‘Tiponen Iray Totoo’
1. Anto ray piparaan na saray regional a kombension ed importantin pantitipon na saray Israelita ag-abayag kayari impaway dad Ehipto?
1 Ag-abayag kayari impaway dad Ehipto, ingganggan nen Jehova si Moises ya ‘tiponen iray totoo’ diad Palandey Sinai pian ondengel ed saray salita To, diad ontan et ontakot irad Sikato tan nibangat da ray anak da. (Deu. 4:10-13, NW) Diad onsublay iran bulan, mantitipon iray totoo nen Jehova diad regional a kombension pian paibangat ed si Jehova. Antoy nepeg tayon gawaen pian talagan minabang tayo?
2. Anto ray nepeg tayon gawaen pian ‘makapanparaan’ parad kombension tayo?
2 “Manparaan”: Ingganggan nen Jehova ed saray Israelita ya “manparaan” parad satan ya importantin pantitipon diad Palandey Sinai. (Exo. 19:10, 11) Mipadpara, kaukolan ya manparaan a maong iray onatendi. Singa bilang, dakel so kaukolan day manpatanir ed saray pantratrabahoan da. Ompan miparay situasyon mo ed si Nehemias. Labay ton taynanan a maganoy trabaho to bilang managserbi na iinumen nen Arin Artaxerxes pian onlad Jerusalem, balet amta ton nayarin ag-onabuloy so ari. Nampikasi si Nehemias tan makpel ton imbaga so kerew to. Sikatoy inabuloyan na ari tan sinuportaan to ni ingen so impanbiahe to! (Neh. 2:1-9) Sakey ni, sinegurado yo la kasi luganan tan pampundoan yo? Iplano so isabin masakbay ed kada sesyon, tan manparaan ya ‘mangimano a nagkalalo’ ed saray narengelan yo.—Heb. 2:1.
3. Antoy makatulong ed sikatayo pian niparaan tayoy puso tayo parad programa?
3 Sakey nin importantin kabiangan ed pagmaliw ya akaparaan et say pangiparaan ed puso tayo pian makapandengel tan makaaral itayo. (Esd. 7:10) Say programa na kombension et masakbay lan i-post diad Website ya jw.org/pag tan akalista iray tema na amin a paliwawa ya kada sakey ed saratan et walay sakey odino duaran teksto. Marakep irayan pantongtongan ed Panagdayew na Pamilya tayo diad saray simba antis na eskedyul na kombension tayo.
4. Panon ya ibangat na saray ateng iray anak da panamegley na kombension?
4 ‘Ibangat Iray Anak Yo’: Say sakey ya gagala na pantitipon diad Palandey Sinai et pian saray Israelitan ateng et ‘nibangat da iray anak da.’ (Deu. 4:10) Marakep ya pankanawnawa so regional a kombension pian gawaen met itan na saray ateng. Nepeg a payurongen na saray ateng ed abay da iray anak da legan na sesyon tan tulongan da ran ontalineng. Kayari na kada agew na kombension tan legan na panagdayew na pamilya, nayarin pantongtongan na saray pamilya so programa.
5. Panon tayon nagunggonaan ed iyatendi tayod manasingger ya regional a kombension?
5 Diad taloran agew na kombension, makapaway tayod maruksan mundo nen Satanas, narepreskoan itayod espiritual, tan napanggayagaan tayoy makapaseseg a panlilimog diad espiritual a paraiso tayo. (Isa. 35:7-9) Lapud manasingger lay agew nen Jehova, komon ta agtayo papaulyanan so pankanawnawa tayon makapantitipon pian makapanpapasesegan!—Heb. 10:24, 25.