Pakatalos ed Biblia—Makapaliket a Pankanawnawan Lukas ed Sikayo
KARGA na Biblia iray mabmablin katuaan manlapud Dios. Ipapaamta na satan ed sikatayo so gagala na bilay, say sengegan na paniirap na too, tan say arapen na katooan. Ibabangat itayo na satan no panon a naromog so liket, no panon so pikaaro, tan no panon a nasolbar iray problema. Sankaimportantian ed amin, naaral tayo ed satan so nipaakar ed Manamalsa tan Ama tayo a walad tawen, si Jehova. Satan a kakabatan so mamaliket ed sikatayo tan mangiter na gagala ed bilabilay tayo.
Say pangala na kakabatan ed Dios so inyaliling na Biblia dia ed pangan. Inkuan nen Jesus: “Aliwa a say tinapay labat so napambilay na too noag say amin a salitan ombesngaw ed sangi’ Dios.” (Mateo 4:4; Hebreos 5:12-14) No panon a nakaukolan so inagew-agew a pangan na masustansian tagano pian mantultuloy itayon manbilay, nakaukolan tayo met so regular a pambasa ed Salita na Dios pian minabang ed insipan na Dios ya andi-anggaan a bilay.
Labalabay tayoy mangan lapud ontan so inkapalsa tayo tan lapud pepeneken na satan so manunan nakaukolan tayo. Balet, wala ni sananey a manunan nakaukolan tayo a nepeg tayon peneken no labay tayoy magmaliw a maliket. Inkuan nen Jesus: “Maliket iray mamidbir na pankaukolan da’d maespiritu ran bengatla.” (Mateo 5:3, Maung a Balita) Posible so pakapanliket lapud satan a pankaukolan et nayarin peneken panamegley na pantalos ed Salita na Dios.
Tua, nairapan so arum a mantalos ed Biblia. Alimbawa, nayarin kaukolan yoy tulong ed saray tekston manutukoy ed aliwan pamilyar a kustombre odino tekston manguusar na piguratibo iran pananalita. Niarum ni, wadtan iray propesiya a say inkisulat da et simboliko, a natalosan labat diad pangonsulta ed arum iran teksto ed Biblia a manisingbat ed satan a tema. (Daniel 7:1-7; Apocalipsis 13:1, 2) Anggaman ontan, nayarian yon talosan so Biblia. Panon yon naseseguro itan?
Makapaliket a Pankanawnawan Lukas ed Amin
Say Biblia et Salita na Dios. Diad satan et imbalikas na Dios so linawa to ed sikatayo. Kasin itarya na Dios so sakey a libron agbalot natalosan odino natalosan labat na totoon walaay atagey ya aral? Andi, aliwan ontan si Jehova. Oniay inkuan nen Kristo Jesus: “Siopa ed sikayo so ama sano say anak to onkerew ed sikato na tinapay, et sikato so ikdan to na sakey a bato? Ono sira, et sikato so mangiter na sakey ya uleg a panagkasira? Ono sikatoy onkerew na sakey ya iknol, iter to ed sikato so sakey ya alakdan? No sikayo sirin, anta mauges kayo, amta yo so mangiter na saray maong a panangaro ed saray anak yo agkasi nagkalalo a say Ama yo a mangatatawen mangiter na espiritu santo ed saray onkerew ed sikato?” (Lucas 11:11-13) Kanian, seguradon natalosan yo so Biblia tan no masimoon kayon onkerew ed Dios, iter to so tulong a nakaukolan yo pian natalosan so Salita to. Diad tua, anggan saray ugugaw et natalosan da iray manunan bangat na Biblia!—2 Timoteo 3:15.
Anggaman kaukolan so pansagpot pian natalosan so Biblia, say panggawa ed satan so walaan na mabiskeg tan makapaseseg ya epekto ed sikatayo. Kayari inkioli nen Jesus, sikatoy pinmatnag ed duaran babangatan to tan kinatongtong to ra nipaakar ed saray propesiya na Biblia. Oniay inkuan na salaysay nen Lucas: “Nanlapu ed Moises tan manlapu ed saray amin a propetas impaliwawa to ed sikara dia ed saray amin a sulat so saray bengatla nipaakar ed sikato lanlamang.” Anto so resulta? Diad saman a labi, legan dan momolimolien so naaralan da, inkuan na babangatan ed sakey tan sakey: “Agta dinmalang so puso ta ed loob ta, legan a nansalita ed sikata ed dalan sanen nilukasan to ed sikata so saray sulsulat?” (Lucas 24:13-32) Aliketan ira diad impakatalos da ed Salita na Dios lapud pinabiskeg na satan so pananisia ra ed saray sipan na Dios tan nagmaliw a positibo so panmoria ra ed arapen.
Imbes a pabelat, say pakatalos ed Salita na Dios et makapainteres tan makagunggona, a singa kasamit na pangan ed makapenek a tagano. Antoy kaukolan yon gawaen pian nawalaan na ontan a pakatalos? Ipanengneng na onsublay ya artikulo no panon yon napanggayagaan so “[mismon] pikakabat ed Dios.”—Uliran 2:1-5.
[Litrato ed pahina 4]
Mipara ed sakey a maaron ama, iiter nen Jehova so masanton espiritu pian tulongan itayon natalosan so Biblia