen mamaarap ed pasen na pan-asambleyaan tan sano pasempet la kada agew. Ontulong iya ed sikan natandaan so impormasyon.

Ipasal Iray Anak ya Ontalineng

Nayarian na Kristianon atateng a tulongan iray anak da​—anggan saray ankekelag ni​—a magmaliw a “makabat ed kilalaban” diad pangawit ed sikara ed saray miting na kongregasyon, asamblea, tan kombension. (2 Tim. 3:15) Lapud nanduruma so inklinasyon tan karukey na panimano na ugugaw, say pakatebek so nakaukolan pian natulongan iran ontalineng a maong. Nayarin naromog mon makatulong so onggendan iran suhestion.

Diad abung, iyuksoy moy panaon para ed saray anak mon onyurong a mareen pian manbasa odino manbukay ed saray retrato ed saray Makristianon publikasyon tayo. Diad saray miting, ag-iikdan iray ugugaw na saray galaw-galaw. Singa agawa ed kadaanan ya Israel, ontan met natan a saray kalangweran so presente “pian sikara komon so ontalineng tan pian sikara komon so manaral.” (Deut. 31:12, NW) No praktikal, ikdan na arum ya atateng so ugugaw nin ananak da na personal iran kopya na saray palapagan a sisingbaten. Legan ya ombabaleg iray ananak, tulongan iran manparaan a mibiang ed saray programan walay pibiang na saray dumerengel.

Ipaparungtal na Kasulatan so maapit a siglaotan na italineng ed si Jehova tan itulok ed sikato. Saya so nanengneng ed saray salita nen Moises ed nasyon na Israel: “Impasen ko so bilay tan patey ed arap mo, say bendisyon tan ayew; et nepeg mon pilien so bilay . . . diad pangarom ed si Jehova a Dios mo, diad italineng mo ed boses to tan diad ipeket mo ed sikato.” (Deut. 30:19, 20, NW) Natan, say italineng ed itatarya nen Jehova ya instruksion tan matulok a pangiyaplika ed satan ed bilay tayo so makana diad pakagamor ed abobon na Dios tan say bendisyon a bilay ya andi-anggaan. Agaylan makana, sirin, a tuloken tayo so bilin nen Jesus: “Manimano ed no panon so italineng mo”!​—Luc. 8:18.