“Ontalineng tan Onggamor na Dakel nin Bilin”
1 Say libro na Uliran so mangipapatnag na kakabatan a singa mangikekelyaw: “Denglen yo, ta mansalita ak na manunaan a bengabengatla; tan say panlukas na saray bibil ko sikato naani maptek a bengabengatla. Say pananimbawa sikato so kien ko, tan aralem a pikakabat. . . . Dengelen yoak; ta bendito so saray manonton ed saray dalan ko. Ta anggan siopa a makaromog ed siak naromog to so bilay, tan makagamor na pamalangkap nen Jehova.” (Uli. 8:6, 14, 32, 35) Saratan a salita so manideskribin maong ed bilin ya akatarya parad sikatayo diad “Manangibangat na Salitay Dios” a Distriton Kombension.
2 Saray pankaukolan ed sankamundoan ya impanaagi so naanalisa la, tan say programa ed kombension so niparaan la pian ipasabi iratan a pankaukolan. Say espiritual a bilin tan praktikal iran suhestion ya iyopresi, no niyaplika, so ontulong ed sikatayon magmaliw a maliket, pian namantini so maong a relasyon ed si Jehova, tan pian mansiansia ed dalan a mamaarap ed andi-anggaan a bilay. On, walaan itayo na maabig a rason pian “ontalineng tan onggamor na dakel nin bilin.”—Uli. 1:5, NW.
3 Sakbay na Programa: Pian sigpot a nagunggonaan manlapud nipaparungtal, kaukolan ya akayurong itayo la tan kaukolan a walaan itayo na preskon nonot sano onggapo lay programa. Saya so mankakaukolan na maabig a personal a panangorganisa. Say manunan kaukolan et say masakbay a pamparaan. Masakbay lan onugip ed labi antis to. Sakbayan so ibangon pian malaem so oras a pamparaan na saray kaiba yo tan pian makapan-almusal ni. Onsabin masakbay diad pankombensionan ta pian makalira kayo ed yurongan tan naasikaso iray nakaukolan a bengatla sakbay ya onggapo so programa.
4 Lapud say manunan gagala ed pantitipon et say pangidayew ed si Jehova “ed saray muyong,” kada sesyon so nepeg a lukasan diad paraan a mangitandoro ed Dios tayo. (Sal. 26:12) Tekep na satan a gagala, amin so napapaseseg ya onyurong la sakbay ya iyanunsio so panlukas a kanta. Saya so mitunosan ed Makasulatan a simbawa: “Nagawa komon so sarayan amin ed kasimpitan tan mauksoy.” (1 Cor. 14:40) Antoy kabaliksan na satan ed balang sakey ed sikatayo? Sano nanengneng yo lay tsirman ya akayurong la ed plataporma kaleganay manangigapon musika, onlira kayo lan tampol ed yurongan yo. Saya so ontulong ed sikayon sigpot-puson makapibiang ed kanta a mangilukas ed kada sesyon, a mangitandoro na panangidayew tayo ed si Jehova.—Sal. 149:1.
5 Legan na Programa: Si Esdras et “impasen to so puso to a mananap na tunong nen Jehova, tan manumpal ed sikato.” (Esd. 7:10) Panon tayon niparaan so kapusoan tayo ed pangawat na bilin ya itatarya nen Jehova? Diad panrepaso yo ed saray titulo na nanduruman parte a nilista ed niimprintan programa, tepetan yoy inkasikayo, ‘Antoy ibabaga nen Jehova ed siak diad panamegley na sayan programa? Panon kon niyaplika so impormasyon pian nagunggonaan ak tan say pamilyak?’ (Isa. 30:21; Efe. 5:17) Itultuloy ya itepet iratan a tepet diad interon kombension. Inota iray punto a plano yon iyaplika. Mangigana na panaon pian singbaten iratan diad sampot na kada sesyon ed agew. Saya so ontulong ed sikayo pian natandaan tan niyaplika yo so impormasyon.
6 Say pangiyapasakey na nonot ed pigaran oras so makapaangat. Antoy makatulong ed sikatayo pian naresistian so tendensian nisuawi so kanonotan tayo? Anamoten so pakayari na mata. Kaslakan, say pangisentroan tayoy mata tayo so mangalay imano tayo. (Mat. 6:22) Sirin, resistian yoy onlingaw ed kada narengel yon ingal odino onggalaw. Pansiansia yoy mata yo ya akasentro ed manpapaliwawa. Itumbok yoy pambasa ed dilin Biblia yo sano walay basaen a teksto, tan pansiansia yon akalukas so Biblia yo legan a sisingbaten so teksto.
7 Pakiwasen itayo na Kristianon panangaro pian paliisan so pakadisturbo ed arum kaleganan na programa. (1 Cor. 13:5) Saya so ‘panaon na pandeen’ tan italineng. (Ecl. 3:7) Sirin, paliisan so agnakaukolan a pantotongtong tan iyalis-alis. Iplano lan unona so agmabetbet ya iyakar ed kasilyas. Agmamangan odino uniinum anggad niganan oras, likud no nalalanor iray seryoson problema ed bunigas. Saraman so mangawit na saray cellular phone, pager, camcorder, tan kamera so agnepeg a mangusar ed saraya diad paraan a makadisturbo ed arum. Saray atateng so nepeg a mangiyuksoy ed interon pamilya ra—pati saray tin-edyer—ya onyurong a mankakaabay ta pian naasikaso ray ananak da.—Uli. 29:15.
8 Nen katantaon, onia so inkuan na sakey a matatken ya onaatendi ed saray kombension ed dakel lan dekada: “Aliknak a matalonggaring iyan kombension ed sakey nin rason. Amin lawari ed ondedengel so mangaalay nota, pati ugugaw. Makapaliket so pakaimano ed satan. Saray Biblia so nausar a maong sano kerewen na saray espiker ed sikara ya ilukas ed nibagan teksto.” Talagan nakomendaan so ontan ya atentibon itatalineng. Aglabat itan mangitarok na saray gunggona ed sikatayo tan ed kapara tayo iran delegado ed kombension noagta nagkalalo ed amin et mangigloria itan ed Engranden Instruktor tayo, si Jehova a Dios.—Isa. 30:20.