Siopa so Dumerengel na Pikakasi?
NO WALAY Dumerengel na pikakasi, seguradon sikato so Amalsa o nanggawad sikatayo. Siempre, lapud sikatoy nanggawad utek tayo, nabasa toy iisipen tayo. Tan sikato labat so makapangebat ed saray pikakasi tan makapangiter na tulong. Balet ompan ibagam, ‘Duga labat kasin panisiaan ya walay Amalsa ed sikatayo?’
Ikakatunongan na dakel ya no manisia kan walay Amalsa, singam met la ibabagan agka manisiad science. Balet say ontan ya kanonotan et aliwan duga. Isip mo pa ya.
◼ Diad agano nin impitongtong ed 1,646 ya professor na science diad 21 a kabkabat iran university ed United States, nalmoan ya sakey labat ed kada talora so angibagan “agak manisia ed Dios.”
Diad tua, dakel ya scientist so manisian walay Dios.
Prueba ya Walay Amalsa
Kasin basta tayo labat la panisiaan ya walay Dumerengel na pikakasi anggano anggapoy prueba? Siempre andi. Lingo so ideyan basta ka labat la manisia ya anggapoy ebidensya. Diad Biblia, say labay ya ibaga na pananisia et “makakombinsin ebidensya a tua iratan anggano agnanenengneng.” (Hebreos 11:1) Alimbawa, agmo nanengneng so radio wave, balet no mangusar kay cell phone, napaneknekan mon walay wave anggano agmo nanengneng ta narerengel moy boses na katongtong mo. Mipadpara, anggano agmo nanengneng so Dumerengel na pikakasi, wala ray makakombinsin ebidensya ya walay Amalsa.
Kulaan na ebidensya ya walay Dios? Nengneng kad kaliberliber. Oniay imbaga na Biblia: “Kada abung et walay angipaalagey, balet say angipaalagey ed amin a bengatla et say Dios.” (Hebreos 3:4) Mipakna kad satan? No nodnonoten moy inkauksoy na universe, inlesay bilay, odino say komplikadon desinyo na utek na too, nibagam ya wala ni mas intelihente nen say too.a
Balet, aliwa labat lan saraya so pakanengnengan ya walay Dios. Say pangobserbad saraya et aliling toy makakarengel ka na manaakar paasingger ed puerta. Amtam ya walay nitan la, balet siopa? Pian naamtaan mo, kaukolan mon lukasay puerta. Ontan met so nepeg tayon gawaen pian naamtaan no siopay nanggawa ed amin a bengatla.
Say Biblia so pinagka-puerta pian nakabat moy Dios. No lukasan mo itan tan aralen so arum ed saray detalyadon propesiya tan say impakasumpal na saratan, napaneknekan mon walay Dios.b Balet aliwan satan labat, diad saray nabasam ya impantrato na Dios ed totoo, naamtaan mo so personalidad na Dumerengel na pikakasi.
Antoy Personalidad na Dumerengel na Pikakasi?
Ibabaga na Biblia ya say Dumerengel na pikakasi et sakey a persona, tan sarag mon kabaten. Amta tayon say sakey a persona labat so walaan na abilidad a makatalos ed narerengel to. Oniay makapaliket ya nabasa tayo: “O Dumerengel na pikakasi, onsingger ed sika so amin a klase na totoo.” (Salmo 65:2) Dedengelen to iramay manpipikasi a walaan na pananisia ed sikato. Tan walay ngaran to. Ibabaga na Biblia: “Si Jehova arawi a manlapu ed marelmeng; balet denglen to so pikakasi na maptek.”—Uliran 15:29.
Walay liknaan nen Jehova. Sikato so “Dios na aro” tan tatawagen ya “maliket a Dios.” (2 Corinto 13:11; 1 Timoteo 1:11) Nensaman, sanen agaylay inkauges na totoo, imbaga na Biblia: “Asakitan so puso to.” (Genesis 6:5, 6, NW) Aliwan tua imay ibabaga na arum ya papairapen na Dios iray totoo pian suboken ira. Inkuan na Biblia: “Arawi ed Dios, a sikato manggawa na . . . inkauges.” (Job 34:10) Balet, ompan ibagam, ‘No makapanyarin Manamalsa so Dios, akin et aabuloyan to nin manirap tayo?’
Inikdan nen Jehova so totoo na abilidad ya makapanggaway sarilin desisyon. Tan diad satan et nanenengneng tayo so personalidad to. Agta misalsalamat itayo ta sarag tayoy manpili no panoy pambilay? Balet, makapaermen ta inabuso na dakel a totoo iyan inter na Dios, a nanresulta ed impanirap da tan na arum. Natan, niay tepet a kaukolan ya seryosoen: Panon ya ekalen na Dios so paniirap tan siansia nin abuloyan ton makapanggawa tayoy sarilin desisyon? Ebatan tayo iya diad onsublay ya artikulo.
[Saray paimano ed leksab]
a Parad mas detalyadon prueba ya walay Dios, nengnengen so brochure ya The Origin of Life—Five Questions Worth Asking tan libron Is There a Creator Who Cares About You? ya im-publish na Saray Tasi nen Jehova.
b Im-publish na Saray Tasi nen Jehova so brochure ya Libron Parad Amin a Totoo tan say libron The Bible—God’s Word or Man’s? pian nanengneng iray ebidensya ya say Biblia et nanlapud Dios.
[Kahon ed pahina 5]
Kasin Aliwa Laingey Agawaan na Relihyon ed Sika?
Makapaermen ta say relihyon laingen so rason no akin ya dakel so agkombinsidon walay mapangasin Dumerengel na pikakasi. Lapud akibabali so relihyon ed guerra, terorismo, tan kokonsintien day panag-abuso ed ugugaw, anggan saray relihyoso et mangibabagan, “Agak manisia ed Dios.”
Akin et aliwa laingey impluensya na relihyon? Lapud relihyon so rason no akin a nanggawa na mauges iray totoon mauges. Impasakbay na Biblia ya wala ray makaloob ed Inkakristiano pian anamoten itan. Imbaga nen apostol Pablo ed saray Kristianon manag-asikaso: “Wala rad sikayoy mantila a pamatumbok dad saray disipulo, pian nibalang da ra.”—Gawgawa 20:29, 30, Maung a Balita.
Kabusol na Dios iray palson relihyon. Diad tua, ibabaga na Salitay Dios, say Biblia, ya saray palson relihyon so natetel ed “dala na amin a pinatey diad dalin.” (Apocalipsis 18:24) Lapud ag-imbangat na saray palson relihyon so nipaakar ed tuan Dios, a sikato so aro, sikaray nankasalanan ed Dios.—1 Juan 4:8.
Iyaansakit na Dumerengel na pikakasi iray napapairap na palson relihyon. Agmanbayag, lapud panangaro na Dios ed totoo, ukomen to so amin ya palson relihyon panamegley nen Jesus. Imbaga nen Jesus: “Dakel so mangikuan ed siak na, ‘Katawan, Katawan, agta nampropesiya kami diad ngaran mo?’ . . . Ingen ta diad satan et ipatuak ed sikara: Ag ta kayon balot kabat! Arawi kayo ed siak, sikayoran managgawa na kaugsan.”—Mateo 7:22, 23.