Paibangat ed Salita na Dios
Kasin Makapambilay Ka ya Andi-angga?
Nabasa ed sayan artikulo iray maslak ya itetepet na totoo tan no iner ed Biblia so pakaromogay ebat. Maliket ya ipaliwawa ed sika na Saray Tasi nen Jehova irayan ebat.
1. Akin et singa antiktikey so bilay tayo?
Saray arum ya bakokol et nasabi day 150 ya taon, tan saray arum ya kakiewan et nasasabi day 3,000 a taon. Balet say bilay na too et antiktikey. Ingen ta mas makabaliksan so bilay tayo nen saray bakokol odino kakiewan. Sanen pinalsa nen Jehova a Dios so totoo, inikdan to ray abilidad a panliketan so musika, isports, panangan, panaral, pampasyar, tan pikaarod arum. Inyan na Dios ed kapusoan tayo so pampilalek a manbilay ya andi-angga.—Basaen so Eclesiastes 3:11.
2. Talaga kasin makapambilay tayo ya andi-angga?
Si Jehova et manbibilay ya andi-angga. Sikatoy ag-ompatey. Sikato so Lapuan na bilay, kanian sarag ton ikdan so arum na bilay ya andi-angga. (Salmo 36:9; Habacuc 1:12) Sakey ni, impormisa to ya ikdan toy bilay ya andi-angga iray matulok ed sikato. Tan ekalen toy itatatken.—Basaen so Job 33:24, 25; Isaias 25:8; 33:24.
Panamegley na milagro, impanengneng nen Jesus ya talagan nagawa so impormisa na Dios ya bilay ya andi-anggaan tan anggapo lay mansakit. Tinambal nen Jesus so amin a klase na sakit tan binilay to ni ingen iray inaatey.—Basaen so Lucas 7:11-15, 18, 19, 22.
3. Kapigan kasi nagawa ’tay bilay ya andi-angga?
Labay na Dios ya manbilay tayo ya andi-angga diad paraison dalin, aliwan diad mundo ya napno na irap tan kaugsan. Agto labay ya manaburido tayo. (Salmo 37:9, 29; Isaias 65:21, 22) Sano magmaliw lan paraiso so dalin, minilyon ya totoon inaatey so nabilay lamet. Tan no pilien day mandayew tan ontulok ed Dios, makapambilay ira ya andi-angga.—Basaen so Lucas 23:42, 43; Juan 5:28, 29.
4. Panon tayon makapambilay ya andi-angga?
Say Dios labat so makapangiter ed satan. Kanian pian onapit tayod sikato, kaukolan a sikatoy kabaten tayo. Diad Biblia, say pikabat ed Dios et inyaliling ed pangan. (Mateo 4:4) Labalabay tayoy mangan, pero kaukolay pansagpot pian niprepara so naakan. Ontan met ed espiritual ya naakan, kaukolay sagpot. Balet, wala ta ni mas importante nen say iyapit ed Dios tan pambilay ya andi-angga?—Basaen so Lucas 13:23, 24; Juan 6:27; 17:3.