Koma-123 ya Impangraduar ed Gilead
Pinaseseg Iray Nangraduar ed Gilead a “Gapoan Da Lay Mankotkot”
NEN Sabado, Setyembre 8, 2007, inatendian na 6,352 ya agagi a nanlapud 41 a bansa so impangraduar na koma-123 a klase na Watchtower Bible School of Gilead. Diad alas 10 na kabuasan, saray inmatendi et inabrasa na tsirman na programa tan membro na Mananguley ya Ulop a si Anthony Morris. Kayari ton angiter na antikey ya introduksion, impakabat toy unonan manpaliwawa a si Gary Breaux, a membro na Komite na Sanga ed Estados Unidos.
Impaseguro nen Brother Breaux ed saray estudyante a parad si Jehova et marakdakep iramay manggagawa na linawa To, antokaman so indengan da. (Jer. 13:11) Pinaseseg to ira a pansiansiaen da itan a klase na karakpan. Kayari na satan, indanet nen Gerrit Lösch, membro na Mananguley ya Ulop, a duga labat so panilalon tumangan itayo nen Jehova sano manlingkor itayo ed sikato. (Heb. 11:6) Balet, nepeg a say mamakiwas ed sikatayo et say masakripisyon aro.
Kayari to, say manangasikaso na Theocratic Schools Department a si William Samuelson et amaseseg ed saray nangraduar a mansiansia iran matoor tan mapekder ed mapagalang a kimey a pangiyabawag ed manuuley lan Ari.a Imbaga to met ya ipatnag day dignidad da diad panamegley na maong iran ugali ra. Si Sam Roberson, ya ontutulong ed manangasikaso na Theocratic Schools Department et amaseseg met ed saray nangraduar a say naynay dan imanoen et say kamaongan na arum. No ontan so gawaen da, mas ‘naaro ra so impanaagi.’—1 Ped. 2:17.
Kayari na saratan a makapabiskeg a paliwawa, ininterbio na instruktor na Gilead a si Mark Noumair so pigaran nangraduar ya angisalaysay na saray eksperiensya ra ed lawak na kimeyan legan dan manaaral ed Gilead. Malinew ya alikna na saray inmatendi so panangaro na sarayan nangraduar ed ministeryo tan say pilalek dan ontulong ed arum. Insan si Kent Fischer, a manlilingkor diad Bethel Office ed Patterson, so anginterbio ed taloran membro na Komite na Sanga a nanlapud nanduruman bansa a walaray misionaryo. Lapud imbaga na sarayan napanuliranan ya agagi, matalek iray inmatendi, a maslak et atateng na saray nangraduar, a sarayan balon misionaryo so asikasoen a maong ed saray asainmin da. Diad tinmumbok a parte na programa, ininterbio nen Izak Marais, a manlilingkor ed Translation Services Department, so pigara ed saray abayag lan misionaryo. Diad saratan et naamtaan na saray nangraduar no anto iray naeksperiensya ra ed arapen.
Say tema na kapantokan a paliwawa ed satan a programa et “Kayari Yon Nadngel Iraya—Anto so Gawaen Yo?” Impaliwawa itan na sakey a membro na Mananguley ya Ulop, a si Geoffrey Jackson, a nanlingkor a misionaryo ed ngalngali 25 a taon diad Abalaten Pasipiko. Impaliwawa to so nipaakar ed sampot a kabiangan na Sermon ed Palandey. Diad satan a paliwawa, tinukoy nen Jesus so duaran lalaki, sakey a makalakal tan sakey ya agmakalakal, tan sikara so angipaalagey na abung. Imbaga nen Brother Jackson a nayarin saratan ya abung et impaalagey ed parehon pasen. Balet, samay agmakalakal a laki so angipaalagey na abung to ed kabueran, bangta samay makalakal a laki so angotkot ni anggad asabi to imay bato a pangiletnegan na pundasyon na abung to. Sanen sinmabi so maksil a bagyo, ag-aderal imay abung a nipaalagey ed bato balet samay nipaalagey ed kabueran et nagba.—Mat. 7:24-27; Luc. 6:48.
Impaliwawa nen Jesus a samay agmakalakal a laki et mipara ed saramay totoon dinmengel labat balet agda inyaplika iray imbangat to. Bangta samay makalakal a laki et singa saramay totoon dinmengel tan tinmulok ed saray imbaga nen Jesus. Imbaga nen Brother Jackson ed saray nangraduar: “Sano gawaen yo ed asainmin yo iray naaralan yo panamegley na panagaral na Biblia, magmaliw kayon singa samay laki a makalakal.” Kanian bilang konklusyon, pinaseseg to iray nangraduar a “gapoan da lay mankotkot” ed saray asainmin da bilang misionaryo.
Diad kaunoran, inawat na saray nangraduar iray diploma ra tan saray asainmin da, insan binilin ira nen Brother Morris. Pinaseseg to ira a lawas dan aligen si Jesus tan ag-ira ontundan manmatalek ed biskeg ya iiter nen Jehova. Insan la’d satan sinampotan so programa na impangraduar.
[Paimano ed leksab]
a Diad panangasikaso na Teaching Committee, say Theocratic Schools Department so mangaasikaso ed Gilead, ed eskuelaan parad saray membro na Komite na Sanga, tan ed eskuelaan parad saray ombiabiahen manangasikaso.
[Kahon ed pahina 31]
ESTATISTIKA NA KLASE
Bilang na bansa a nanlapuan: 10
Bilang na bansa ya angibakian: 24
Bilang na estudyante: 56
Aberids ya edad: 33.5
Aberids a taon ed katuaan: 17.9
Aberids a taon ed sigpot-panaon a ministeryo: 13.8
[Litrato ed pahina 32]
Koma-123 a Klase a Nangraduar ed Watchtower Bible School of Gilead
Diad listaan ed leksab, saray dasig so anumeroan ya onggapo ed arap paonla’d beneg, tan saray ngaran so akalista manlapud kawigi a manpakawanan ed kada dasig.
(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. (7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.