Pantitipon Pian Idayew si Jehova
1. Anto so tema na kombension, tan akin a si Jehova so makanepegan na dayew tayo?
1 Si Jehova so sankamakapanyarian ed amin, agnarandan ed kakabatan, naspot ed inkahustisya, tan personipikasyon na aro. Bilang Manamalsa, Manangiter-Bilay, tan Soberano ed Uniberso, sikato labat so makanepegan na panagdayew tayo. (Sal. 36:9; Apoc. 4:11; 15:3, 4) Say “Igloria so Dios” a Distriton Kombension ed sayan taon so mamaelet na determinasyon tayon mangidayew ed sikato bilang say saksakey a tuan Dios.—Sal. 86:8-10.
2, 3. Panon ya ontulong ed sikatayo so maabig a panagplano pian sigpot itayon nagunggonaan?
2 Nakaukolan so Maabig a Panagplano: Pian sigpot itayon nagunggonaan ed daakan ya espiritual a tarya nen Jehova, importante so maabig a panagplano. (Efe. 5:15, 16) Kasin ayari yo lan niyuksoy so pampundoan yo, transportasyon, tan ikerew na bakasyon ed trabaho odino ed eskuelaan? Ag-ipapaleen irayan importantin bengatla. No naatrasado kayo ed ikerew na bakasyon, nayarin nasaew yo so kabiangan na sayan maliket ya okasyon. Amin tayo so kaukolan a presente ed kada sesyon.
3 Gawa yon kalat so isabin masakbay diad pankombensionan ed kada agew. Diad ontan et makalira kayo la ed yurongan yo antis ya onggapoy panlukas a kanta tan ontulong ed sikayon nawalaan na preskon nonot a mangawat ed instruksion a nipaparungtal. Onggapo so programa ed 8:30 na kabuasan ed Biernes tan Sabado, tan 9:00 na kabuasan ed Simba. Ipangasin agmangirereserba na saray yurongan no aliwan parad saray kapamilya yo odino kaiba yo ed luluganan.
4. Akin a kekerewen ed sikatayon amin a manbalon la na pangugtoan diad kombension?
4 Nakerew ed amin a manbalon la na pangugtoan imbes ya ontaynan ni ed pankombensionan ed oras na panangugto. Say pikoopera yo ed sayan uksoyan so ontulong ed kiwala na mareen a kaliberliber tan mangiter na dakel ya oras parad pilimog ed saray kapananisiaan. (Sal. 133:1-3) Ipangasin tandaan ya agnaabuloyan iray nabetag a pananginan tan de-alkohol iran iinumen diad saray pasilidad na kombension.
5. Panon tayon nigapon iparaan so kapusoan tayo parad kombension?
5 Ontalineng tan Manaral: Masimoon ya imparaan nen Esdras so puso to ed pangawat na salitay Dios. (Esd. 7:10) Inkiling toy puso to ed saray bangat nen Jehova. (Uli. 2:2) Nigapo tayon iparaan so kapusoan tayo parad kombension anggan sano antis itayon onsipot ed abung diad pandalepdep la ed tema na kombension tan itongtong itan ed pamilya tayo.
6. Anto so makatulong ed sikatayo a napansiansia so pangiyapasakey tayoy nonot tayo ed programa? (Nengnengen so kahon.)
6 Diad baleg ya auditoryum, walaray dakel a nenengnengen tan narengel a mangibalang na imano tayo. Saratan a pakadisturboan so mainomay a mangisuawi na itatalineng tayo ed espiker. No ontan so nagawa, nasaew tayo so makanan impormasyon. Saray suhestion a naromog ed akatekep a kahon so makatulong ed sikatayo pian napaaligwas tayoy pangiyapasakey ed nonot tayo.
7, 8. Panon tayon nipanengneng so konsiderasyon ed arum?
7 Ipatnag so Konsiderasyon ed Arum: Saray kamera tan camcorder so nayarin usaren legan na programa, balet pian napaliisan so pakadisturbo ed arum, usaren labat itan ya agkayo onaalis ed yurongan yo. Nepeg ya agmakadisturbo ed arum iray cell phone tan pager. Anggapoy personal a kagawaan ya ikonekta ed saray elektrikal odino sound system na pankombensionan.
8 Seguradon tatalaranan tayo so pantitipon pian idayew si Jehova! Komon ta determinado itayon mangigloria ed sikato diad iyatendi ed amin a sesyon, diad italineng a maong, tan diad pangiyaplika ed naaralan tayo.—Deut. 31:12.
[Kahon ed pahina 3]
Ontalineng Diad Saray Kombension
▪ Molimolien iray tema na paliwawa
▪ Anapen iray teksto
▪ Mangala na antikey iran nota
▪ Tandaan iray punto ya iyaplika
▪ Repasoen so naaralan yo