‘Manbabansag Itayon Mangiyabalbaleg ed Ngaran To’
1. Anto so walan pankanawnawa tayo a mankakasakey a mangitandoro ed ngaran na Dios, tan anto lay nagawaan tayo natan bilang pamparaan?
1 “O yabalbaleg tayo si Jehova, tan bansagan yo ak a mangiyabalbaleg ed ngaran to,” so inkanta na salmista. (Sal. 34:3) Say magano lan nagawa a “Manakar a Kaibay Dios” a Distriton Kombension tayo so pankanawnawa tayon mangiyabalbaleg odino mangitandoro ed ngaran nen Jehova kaiba iray agagi tayo manlapud dakel a kongregasyon. Kasin inyuksoy yo la so pampundoan, luganan, tan pambakasyon yo ed trabaho? Maabig no masakbay tayo lan asikasoen iraya.—Uli. 21:5.
2. Akin a makagunggona so planon masakbay ya isabi ed pankombensionan?
2 Isabi ed Pankombensionan: Ontulong ed sikatayo so masakbay lan isipot pian nalugaran iray ag-iilaloan a pakaabalaan tan makalira itayo la ed yurongan ed dugan oras pian impapuson makapibiang ed manangilukas a kanta tan pikakasi. (Sal. 69:30) Pigaran minuto antis ya onggapo so sesyon, say tsirman so onyurong ed plataporma legan a patotogtogen so manangilukas a musika ed Panarian. Nepeg ya amin tayo so akayurong la ed satan a bekta pian mauksoy so kigapo na programa.—1 Cor. 14:33, 40.
3. Panon tayon nipanengneng so konsiderasyon ed arum sano manaanap na panyurongan?
3 Sisimbawaen itayo na Salitay Dios ya ‘amin a gawaen tayo et nagawa komon dia ed aro.’ (1 Cor. 16:14) Sano onsabi itayo ed pankombensionan, say konsiderasyon ed arum so mamuger ed sikatayon manbagtik, manapura, odino mantutulakan pian makauna ed saray labay tayon yurongan. Saray yurongan so nayarin ireserba labat parad saraman so kaiba yon nambiahe odino kapamilya yo.—1 Cor. 13:5; Fil. 2:4.
4. Antoray uksoyan ed oras na panangugto, tan panon iyan makagunggona?
4 Ipangasin manbalon lay pangugtoan imbes ya ontaynan ni ed pankokombesionan pian manaliw ed oras na panangugto. Pankanawnawa iya na amin a napanggayagaan so makapabiskeg a panlilimog tan presente ed kagapo na sesyon ed ngarem. No nakaukolan, mangawit na melag labat a balonan a nayarin isilong ed yurongan. Agnaabuloyan iray angkakabaleg a balonan, nabetag iran pananginan, tan de-alkohol iran iinumen diad pasilidad na kombension.
5. Panon itayon ‘makapanggawa na maabig’ ed saray maedad la tan mabeblay?
5 Diad saray kombension tayo et walaray ingganan yurongan parad saray maedad la tan mabeblay. Pinanonotan nen apostol Pablo iray kongregasyon ed Galacia a “manggawa . . . na maabig ed saray amin, nagkalalo ed saray kaamong [da ed] pananisia.” (Gal. 6:10) Nayarin ag-onkerew na tulong ed sikayo iray maedad la odino mabeblay ya agagi, mansusulon atateng, odino saramay manlilingkor a sigpot panaon, balet nayarin walaray kairapan a nepeg dan talonaan pian makaatendi ed kombension. Sarag yo kasi so ‘manggawa na maabig’ tan ontulong ed sikara?
6. Panon tayon niparaan so kapusoan tayo ed instruksion a naawat tayo?
6 Manatalaran ed Sikatayo so Espiritual a Ponsia: Si Arin Josafat so ‘angipasen [odino angiparaan] ed puso to a mananap ed Dios.’ (2 Awa. 19:3) Panon tayon niparaan so puso tayo antis na kombension? Saray artikulo ed unor a pahina na Mayo 22 tan Hunyo 8 iran isyu na Awake! so angiparungtal lan unona ed saray itarya ya espiritual a ponsia. Akin ya ag-ipanaon so pandalepdep ed sarayan artikulo, a pitamitam so itarya nen Jehova parad sikatayo? Kabiangan met ed panangiparaan ed puso tayo so ikerew ed si Jehova na tulong a natalosan so punto na instruksion a naawat tayo tan niyaplika itan.—Sal. 25:4, 5.
7. Anto so kaliktan tayo, tan akin?
7 Kaliktan tayon amin so nagkalalon pakaaral ed Salita na Dios, ta amta tayon diad panamegley na satan et ombulaslas itayon mamaarap ed kilalaban. (1 Ped. 2:2) Kanian, onatendi itayo ed “Manakar a Kaibay Dios” a Distriton Kombension tayo tan ‘manbabansag itayon mangiyabalbaleg ed ngaran nen Jehova.’—Sal. 34:3.
[Kahon ed pahina 3]
Saray Paraan Pian Nitandoro so Ngaran na Dios
◼ Manplanon masakbay
◼ Ipatnag so panangaro ed arum
◼ Iparaan so puso yo