Manimano ed Saray Sagradon Panangiyabawag
1 Aliwan amin ya ibaga na too so makanepegan na nikaduman imano. Balet sano mansasalita so Dios, walay makanan rason a dengelen. (Deut. 28;1, 2) Misasalamat itayo ta inrekord na apuyanan a lalaki ‘iray sagradon panangiyabawag na Dios’ parad kagunggunaan tayo. (Roma 3:2, NW) Say onsasabin distriton kombension so mangiter na mablin pankanawnawa pian narengel irayan panangiyabawag leleg a saratan so babasaen tan sisingbaten. Panon kayon nagkalalo lan maimano?
2 Onsabin Masakbay Kada Kabuasan: Isipen pay liket na saray Israelita sanen nibaga ed sikaran onarap ed si Jehova diad Palandey Sinai pian dengelen so Ganggan to! (Exo. 19:10, 11, 16-19) No ontan met so awawey yo nipaakar ed pangawat na bilin nen Jehova diad distriton kombension, iyuksoy yoy onsabin masakbay kada agew. Agtayo narengel so intiron programa no onsabi tayon atrasado insan nadisturbo tayoy arum diad panaanap tayoy yurongan.
3 Walaray onsabin masakbay balet ta agni akayurong no onggapo lay sesyon. Akin kasi? Alagaren da ni pangigapo na tsirman ed manangilukas a kansion sakbay iran ontundan mitongtong ed saray kakaaro ra insan ira onla ed yurongan da. Nepeg tayon imanoen a pigara nin minuto sakbay na igapoy manangilukas a kansion na kada sesyon et onyurong lay tsirman ed plataporma leleg a nipapatogtog so manangigapo a musika nipaakar ed Panarian. Saya so panandaan tayo ya oras lay iyurong tayo! Insan, sano nibaga la so manangilukas a kansion, akaparaan tayo lan miulop ed panganta na panangidayew ed si Jehova.
4 Ondengel Bilang Nankasakey a Pamilya: Sano nibasa iray sagradon panangiyabawag ed atiptipon iran Israelita, saray pamilya, kaiba la ‘iray angkelag,’ so kaukolan ya ondengel tan manaral. (Deut. 31:12) Diad saray kombension tayo, nepeg ya ‘agnapaulyan’ iray ugugaw. (Uli. 29:15) Sikayon atateng, panaabayen yoy intiron pamilya yo—pati saray tin-edyer. Walaray atateng ya alagaren da ni so manangilukas a kansion insan da iyakar ed kasilyas so ananak da. Balet, no ontan et mairap a nibangat so ugugaw ed kaimportantian na saray kansion tan pikakasi ed panagdayew tayo. Agaylan magmaong so iyakar ed kasilyas sakbay ya onggapo so kada sesyon no nayadyari!
5 Natulongan itayon ondengel no magenap so ugip tayo ed labi tan agkapapesel ed agew. Dengelen a maong so ibabaga na manpapaliwawa. Agyo panteyengteyengen so kanonotan yo. Miulop ed pambasa sano basaen iray teksto ed Biblia. Mansulat na antikey iran nota. Kada nasumpal so paliwawa, nonoten yo no antoy imbaga na manpapaliwawa, tan molimolien no panon yon iyaplika so materyal. Diad labi, singbaten so programa bilang pamilya. Antoran punto so nanggayagaan na balang sakey? Panoy maabig a pangusar na pamilya yo ed sayan impormasyon?
6 Respetoen so Salitay Dios: Saray kombension so mangiter ed sikatayo na maabig a pankanawnawan makapitongtong ed kakaaro tan panggayagaay makapabiskeg a panlilimog. No onsabin masakbay, malaem so panaon tayon makapitongtong sakbay ya onggapoy programa. Balet, walaray mitotongtong legan na programa, ya isipen dan agtanton makadisturbo itan diad baleg ya auditoryum. Anggan baleg so pakakagawaan na pantitipon, panaon itan na idengel a singano iyaatendi ed miting diad Kingdom Hall. Agnaabuloyan so pangusar na saray cellular phone, pager, camcorder, tan kamera a sengeg na pakadisturboan legan na programa.
7 Leleg ya aawaten nen Moises so Ganggan a manlapud si Jehova, “agto angan na tinapay nisay inminum na danum.” (Exo. 34:28) Mipadpara, agmatukoy so pangan odino iyinum legay sesyon na kombension. No agmet kapilitan lapud pankaukolay bunigas, alagaren so “aturon panaon” parad saya.—Ecl. 3:1, NW.
8 Diad arum a kombension, akarakar ni so dakel ya agagi tan anggan saray ugugaw diad saray dadalanan legan na sesyon. Nabilin iray attendant ya ibaga ra ed saratan ya ompawil ira ed yurongan da. Saray boluntaryo a mankikimey ed nanduruman departamento so nepeg ya akayurong la no asumpal lay kimey da. No agmet nipabtang ed saray boluntaryo so makanan kimey legan na sesyon, kaukolan ya akayurong ira, ya ondedengel ed programa. Ag-ira komon mansiasiansia ed departamento ra, a mantotongtong legan na programa.
9 Ag-itayo komon magmaliw a ‘matewet ed panagdengel tayo’ sano ontatalineng ed Salitay Dios. (Heb. 5:11) Determinado tayo komon ya ipanengneng so respeto diad idengel tayon maong leleg a nasisingbat iray sagradon panangiyabawag nen Jehova diad onsasabin distriton kombension tayo.