Tepet na Saray Manbabasa . . .

Akin ya Kinerew na Dios ed si Abraham ya Ibagat toy Anak To?

▪ Unong ed libro na Biblia ya Genesis, kinerew nen Jehova a Dios ed si Abraham ya iyapay toy anak to bilang bagat. (Genesis 22:2) Ag-iya natatalosan na pigaran manbabasa na Biblia. “Nen first time kon arengelan iya nen ugaw ak ni, mansyodot ak,” so kuan na sakey a professor ya si Carol. “Anton klase na Dios so onkerew na ontan?” Anggaman natural labat itan ya nalikna na sakey, maabig no tandaan tayoy pigaran importantin punto.

Unona, imanoen no antoy agginawa nen Jehova. Agto impaituloy ed si Abraham ya ibagat si Isaac anggaman akaparaan si Abraham a gawaen itan, tan aglan balot kinmerew na ontan ed anggan siopa. Labay nen Jehova ya amin a mandadayew ed sikato, pati saray ugugaw, et mantultuloy ya manbilay​—pian panliketay andukey tan makapnek a bilay.

Komadua, ipapanengneng na Biblia a walay importantin rason nen Jehova no akin ya kinerew tod si Abraham ya ibagat si Isaac. Amta na Dios a nasabi panaon et abuloyan Toy mismon Anak To,a si Jesus, ya ompatey parad sikatayo. (Mateo 20:28) Labay nen Jehova ya ipatalos ed sikatayo no panon kairap itan ed sikato. Kanian, diad samay kerew tod si Abraham, sikatoy angipanengneng na mapuersan alimbawa ed gawaen tod arapen. Panon?

Nengnengen so imbaga nen Jehova ed si Abraham: “Alam natan so laki ya anak mo, say anak mo a bogbogtong, ya inararom, salanti si Isaac, . . . sikato so yapay mo’d man a sakey a pinoolan a bagat.” (Genesis 22:2) Imanoen ya tinukoy nen Jehova si Isaac bilang say anak “ya inararom.” Amta nen Jehova ya pinabpablin maong nen Abraham si Isaac. Ontan met so nalilikna na Dios ed Anak To, si Jesus. Inad-aron maong nen Jehova si Jesus tan diad amiduan impansalita ton direkta manlapud tawen et tinawag toy Jesus ya “Ana’ko, say inad-arok.”​—Marcos 1:11; 9:7.

Magalang so impangibalikas nen Jehova ed kerew tod si Abraham. Inkomento na sakey ya Bible scholar a diad paraan na impangibalikas na Dios ed saya et napatnagan ya “amta na KATAWAN no panon kabelat so kekerewen to.” No isipen tayoy pirmin ermen ya alikna nen Abraham, nayarin naimadyin tayo met so pirmin ermen ya alikna nen Jehova legan ton iimatonan so impanirap tan impatey na Anak to. Seguradon satan la so sankasakitan ya alikna nen Jehova.

Kanian, anggano dumay reaksion tayo ed kerew nen Jehova ed si Abraham, tandaan tayo ya agto inyabuloy ya ituloy na matoor a patriarka so pangibagat ed si Isaac. Aglabay nen Jehova a naeksperiensya nen Abraham so sankasakitan a nagawa ed sakey ya ateng; prinotektaan toy bilay nen Isaac. Balet, si Jehova et agto sinalimbengan “so dilin Anak to noagta inter to parad sikatayon amin.” (Roma 8:32) Akin a mabulos ya inarap nen Jehova so ontan kasakit a situasyon? “Pian nagamoran tayo so bilay.” (1 Juan 4:9) Alay abig iyan panonot ed panangaro na Dios ed sikatayo! Agtayo kasi napakiwas a mangaro met ed sikato?b

[Saray paimano ed leksab]