Kasin Makana ni so “Daan a Sipan”?
NEN 1786, impalapag na sakey a Pranses a doktor so libron tinawag a Traité d’anatomie et de physiologie (Diskusyon Nipaakar ed Anatomy tan Physiology). Impasen itan ed saman bilang sankasustoan a libro nipaakar ed neuroanatomy, tan mataltalag lay atilak a kopya, kanian diad agano ni et inlako itan ed masulok a 27 libon dolyar! Balet, daiset lay pasyente natan a manmatalek ed sakey a doktor a mangoopera, a manguusar ni ed satan a libro ed medisina a mantaon la na pigaran siglo. Say inkamaawaran tan inkadakep na impangisulat ed satan a libro et agla makatulong ed sakey a mansasakit a too ed panaon tayo.
Ontan met so panmoria na dakel a totoo nipaakar ed samay tatawagen a Daan a Sipan. Nanenengneng day kablian na satan ed awaran na Israel tan pandinayewan day karakep na anlong to. Ingen, panduaruwaan da no kasin makatunongan ni so panumbok ed panangiwanwan na satan a masulok lan 2,400 taon a nisulat. Balbaleg lay pandumaan na kakabatan ed siensia, komersyo, tan anggan diad bilay na pamilya natan, aliwa lan singa sanen insulat so Biblia. Oniay insulat nen Philip Yancey, datin editor na Christianity Today, ed libro ton The Bible Jesus Read: “Aliwa lan naynay a makatunongan itan, tan no bilang et wala ni makatunongan, makapasakit la itan ed liknaan na totoo natan. Lapud saraya tan arum niran rason, say Daan a Sipan, a manugyop ed taloran-kakapat na Biblia, so maslak ya agla babasaen na saray totoo.” Satan a panmoria et kaslakan la.
Anggapo ni 50 taon kayari impatey nen apostol Juan nen manga 100 C.E., inyabawag na sakey a mayaman a kalangweran a laki a manngaray Marcion a nepeg ya ipulisay na saray Kristiano so Daan a Sipan. Unong ed Ingles a historyador a si Robin Lane Fox, inkatunongan nen Marcion a “say ‘Dios’ ed Daan a Sipan et sakey a ‘panatikon barbariko’ ya angonsinti ed saray tulisan tan saray terorista a singa si Arin David na Israel. Diad pidumaan, si Kristo so angiparungtal ed superyor a Dios a sigpot a balo tan duman tuloy (manlapud Dios na Daan a Sipan).” Insulat nen Fox a sarayan sisiaen so “nagmaliw a ‘Marcionismo’ tan nantultuloy ya akasagyat na saray patumbok, nagkalalo la ed saray taga Bukig a mansasalita na Syriac, sanen komapat a siglo.” Wala niray totoon manisia ed saraya. Bilang resulta, kayari masulok a 1,600 a taon, insulat nen Philip Yancey, “say kakabatan ed Daan a Sipan so maples lan naaandi ed limog na saray Kristiano tan ngalngali la nabural ed modernon sosyedad.”
Kasin asalatan la so Daan a Sipan? Panon tayon napantunosan so pakatalos tayo ed “Jehova na saray ejercito” ed Daan a Sipan tan ed “Dios na aro tan kareenan” ed Balon Sipan? (Isaias 13:13; 2 Corinto 13:11) Makagunggona ni kasi ed sika so Daan a Sipan natan?