Say Gayaga To et Walad Ganggan nen Jehova

SI Albert D. Schroeder, sakey a membro na Mananguley ya Ulop na saray Tasi nen Jehova, et anampot la so bilay to diad dalin nen Mierkoles, Marso 8, 2006. Sikato so 94 años tan masulok a 73 taon so inusar to ed sigpot-panon a ministeryo.

Nianak si Brother Schroeder diad Saginaw, Michigan, E.U.A., nen 1911.a Bilang sakey ya ugaw, dakel so naaralan to ed Biblia manlapud bai to ed ina, ya angipurek met ed sikato na panamabli ed pambasa ed Salita nen Jehova. Sikato so nanaral na Latin, Aleman, tan electrical engineering ed University of Michigan. Balet, legan ya onaaralem so apresasyon to ed Kasulatan, intunda to so paneeskuela to pian onloob ed sigpot-panon a panangipulong ed Panarian. Nen 1932 et sikato so nagmaliw a membro na pamilyan Bethel diad Brooklyn, New York.

Nen 1937, diad edad a 26, si Brother Schroeder so aturo a mangimaton ed kimey na saray Tasi nen Jehova diad Britanya. Lapud seseg to ed panagpulong a kimey, dakel diman so apaseseg ya onloob met ed sigpot-panaon a serbisyo. Akaiba to diad London Bethel so sakey a kalangweran a si John E. Barr. Diad saginonor et sikaran dua so nanlingkor ed loob na dakel a taon bilang membro na Mananguley ya Ulop.

Say kimey nen Brother Schroeder diad biang na saray Tasi nen Jehova so naimano legan na saray taon na bakal. Nen Agosto 1942 sikato so pinatakyas manlapud Britanya. Kayari na makapakebbiew ya impanbaroy to ed Dayat na Atlantiko legan na guerra, sikato so akapawil ed Brooklyn nen Setyembre.

Diad saman a panaon et iilaloan la na saray lingkor nen Jehova a baleg a kimey so kaukolan a gawaen kayari na Guerra Mundial II. Asurprisa si Brother Schroeder tan maliket ton inawat so tinmumbok ya asainmin to—ya ontulong ed panggawa na curriculum parad Watchtower Bible School of Gilead. Diad loob na dakel a taon et sikato so nanserbi bilang instruktor, a tinmulong ed kipasal na saray misionaryo. Saray klase to so panlikliketan a nanonotan na saray estudyante ya imbangat to ed Gilead ontan met ed Kingdom Ministry School diad saginonor. Nanliketan ton impaslep ed saray estudyante to so panangaro ed saray ganggan na Dios tan indanet to so kaimportantian na pakapikabat ed si Jehova.

Nen 1956, nankasal si Brother Schroeder tan si Charlotte Bowin, tan nen 1958 say anak dan si Judah Ben so nianak. Si Brother Schroeder et sakey a maong a Kristianon asawan laki tan ama. Nen 1974, sikato so ginmapon nanlingkor bilang kabiangay Mananguley ya Ulop, a ditan et naapresyan tuloy so aralem a pakatalos to. Sikato so sakey a toon mapangasi tan mapaabeba, tan nagkalalo ed amin et labalabay ton itandoro so ngaran na Dios. Matalek itayo a naawat la nen Brother Schroeder so mangatatawen a tumang to bilang alanaan a Kristiano a talagan ‘nanggayagaan to so ganggan nen Jehova.’—Salmo 1:2.

[Paimano ed leksab]