Saray Anghel—No Siopa Ira

SAY ari na mabiskeg ya empiryo so agmakapanisia ed anengneng to. Say taloran lalaki a senentensiaan ya ompatey ed manliob ya apoy so niliktar ed makapataktakot ya ipapatey! Siopa so angiliktar ed sikara? Oniay imbaga na mismon ari ed taloran lalaki a niliktar ed ontan a paraan: “Bendito so [Dios yo], ya angibaki na anghel to, tan inlaban to so saray ariripen to a nanmatalek ed sikato.” (Daniel 3:28) Sayan manuley ed Babilonia diad apalabas lan masulok a duan libon taon so akaimaton ed satan ya impangiliktar na anghel. Minilyon a totoo nensaman so anisia ed saray anghel. Balet natan et dakel so aglabat manisia a wala iray anghel noagta ipapasen da met ya anggan panon et naiimpluensyaan na saray anghel so mismon bilay da. Siopa iray anghel, tan panon so inkiwala ra?

Unong ed Biblia, saray anghel et espiritu, no panon a say Dios a mismo et sakey ya Espiritu. (Salmo 104:4; Juan :24) Baleg a pamilya iray anghel, a minilyon so bilang da. (Apocalipsis 5:11) Tan amin da so “mabiskeg tan makapanyari.” (Salmo 103:20, Maung a Balita) Anggaman walaan ira na personalidad tan pakayarin manpili a singa saray totoo, aliwa iran datin totoo a nagmaliw ya anghel. Diad tua et abayag lan pinalsa na Dios iray anghel sakbay ton pinalsa so katooan​—a sakbay ni ingen na impamalsa to ed planetan Dalin. Sanen ‘inletneg na Dios so dalin,’ so ibabaga na Biblia, “saray bitewen ed kabuasan [saray anghel] nankanta ra a bansag, tan amin iray anak na Dios inmeyag ira lapu ed liket.” (Job 38:4, 7) Lapud pinalsa na Dios iray anghel, sikaray tatawagen ya ananak na Dios.

Anto so gagala na Dios ed impamalsa to ed saray anghel? Anto so agawaan da, no wala man bilang, ed awaran na too? Wala kasi so nagawaan da ed bilay tayo natan? Lapud sikaray makapandesisyon a bukor base ed saray totontonen ed moral, kasin wala iray anghel a tinmumbok ed si Satanas a Diablo tan pinagmaliw day inkasikara a kakabusol na Dios? Mangitatarya so Biblia na napanmatalkan iran ebat ed sarayan tepet.