Magmaliw a Maong a Dumerengel
1 Kaukolan so disiplina ed pandengel a maong. Nakakaukolan met so pampilalek na dumerengel pian makaaral tan nagunggunaan manlapud dedengelen. Kanian, indanet nen Jesus so pankaukolan a “pangimano ed no panon so idengel yo.”—Luc. 8:18, NW.
2 Saya so nagkalalo lan onaplika sano onatendi itayo ed saray miting ed kongregasyon, asamblea, tan kombension. Saraya so okasyon a nepeg itayon ondengel a maong. (Heb. 2:1) Niraya so pigaran punto a makatulong ed sikayo pian magmaliw a maong a dumerengel diad sarayan Kristianon pantitipon.
◼ Apresiaen so kablian na saray miting. Saratan so manunan dalan a ditan et sikatayoy ‘ibabangat nen Jehova’ diad panamegley na “managpaga a napanmatalkan.”—Isa. 54:13; Luc. 12:42.
◼ Manparaan lan masakbay. Repasoen so materyal a singbaten, tan seguroen ya awiten so Biblia yo tan personal a kopya a panaralan.
◼ Legan na saray miting, panggunaetan so pangiyapasakey ed nonot. Nepeg a paliisan so pitongatong ed saray kaabay yo ed yurongan ontan met ya agpikunineng so gagawaen na arum ya inmatendi. Panggunaetan ya agnadisturbo ed pandedengel diad pannonot ed no antoy gawaen yo kayari na aral odino ed arum a personal iran pamaakaran.
◼ Analisaen so nipaparungtal. Tepetan so inkasikayo: ‘Panon iyan onaplika ed siak? Kapigan ko iyaplika itan?’
◼ Antikey ya inota iray manunan punto tan saray teksto. Ontulong iya pian niyapasakey yoy nonot yo ed walan sisingbaten tan natandaan yo iray manunan punto a nausar ed saginonor.
3 Bangatan ya Ondengel Iray Ananak Yo: Kaukolan na ananak so espiritual a panamilin. (Deut. 31:12) Nensaman “amin ya akayari ya ondengel” ed limog na totoo na Dios so kaukolan ya ondengel a maong legan ya ibabasa ed sikara so Ganggan. (Neh. 8:1-3) No ontatalineng iray atateng ed saray miting tan maniimanon maong, onalig met iray ananak da. Aliwan makabat so pangawit na saray ay-ayam odino kokoloran iran libro a pan-abalaan na ugugaw. Saray agkapilitan ya iyakar ed banyo so mangamper met ed idengel da. Lapud “say inkaatiw nisinger ed puso na ugaw,” kaukolan a masimoon a panggunaetan na atateng a seguroen a saray ananak da et mansiansian akayurong tan ondengel ed saray miting.—Uli. 22:15.
4 Diad pagmaliw a maong a dumerengel, papaneknekan tayo a sikatayoy peteg a makabat tan labay tayoy “makala na nagkalalon panamilin.”—Uli. 1:5, NW.