Kasin Gagawaen Moy Anggaay Nayarian Mon Paibangat ed si Jehova?

1. Antoy panmoria nen Jehova ed edukasyon?

¹ Labay nen Jehova, say “Makapadinayew a Managbangat” tayo, a makaaral itayo. (Isa. 30:20, NW) Ginapoan toy nambangat sanen pinalsa toy panguloan ya Anak to. (Juan 8:28) Kayarin nanrebelde si Adan, agtinmunda si Jehova a nambangat, noagta maar-aron angiter na instruksion parad saray agperpekton totoo.​—Isa. 48:17, 18; 2 Tim. 3:14, 15.

2. Anton panagbangat so gagawaen natan?

² Diad sayan panaon, idadaulo nen Jehova so sankalaknaban ya panagbangat. Unong ya impropesiya nen Isaias, aliling to et unaagus ed “palandey na abung nen Jehova” so minilyon a totoo ed interon mundo. (Isa. 2:2) Akin et oonla ira ditan? Pian naamtaan da ray dalan na Dios, on, pian ibangat ira nen Jehova! (Isa. 2:3) Legay 2010 a serbisyon taon, angusar iray Tasi nen Jehova na masulok a 1.6 bilyon ya oras pian ipulong tan ibangat ed totoo so katuaan a walad Biblia. Niarum ni, sinimban itatarya na matoor tan makabat ya aripen so espiritual ya instruksion ed masulok ya 105,000 a kongregasyon diad interon mundo, tan ipapalapag da iray makaibangat a publikasyon diad masulok ya 500 a lenguahe.

3. Panon kan personal ya agunggonaan ed edukasyon ya itatarya nen Jehova?

³ Sigpot a Nagunggonaan: Talagan agunggonaan itayo lapud edukasyon a manlalapud Dios! Naaralan tayo a walay ngaran to tan iyaansakit to itayo. (Sal. 83:18; 1 Ped. 5:6, 7) Naamtaan tayo so ebat ed saray sankaimportantian a tepet a singa say, Akin et maniirap tan ompapatey so totoo? Panon ak a magmaliw a tuan maliket? Anto so gagala na bilay? Tutulongan itayo met nen Jehova a nibiig so duga tan aliwa pian magmaliw a ‘maaligwas so dalan tayo.’​—Jos. 1:8.

4. Antoran panangipasal so itatarya ed saray lingkor na Dios, tan akin a gawaen tayoy anggaay nayarian tayon paibangat ed si Jehova?

⁴ Niarum ni, angitarya si Jehova na panangipasal pian napalaknab na dakel a totoo to so panaglingkor dad sikato. Akalista ed pahina 4-6 iray oportunidad parad saray kualipikado. No anggapo tayod sirkumstansyan mangawat na ontan a panangipasal, kasin panggugunaetan tayoy paibangat ed sikato diad arum iran pankanawnawa? Saray kalangweran et mabetbet ya iimpluensyaan na mamaestra tan na arum a mangalay atagey ya edukasyon. Kasin papasesegen tayo ran mangiletneg na espiritual iran kalat tan mangawat na sankaabigan ya edukasyon, say edukasyon a manlalapud si Jehova? No gawaen tayoy anggaay nayarian tayon paibangat ed si Jehova, magmaliw a maliket so bilay tayo natan tan diad andi-angga.​—Sal. 119:105; Juan 17:3.

Pigaran Panangipasal ya Intarya na Organisasyon nen Jehova

Panaral a Pambasa tan Pansulat

• Gagala: Pian ibangat iray totoo a manbasa tan mansulat diad ontan et personal dan naaral so Biblia tan nibangat ed arum so katuaan.

• Karukey: Depende ed pankaukolan.

• Lugar: Diad kongregasyon.

• Siopay Nayarin Onatendi: Amin a manangipalapag tan interesadon totoo.

• Panoy Pan-aplay: Saray elder ed kongregasyon so manguuksoy ed sarayan klase depende ed pankaukolan, tan amin ya minabang ed saraya et papasesegen dan onatendi.

Teokratikon Eskuelaan Parad Ministeryo

• Gagala: Pian ipasal iray manangipalapag a magmaliw ya epektibon manangipulong tan managbangat na maong a balita.

• Karukey: Tuloy-tuloy.

• Lugar: Diad Kingdom Hall.

• Siopay Nayarin Man-enroll: Amin a manangipalapag. Ontan met ed saray aktibon miaaral ya onaabobon ed saray bangat na Biblia tan say bilay da et mitunosan ed saray Kristianon prinsipyo.

• Panoy Pan-aplay: Mitongtong ed manangasikasoy Teokratikon Eskuelaan Parad Ministeryo.

Panaral na Arum a Lenguahe

• Gagala: Pian ibangat iray manangipalapag ya ipulong so maong a balita ed arum a lenguahe.

• Karukey: Apatira odino limaran bulan. Kaslakan lan gagawaen so klase kada Sabadoy kabuasan diad loob na sakey odino duaran oras.

• Lugar: Kaslakan lan diad asingger ya Kingdom Hall.

• Siopay Nayarin Man-enroll: Saray maespiritual a manangipalapag ya interesadon manpulong ed totoon mansasalitay sananey a lenguahe.

• Panoy Pan-aplay: Iyuuksoy na branch office irayan klase depende ed pankaukolan.

Kingdom Hall Construction

• Gagala: Pian mangipaalagey tan mangapiger na saray Kingdom Hall. Aliwa iyan eskuelaan, balet makaaral iray boluntaryo na nanduruman skill pian makatulong ed saray proyekto.

• Karukey: Depende ed sirkumstansya na boluntaryo.

• Lugar: Diad niasain ya rehyon na Kingdom Hall Construction Desk’s Regional Office. Nayarin saray arum a boluntaryo et ibakin ontulong ed arawin lugar ya adalan na kalamidad.

• Kualipikasyon: Lalaki tan bibii ya bautismado tan inaprobaan na ulop na mamatatken. Nayarin walay skill da odino anggapo.

• Panoy Pan-aplay: Sulatan so Application for Kingdom Hall Construction Volunteer Program (A-25) form ya naalad saray manangasikaso na sirkito odino nayarin i-request ed branch office.

Pioneer Service School

• Gagala: Pian tulongan iray payunir a ‘sigpot a sumpalen so ministeryo ra.’​—2 Tim. 4:5.

• Karukey: Duay simba.

• Lugar: Say branch office so mandedesisyon ed saya; kaslakan lan diad asingger ya Kingdom Hall.

• Kualipikasyon: Regular payunir ya ag-onkulang ed sakey taon.

• Panoy Pan-enroll: Saray kualipikadon payunir et automatikon aka-enroll la tan pakabatan ira na manangasikaso na sirkito.

Bethel Entrants’ School

• Gagala: Sayan eskuelaan et denisinyon ontulong ed saray balon bethelite pian matalona so panlingkor da ed Bethel.

• Karukey: Sakey oras, maminsan ed sakey simba diad loob na labin-anem a simba.

• Lugar: Bethel.

• Kualipikasyon: Kaukolan ya permanentin membro na pamilyan Bethel odino abayag lan temporaryon boluntaryo (sakey taon o andukey ni).

• Panoy Pan-enroll: Saray kualipikadon membro na pamilyan Bethel et automatikon aka-enroll la.

Kingdom Ministry School

• Gagala: Pian ipasal iray elder tan ministeryal a lingkor odino katulongan a lingkor a mangasikaso ed betang tan responsabilidad dad organisasyon. (Gawa 20:28) Sayan eskuelaan et iyi-eskedyul kada pigaran taon, depende ed desisyon na Mananguley ya Ulop.

• Karukey: Diad agano ni ran taon, sakey tan kapalduan agew so panaaral na saray elder tan sakey agew ed saray katulongan a lingkor.

• Lugar: Kaslakan lan diad asingger ya Kingdom Hall odino Assembly Hall.

• Kualipikasyon: Elder odino katulongan a lingkor.

• Panoy Pan-enroll: Saray kualipikadon elder tan katulongan a lingkor et imbitaan na manangasikasoy sirkito.

School for Congregation Eldersa

• Gagala: Pian tulongan iray elder ya mangasikasod responsabilidad da ed kongregasyon.

• Karukey: Limay agew.

• Lugar: Say branch office so mandedesisyon ed saya; kaslakan lan diad asingger ya Kingdom Hall odino Assembly Hall.

• Kualipikasyon: Elder.

• Panoy Pan-enroll: Saray kualipikadon elder et imbitaan na branch office.

School for Traveling Overseers and Their Wivesb

• Gagala: Pian natulongan iray manangasikaso na sirkito tan distrito a magmaliw ya mas epektibon manlingkor ed saray kongregasyon tan pian ‘mansagpot ira ed panagsalita tan ed panagbangat,’ tan pian pastolan day pulok na Dios.​—1 Tim. 5:17; 1 Ped. 5:2, 3.

• Karukey: Duay bulan.

• Lugar: Say branch office so mandesisyon ed saya.

• Kualipikasyon: Manangasikasoy sirkito tan distrito.

• Panoy Pan-enroll: Saray kualipikadon ombiabiahen manangasikaso tan kaasawaan da et imbitaan na branch office.

Bible School for Single Brothersc

• Gagala: Pian iparaan iray andiay asawan elder tan katulongan a lingkor parad kaaruman ya responsabilidad. Maslak ed saray man-graduate et iyasain ed lugar diad bansa ra a mas baleg so pankaukolan. Ingen ta walaray pigaran iyasain ed arum a bansa no wala rad kipapasen.

• Karukey: Duay bulan.

• Lugar: Say branch office so mandedesisyon ed saya; kaslakan lan diad Assembly Hall odino Kingdom Hall.

• Kualipikasyon: Andiay asawan agagin lalaki a manedad na 23 anggad 62. Walaay maabig ya bunigas, mabulos a manlingkor ed saray agagi, tan pilalek day ontulong ed panagpulong a kimey diad saray lugar a mas babaleg so pankaukolan. (Mar. 10:29, 30) Kaukolan ya akapanlingkor la ra na tuloy-tuloy a duaran taon bilang katulongan a lingkor odino elder.

• Panoy Pan-aplay: No wala iyan eskuelaan ed bansa yo, iyuksoy so miting ed saray interesadon manpa-enroll legan na sirkiton asemblea. Walaray kaaruman ya impormasyon ya iiter legan na sayan miting.

Bible School for Christian Couplesd

• Gagala: Pian ipasal iray sanasawa, diad ontan et nagkalalon nausar ira nen Jehova tan na organisasyon to. Maslak ed saray man-graduate et iyasain ed lugar diad bansa ra a walaay mas baleg a pankaukolan. Ingen ta walaray pigaran iyasain ed arum a bansa no wala rad kipapasen.

• Karukey: Duay bulan.

• Lugar: Walaray pigaran klase ya inyuksoy ed Watchtower Educational Center diad Patterson, New York, U.S.A. Agmanbayag, wala met lay onian eskuelaan ed arum a lugar a pilien na branch office, kaslakan lan diad Assembly Hall odino Kingdom Hall.

• Kualipikasyon: Sanasawan manedad na 25 anggad 50, maabig so bunigas da, sarag day manlingkor ed lugar a mankaukolan, tan walad sikaray ugalin: ‘Wadia ak! Ibaki mo ak.’ (Isa. 6:8) Niarum ni, kaukolan ya duay taon la ran kasal tan tuloy-tuloy ya manlilingkor bilang sigpot-panaon a ministro ya ag-onkulang na duay taon.

• Panoy Pan-aplay: No wala iyan eskuelaan ed bansa yo, iyuksoy so miting ed saray interesadon manpa-enroll legan na agew na espisyal ya asemblea. Walaray kaaruman ya impormasyon ya iiter legan na sayan miting.

Watchtower Bible School of Gilead

• Gagala: Pian ipasal iray payunir tan arum ni ran walad sigpot-panaon ya serbisyo a manmisionero.

• Karukey: Limay bulan.

• Lugar: Watchtower Educational Center, Patterson, New York, U.S.A.

• Kualipikasyon: Sanasawan taloy taon lan bautismado tan manedad na 21 anggad 38 sano ipasa da so unonan aplikasyon da. Kaukolan ya makapansalita ray Ingles, duay taon la ran kasal, tan tuloy-tuloy ya manlilingkor bilang sigpot-panaon a ministro ya ag-onkulang na duay taon. Saray payunir a manlilingkor ed arum a bansa (pati saramay say status da et misionero); ombiabiahen manangasikaso; membro na pamilyan Bethel; nan-graduate ed Ministerial Training School, Bible School for Single Brothers, tan Bible School for Christian Couples et nayari met ya man-aplay no kualipikado ira.

• Panoy Pan-aplay: Diad saray pinilin branch, iyuksoy so miting ed saray interesadon manpa-enroll legan na distriton kombension. Walaray kaaruman ya impormasyon ya iiter legan na sayan miting. No anggapoy onian miting ed kombension yo tan labay yoy man-aplay, sarag yoy mansulat ed branch office pian makala kayoy kaaruman ya impormasyon.

School for Branch Committee Members and Their Wives

• Gagala: Pian tulongan iray Branch Committee a lalon nagawaan so kimey da a pangasikaso ed saray Bethel home, ya imanoen da ray pamaakaran nipaakar ed kongregasyon, tan asikasoen da ray sirkito tan distrito ed teritorya ra, pati say panangipatalos, panag-imprinta, panangipatulor ed saray literatura, tan asikasoen da ray nanduruman departamento.​—Luc. 12:48b.

• Karukey: Duay bulan.

• Lugar: Watchtower Educational Center, Patterson, New York, U.S.A.

• Kualipikasyon: Membro odino inyasain a Branch Committee odino Country Committee.

• Panoy Pan-enroll: Saray kualipikadon agagin lalaki tan saray kaasawaan da et imbitaan na Mananguley ya Ulop.

[Saray paimano ed leksab]