Teokratikon Eskuelaan Parad Ministeryo
Gagala: Pian ipasal iray manangipalapag a magmaliw ya epektibon managpulong tan managbangat na maong a balita.
Karukey: Tuloytuloy.
Lugar: Kingdom Hall.
Kualipikasyon: Amin a regular ya onaatendid kongregasyon, onabobon ed saray bangat na Biblia, tan manbibilay unong ed saray Kristianon prinsipyo.
Panagpa-enroll: Mitongtong ed manangasikasoy Teokratikon Eskuelaan Parad Ministeryo.
Oniay imbaga nen Sharon ya aparalisado lapud amyotrophic lateral sclerosis (ALS): “Imbangat ak na Teokratikon Eskuelaan Parad Ministeryo a man-research tan mangipaliwawad saray impormasyon diad malinew a paraan. Naaralan ko met ya iyuna so espiritual a pankaukolan na arum, aliwan say sarilik labat.”
Oniay inkuan nen Arnie, sakey ya abayag lan ombiabiahen manangasikaso: “Manlapud inkaugaw ko et naiirapan ak a mansalita tan agak makapimataan ed katongtong ko. Atulongan ak na sayan eskuelaan a nawalaay kompiyansa tan aliknak a makana ak. Diad tulong nen Jehova panamegley na impangipasal tod siak, naaralan kon kontroley engas ko tan manpokus. Misalsalamat ak ed pribilehyon mangidayew ed Dios diad kongregasyon tan diad ministeryo.”
Bethel Entrants’ School
Gagala: Sayan eskuelaan et denisinyon ontulong ed saray balon Bethelite pian matalona so panlingkor dad Bethel.
Karukey: 45 minuto kada simba, diad loob na 16 a simba.
Lugar: Bethel.
Kualipikasyon: Kaukolan ya permanentin membro na pamilyan Bethel odino temporaryon boluntaryo a naaprobaan a manlingkor ed loob na sakey taon odino andukey ni.
Panagpa-enroll: Saray balon membro na pamilyan Bethel et automatikon aka-enroll.
Oniay inkuan nen Demetrius ya akaatendid sayan eskuelaan nen 1980’s: “Lapud sayan eskuelaan, inmaligwas so panagaral ko tan imparaan ak na saya parad bilay ed Bethel. Saray instruktor, curriculum, tan praktikal a simbawa so angombinsid siak ed maaron panangasikaso nen Jehova tan labay to ak ya mansiansia ed Bethel.”
Oniay inkuan nen Kaitlyn: “Atulongan ak ya manpokus ed no antoy sankaimportantian—say pagmaliw ya maespiritual. Tinmulong ed siak so Bethel Entrants’ School pian mas naapresyak si Jehova, say abung to, tan say organisasyon to.”
Kingdom Ministry School
Gagala: Pian ipasal iray ombiabiahen manangasikaso, elder, tan ministeryal a lingkor a mangasikasod responsabilidad tan betang dad organisasyon. (Gawa 20:28) Pantotongtongan dia iray kaplesan a kipapasen, pananguman, tan maganat iran pankaukolan na saray kongregasyon. Sayan eskuelaan et iyi-eskedyul kada pigaran taon, depende ed desisyon na Mananguley ya Ulop.
Karukey: Diad agano ni ran taon, duara anggad duara tan kapalduan agew so klase na saray ombiabiahen manangasikaso, sakey tan kapalduan agew parad saray elder, tan sakey agew parad saray ministeryal a lingkor.
Lugar: Mabetbet a diad Kingdom Hall odino Assembly Hall.
Kualipikasyon: Kaukolan ya ombiabiahen manangasikaso, elder, odino ministeryal a lingkor.
Panagpa-enroll: Saray elder tan ministeryal a lingkor et makaawat na imbitasyon manlapud manangasikasoy sirkito. Say branch office so mangimbita ed saray ombiabiahen manangasikaso.
“Anggano dakdakel so aaralen diad antikey labat ya panaon, ontutulong iyad saray elder ya napansiansiay liket da tan ‘manugalin singa lalaki’ diad panaglingkor ed si Jehova. Saray balo tan abayag lan elder et makaaral pian magmaliw ya epektibon managpastol tan sigpot a ‘mankakasakey ed paraan na panag-isip.’”—Quinn (walad leksab).
“Tinmulong iyan panangipasal ed sikatayo pian napabiskeg so apresasyon tayod espiritual iran bengatla, mamasakbay ed saray kapeligroan, tan mangiter ed sikatayo na praktikal iran suhestion no panon ya asikasoen so pulok. Talagan inad-aro itayo nen Jehova.”—Michael.
Pioneer Service School
Gagala: Pian tulongan iray payunir a ‘sigpot a sumpalen so ministeryo ra.’—2 Tim. 4:5.
Karukey: Duaran simba.
Lugar: Say branch office so mandesisyon; mabetbet a diad Kingdom Hall.
Kualipikasyon: Kaukolan a regular payunir ed loob na sakey taon odino onsulok ni.
Panagpa-enroll: Saray kualipikadon payunir et automatikon aka-enroll tan pakabatan ira na manangasikaso na sirkito.
Oniay komento nen Lily (walad kawanan). “Atulongan ak na sayan eskuelaan a talonaan iray problemak ed ministeryo tan ed bilay ko. Baleg so inaligwasan na panagaral, panagbangat, tan say panguusar koy Biblia. Mas akaparaan ak la natan ya ontulong ed arum, onsuportad saray elder, tan ontulong pian onaligwas so kongregasyon.”
Onia so naimano nen Brenda ya amidua lan akaatendi ed sayan eskuelaan: “Tinmulong iyad siak pian sigpot a mibiang ed saray espiritual a kimey, pabiskegey konsiensiak, tan iyunay itulong ed arum. Talagan mabunlok si Jehova!”
School for Congregation Elders
Gagala: Pian tulongan iray elder ya mangasikasod responsabilidad da ed kongregasyon tan mamabiskeg ed espiritualidad da.
Karukey: Limaran agew.
Lugar: Say branch office so mandesisyon; mabetbet a diad Kingdom Hall odino Assembly Hall.
Kualipikasyon: Kaukolan ya elder.
Panagpa-enroll: Say branch office so mangimbita ed saray elder.
Niraya so komento na saray nan-graduate ed koma 92 a klase ed United States:
“Agunggonaan ak a maong ed sayan eskuelaan, naaralan kon usisaey sarilik tan naamtaan ko no panon kon asikasoen iray karneron inmatalek nen Jehova.”
“Mas akaparaan ak la natan ya mamaseseg ed arum diad panamegley na pangidanet ed saray manunan puntod Kasulatan.”
“Agko nalinglingwanan iyan panangipasal legay bilay ko.”
School for Traveling Overseers and Their Wives
Gagala: Pian natulongan iray manangasikaso na sirkito tan distrito a mas epektibon manlingkor ed saray kongregasyon legan iran “mansasagpot ed panagsalita tan panagbangat.”—1 Tim. 5:17; 1 Ped. 5:2, 3.
Karukey: Duaran bulan.
Lugar: Say branch office so mandesisyon.
Kualipikasyon: Kaukolan a manangasikasoy sirkito odino distrito.
Panagpa-enroll: Say branch office so mangimbitad saray ombiabiahen manangasikaso tan kaasawaan da.
“Binmiskeg so apresasyon mid panangidaulo nen Jesus ed organisasyon. Amoria min kakkaukolan so pamaseseg ed saray agagin walad panangasikaso mi tan pabiskegey pankakasakey ed kada kongregasyon. Impurek ed sikami na eskuelaan ya anggaman manisimbawa so ombiabiahen manangasikaso tan no maminsan et manidisiplina, say manunan gagala to ontulong ed saray agagin naliknay panangaro nen Jehova.”—Joel, 1st class, 1999.
Bible School for Single Brothers
Gagala: Pian iparaan iray balolakin elder tan ministeryal a lingkor a mangasikasod kaaruman ya responsabilidad diad organisasyon nen Jehova. Dakel ed saray man-graduate et iyasain ed bansa ra, diad saray lugar a mas baleg so pankaukolan. Iyasain met so arum ed sananey a bansa no wala rad kipapasen. Pigarad saray man-graduate et nayarin iyasain bilang temporaryon espisyal payunir pian gapoan tan palaknaben so kimey diad saray arawi tan nisulinek a lugar.
Karukey: Duaran bulan.
Lugar: Say branch office so mandesisyon; mabetbet a diad Kingdom Hall odino Assembly Hall.
Kualipikasyon: Balolakin agagi a manedad na 23 anggad 62 taon. Walaay maabig ya bunigas tan pilalek toy ontulong ed panagpulong a kimey diad saray lugar a mas baleg so pankaukolan. (Mar. 10:29, 30) Kaukolan ya regular payunir diad loob na duay taon tan duaran taon lan tuloytuloy ya akapanlingkor bilang elder odino ministeryal a lingkor.
Panagpa-enroll: Walay nagawan miting diad sirkiton asemblea parad saray interesado.
Oniay inkuan nen Rick a nanaral ed koma 23 klase diad United States: “Nipasal ak a maong ed sayan eskuelaan, kanian apakiwas ak na espiritu nen Jehova a manggawa na pananguman. Sano ikdan ka nen Jehova na asainmin, tulongan to kan nagawaan itan. Naaralan ko ya no iprayuridad koy panggaway linawa na Dios, aliwan say panlabayan ko, tulongan to ak.”
Oniay imbaga nen Andreas a manlilingkor ed Germany: “Naamtaan kon say gagawaen na organisasyon na Dios ed sayan modernon panaon et sakey a milagro. Imparaan ak na saya parad kimey ed arapen. Ontan met, dakel ya alimbawad Biblia so angibangat ed siak ed sayan katuaan: Say panlingkor ed saray agagik tan ed si Jehova so mangiter na tuan liket.”
Bible School for Christian Couples
Gagala: Makaawat iray sanasawa na nikadkaduman panangipasal pian mas nausar ira nen Jehova tan na organisasyon to. Dakel ed saray man-graduate et iyasain ed lugar diad bansa ra a walaay mas baleg a pankaukolan. Ingen ta wala ray pigaran iyasain ed arum a bansa no akaparaan ira. Wala ray man-graduate a niasain bilang temporaryon espisyal payunir pian gapoan tan palaknaben so kimey diad saray arawi tan nisulinek a lugar.
Karukey: Duaran bulan.
Lugar: Say panaral et nagawad United States, tan manlapu la no Setyembre 2012, nagawa met iyad apili iran branch, mabetbet a diad Kingdom Hall odino Assembly Hall.
Kualipikasyon: Sanasawan manedad na 25 anggad 50, maabig so bunigas da, sarag day manlingkor ed lugar a walay mas baleg a pankaukolan, tan walad sikaray ugalin: ‘Wadia ak! Ibaki mo ak.’ (Isa. 6:8) Kaukolan ya duay taon la ran kasal tan tuloytuloy ya manlilingkor bilang sigpot-panaon a ministro ya ag-onkulang na duay taon. Kaukolan a say asawan laki et elder odino ministeryal a lingkor diad loob la na duay taon.
Panagpa-enroll: Walay miting a nagawad kombension pian naikdan na impormasyon iramay interesado. No diad bansa yo et anggapoy miting ed kombension balet labay yoy man-apply, sarag yoy onsulat ed branch office parad kaaruman ya impormasyon.
“Talagan umanen na sayan waloy simba a panangipasal so bilay tan baleg iyan pribilehyo parad saray sanasawan malabay a mamalaknab ed kimey da! Determinado kamin pansiansiaen so balansin panagbilay pian makabat min nausar so panaon mi.”—Eric tan Corina (walad leksab), 1st class, 2011.
Watchtower Bible School of Gilead
Gagala: Pian ipasal iray estudyante a manlingkor bilang misionero diad lugar a dakel so populasyon, magmaliw ya ombiabiahen manangasikaso, odino Bethelite. Say gagala et pabiskegen tan paaligwasey kimey ed ministeryo tan ed branch.
Karukey: Limaran bulan.
Lugar: Watchtower Educational Center, Patterson, New York, U.S.A.
Kualipikasyon: Sanasawan walad special full-time service—misionero ya agni akapanaral, espisyal payunir, ombiabiahen manangasikaso, odino Bethelite. Kaukolan ya tuloytuloy iran nanlingkor a saniba diad loob na taloy taon. Nepeg ya maong iran mansalita, manbasa, tan mansulat na lenguahen English.
Panagpa-enroll: Say Branch Committee so mangimbita ed sanasawa a man-apply.
Si Lade tan Monique a taga United States et manlilingkor la natan ed Africa. Oniay inkuan nen Lade: “Imparaan kami na Gilead School a manlingkor ed nanduruman pasen diad mundo kaiba iray inad-aro min agagi.”
Inyarum nen Monique: “Legan kon iyaaplikay naaralan kod Salita na Dios, naliliketan ak ed asainmin ko. Amoriak a say liket et paneknek na panangaro nen Jehova.”
School for Branch Committee Members and Their Wives
Gagala: Pian tulongan iray Branch Committee a mangasikaso ed saray Bethel home, imanoen iray bengatlan mangapektad panaglingkor na kongregasyon, tan asikasoen iray sirkito tan distrito. Ibabangat met ira nipaakar ed pangipatalos, pangimprinta, tan pangi-deliver ed saray literatura.
Karukey: Duaran bulan.
Lugar: Watchtower Educational Center, Patterson, New York, U.S.A.
Kualipikasyon: Nepeg a membro na Branch Committee odino Country Committee odino walaan na singa ontan a responsabilidad.
Panagpa-enroll: Imbitaan na Mananguley ya Ulop iray agagin lalaki tan saray kaasawaan da.
Si Lowell tan Cara a nan-graduate ed koma 25 a klase et manlilingkor la natan ed Nigeria. Oniay inkuan nen Lowell: “Apanonotan ak ya anggano anto lay inka-busyk odino anggan anton kimey so niiter ed siak, nepeg koy mankimey unong ed panlabayan nen Jehova pian sikatoy napaliket ko. Indanet met na eskuelaan ya importante so pangalig ed panangaron impanengneng nen Jehova ed saray lingkor to.”
Oniay inyarum nen Cara: “No agko ni naipaliwaway sakey a punto ed simplin paraan, aralen ko ni itan antis kon ibangat ed arum.”