Mansiansia ed Panangabobon na Dios Anggaman Walaray Pananguman

WALA ta ray dadalanen mon pananguman ed bilay mo? Naiirapan ka ta’n mangawat ed saratan? Kaslakan ed sikatayo et akasali la odino makasali ni labat na ontan a situasyon. Makaaral itayo ed alimbawa na pigaran totoo nensaman pian naamtaan tayo ray kualidad a makatulong ed sikatayo.

Say sakey ya alimbawa et si David, a dakdakel so dinalan ton pananguman. Sikatoy ugaw nin managpastol sanen nilanaan nen Samuel pian magmaliw ya ari. Sanen kalangweran ni, sikatoy namboluntaryon milaban ed higanten Filisteo a si Goliat. (1 Sam. 17:26-32, 42) Sikatoy naimbitaan a manayam ed palasyo nen Arin Saul, insan tinuron magmaliw ya opisyal na saray sundalo. Ag-anggan sinmebang ed nonot nen David a nagawa ed bilay to irayan pananguman, tan agto met inilaloan so sinmusublay nin nagawa.

Adera-deral so ulopan di David tan Saul. (1 Sam. 18:8, 9; 19:9, 10) Ta pian nasalimbengan, kaukolan nen David so manamot-amot a pigay taon. Anggan sanen manaari la ed Israel, anguma-uman iray kipapasen to, lalo la nen akikalugoran. Tan pian iyamot iyan kasalanan to, nanggaway paraan pian napapatey so sakey a too. Lapud saratan a ginawa to et nantutumbokay probleman asagmak na pamilya to. Singa bilang, nanrebelde so mismon anak ton si Absalom. (2 Sam. 12:10-12; 15:1-14) Anggaman ontan, sanen nagbabawi si David ed sarayan kasalanan to, sikatoy pinerdona tan inabobonan lamet nen Jehova.

Posible met a manguman iray sirkumstansyam. Say sakit, kairapay bilay, problema’d pamilya, odino anggan say mismon ginawgawa tayo et pansengegay pananguman ed bilay. Antoran kualidad sirin so makatulong pian akaparaan tayon mangarap ed ontan iran pananguman?

Makatulong so Inkamapaabeba

Say inkamapaabeba et kabaliksan toy inkamapasakop. No talagan mapaabeba itayo, aliwan alablabas so pakanengneng tayo’d inkasikatayo tan dugay panmoria tayo’d arum. No agtayo melmelagen iray kualidad tan agawaan na arum, lalo tayo ran napabli tan saray nagagawaan da. Ontan met, ontulong so inkamapaabeba pian natalosan tayo no akin ya agawa ed sikatayo so sakey a bengatla tan no panon tayon naarap itan.

Say maong ya alimbawa ed saya et si Jonatan ya anak nen Saul. Anguman so bilay to lapud walaray agawgawan agto kontrolado. Sanen imbaga nen Samuel ed si Saul a sikatoy impulisay la nen Jehova bilang ari, ag-imbaga na sayan propeta a say onsalat ya ari et si Jonatan. (1 Sam. 15:28; 16:1, 12, 13) Imbes, say pinili na Dios ya onsublay ya ari na Israel et si David. Kanian anggan panon et apektado si Jonatan ed ag-intulok nen Saul. Anggapoy mauges a ginawa nen Jonatan, balet siansia nin aliwan sikatoy onsublay ed ama to bilang ari. (1 Sam. 20:30, 31) Antoy reaksion nen Jonatan ed saya? Nanimbel kasi ta aliwan sikatoy naikdan na pribilehyo? Angimon kasi ed si David? Andi. Anggano mas matatken ni tan mas eksperiensyado si Jonatan, matoor ton sinuportaan si David. (1 Sam. 23:16-18) Akatulong ed sikato so inkamapaabeba pian naawat to no siopan talagay pinili na Dios, tan agto ‘nanisip na alabas nen say manepeg ya isipen.’ (Roma 12:3) Atalosan nen Jonatan no antoy iilaloan nen Jehova ed sikato tan inawat toy desisyon To ed satan a pamaakaran.

Tua, kaslakan ed saray pananguman et walay katekep ton irap. Wala imay situasyon a kaukolan a pidenengan nen Jonatan so duaran toon maapit ed sikato. Say sakey et say kaaro ton si David, a pinili nen Jehova pian magmaliw ya ari. Say sakey ni et say ama ton si Saul, ya impulisay nen Jehova balet siansia nin manaari. Seguradon naapektoan a maong si Jonatan ed saya, ingen ta nanggunaetan toy mansiansia ed panangabobon nen Jehova. Nayarin manaburido odino napagaan itayo no walaray pananguman a kaukolan tayon arapen. Balet, no pansagpotan tayon talosan so panmoria nen Jehova, nitultuloy tayoy matoor a panaglingkor ed sikato legan tayon aarapen iray pananguman.

Importante so Pamidbir ed Saray Limitasyon

Importantin bidbiren na sakey a too iray limitasyon to. Duma iyan kualidad ed inkamapaabeba, ta anggaman mapaabeba so sakey a too, nayarin agto sigpot ya amta iray limitasyon to.

Amta nen David iray limitasyon to. Anggano sikatoy pinili nen Jehova a magmaliw ya ari, pigay taon nin nanalagar antis ya akapanuley. Anggapoy nabasa ed Biblia ya impaliwawa nen Jehova ed sikato no antoy rason ed saya. Anggaman singano makapadismaya iyan situasyon, agnanaburido si David. Atalosan ton iyaabuloy iya nen Jehova, tan sarag Ton imaneobra iray bengatla. Kanian, agpinatey nen David si Saul pian nisalbay bilay to, tan inamper to so kaiba ton si Abisai a mamatey ed si Saul.​—1 Sam. 26:6-9.

No maminsan, walaray situasyon ed kongregasyon tayo ya agtayo natatalosan odino diad panmoria tayo et singa aliwan sankaabigan so paraan na impangasikaso ed saratan. Kasin bidbiren tayo a si Jesus so Ulo na kongregasyon tan uusaren to ray tinuron ulop na mamatatken pian mangidaulo? Pian napansiansia tayo so abobon nen Jehova, manmatalek tayo kasi ed panangidaulo to ed kongregasyon panamegley nen Jesu-Kristo? Gawaen tayo kasi iya anggaman mairap so situasyon?

Makatulong so Kauyamoan Pian Magmaliw a Positibo

Say kauyamoan et kabaliksan toy maulimek ya awawey. Ontulong iya pian anggano asakitan itayo et siansia nin mapasensya itayo, maanos, agtampol nasyodotan, agmanimbel na sakit na linawa, tan ag-ombawi. Ingen ta aliwan mainomay a bayuboan so kauyamoan. Diad sakey a teksto ed Biblia, papasesegen so “amin a mauyamo ed dalin” a siansia nin ‘mananap ed kauyamoan.’ (Sof. 2:3) Mikonektaan so kauyamoan ed inkamapaabeba tan ed pamidbir ed saray limitasyon, balet ta laktipen to met so arum nin kualidad, a singa say kamaongan tan inkaulimek. Say toon mauyamo et napaaligwas toy espiritualidad to ta mabulos a paibangat tan paipasal.

Panon a makatulong so kauyamoan pian naarap iray pananguman ed bilay tayo? Nayarin naimanom a kaslakan ed saray totoo et agda labay so pananguman. Balet ta diad tua, pankanawnawa iya pian lalo itayon nibangat nen Jehova. Ontan so agawa ed si Moises.

Sanen manedad na 40 si Moises, balibali la ray kualidad to. Sikatoy masakripisyo tan manonot ed pankaukolan na totoo na Dios. (Heb. 11:24-26) Ingen, antis ya imbaki nen Jehova pian ibulos iray Israelita ed Ehipto, kaukolan nin dalanen nen Moises iray pananguman pian lalon magmaliw a mauyamo. Nepeg ton taynan so Ehipto, manayam ed Midian ed 40 taon, a ditan et magmaliw a managpastol, tan aliwa lan prominente. Antoy resulta ey? Sikatoy nagmaliw a mas maong a too. (Num. 12:3) Naaralan ton unaen so espiritual iran bengatla nen say dilin pankaabigan to.

Pian napaneknekan tayo a talagan mauyamo si Moises, imanoen tayo no antoy agawa sanen imbaga nen Jehova a labay To lan ipulisay so masugnar a nasyon na Israel tan pagmaliwen Ton mabiskeg a nasyon so kapolian nen Moises. (Num. 14:11-20) Akikasi si Moises ed si Jehova a perdonaen Toy Israel. Diad saray imbaga to, nanengneng tayon say iyaansakit to et say reputasyon na Dios tan say pankaabigan na saray kabaleyan to, aliwan say dilin pankaabigan to. Pian nagawaan nen Moises so betang to bilang lider tan manamegley na nasyon, kaukolan a sikatoy mauyamo. Anggan sanen sikatoy inreklamo di Miriam tan Aaron, inkuan na Biblia a si Moises et siansia nin “mauyamon tuloy ed saray amin a lalaki.” (Num. 12:1-3, 9-15) Mapatnag ya intepel nen Moises so impanginsulto ra. Isip yo pa labat no anto kasi nansumpalan no aliwan mauyamo si Moises.

Wala met imay inkagawa ya inyan nen Jehova so espiritu to ed pigaran lalaki kanian akapampropesiya ira. Diad pakalikna na katulongan nen Moises a si Josue, aliwan manepeg so gagawaen na saratan a lalaki. Balet, lapud mauyamo si Moises, miparay panmoria to ed si Jehova, tan agto nan-aburidoan ya ompan naandian na autoridad. (Num. 11:26-29) No aliwan mauyamo si Moises, asarag to kasin awaten iyan pananguman ed uksoyan nen Jehova?

Akatulong ed si Moises so kauyamoan pian nausar to ed dugan paraan so baleg ya autoridad tan betang ya inter na Dios ed sikato. Sikatoy ingganggan nen Jehova ya onla ed Palandey Horeb tan inrepresenta toy interon nasyon. Akitongtong so Dios ed si Moises panamegley na anghel tan sikatoy tinuro bilang manamegley na sipanan. Lapud mauyamo si Moises, anggaman balbaleg iyan pribilehyo to et apansiansia toy panangabobon na Dios.

Sikatayo ey? Tandaan ya importantin maong so kauyamoan ed iyaligwas tayo. Amin na saramay walaan na pribilehyo tan autoridad ed limog na totoo na Dios et nepeg a mauyamo. Ontulong itan pian ag-itayo magmaliw a mapaatagey sano walaray pananguman tan duga so awawey tayo ya onarap ed saray situasyon. Importante so reaksion tayo ed pananguman. Awaten tayo kasi itan? Ipasen tayo kasi a pankanawnawa itan pian onaligwas itayo? Nayarin balibali met itan a pankanawnawa pian nipanengneng tayoy kauyamoan!

Walan walaray pananguman ed bilay tayo. No maminsan et mairap a talosan no akin a nagagawa iraya. Lapud kakapuyan tan emosyon tayo, nayarin nairapan tayon moriaen iray bengatla unong ed panmoria nen Jehova. Anggaman ontan, makatulong so inkamapaabeba, pamidbir ed saray limitasyon tayo, tan kauyamoan pian naawat tayo iray pananguman tan mansiansia itayo ed panangabobon na Dios.

[Blurb ed pahina 4]

No talagan mapaabeba itayo, aliwan alablabas so pakanengneng tayo’d inkasikatayo

[Blurb ed pahina 5]

Importantin maong so kauyamoan ed iyaligwas tayo

[Litrato ed pahina 5]

Kaukolan nin dalanen nen Moises iray pananguman pian lalon magmaliw a mauyamo