Moises—Mapaabeban Too

ANTO SO INKAMAPAABEBA?

Say inkamapaabeba et kabaliktaran na panagpasirayew, panaglastog, tan inkaarogante. Say toon mapaabeba et agto iisipen a sikatoy atagtagey nen say arum. Amta to met a sikatoy aliwan perpekto tan amta to iray limitasyon to.

PANON YA IMPANENGNENG NEN MOISES SO INKAMAPAABEBA?

Agbinmaleg so ulo nen Moises sanen naikdan na autoridad. Mabetbet a no makaawat na autoridad so sakey, nanengneng a tampol no sikatoy mapaabeba odino mapaatagey. Onia so imbaga na autor nen koma 19 siglo a si Robert G. Ingersoll: “Sarag na dakel a totoo a talonaay kairapan. Balet no talagan labay mon nakabat so sakey a too ikdan moy autoridad.” Impanengneng nen Moises so balibalin alimbawa na inkamapaabeba. Panon?

Akaawat si Moises na baleg ya autoridad, lapud sikatoy ingganggan nen Jehova a mangidaulod Israel. Balet agnagmaliw a mapaatagey. Singa bilang, imanoen yo pa no panon ton mapaabeban inasikaso so mairap a situasyon nipaakar ed saray tawir. (Numeros 27:1-11) Ambelat itan a problema ta say desisyon ed satan et nayarin usaren met na onsublay iran henerasyon.

Antoy ginawa nen Moises? Kasin iisipen ton lapud sikatoy mangidadaulo ed saray Israelita et sikato lay kualipikadon manggaway desisyon? Kasin mandepende ed pakatalos tod saray dalan nen Jehova, odino diad abilidad to tan diad saray eksperiensya tod dakel lan taon?

Ompan ontan so gawaen na mapaatagey a too, balet aliwan ontan si Moises. Oniay ibabaga na Biblia: “Et si Moises inyakar to so [kaso] da ed arap nen Jehova.” (Numeros 27:5) Isipen pa labat! Anggano 40 taon to lan idadaulo so bansan Israel, sikatoy agnandependid sarili to, noagta diad si Jehova. Mapatpatnag so inkamapaabeba nen Moises.

Ag-inisip nen Moises a dapat et sikato labat so nawalaan na autoridad. Sikatoy maliket nen inabuloyan nen Jehova iray arum ya Israelitan magmaliw a propetan kaiba to. (Numeros 11:24-29) Nen imbaga na katulangan ton laki ya sikatoy mamili na lalaki pian ontulong ed sikato diad trabaho to, mapaabeban tinmulok si Moises. (Exodo 18:13-24) Tan nen asingger lan ompatey, anggano sarag to ni, kinerew tod si Jehova a mamili lay kasalat to. Sanen pinili nen Jehova si Josue, mabulbulos a sinuportaan nen Moises iyan mas ugaw nen sikato. Imbaga tod saray totoo ya unoren day pangidaulo nen Josue ed sikara paarap ed Insipan a Dalin. (Numeros 27:15-18; Deuteronomio 31:3-6; 34:7) Seguradon impasen nen Moises a pribilehyo so pangidaulod saray Israelita ed pandayew dad si Jehova. Balet mas importantid sikatoy pankaabigan na arum nen say autoridad to.

ANTO RAY NAARALAN TAYO?

Agtayo labay so magmaliw a mapaatagey lapud pakayari, autoridad, odino saray abilidad tayo. Tandaan: Pian usaren itayo nen Jehova, mas importantin mapaabeba tayo nen say maabilidad tayo. (1 Samuel 15:17) No talagan mapaabeba tayo, pansagpotan tayon unoren iyan simbawa na Biblia: “Manmatalek ka ed Jehova ed simoon a pusom, tan agka onsaral ed tapew na dili a pakatalos mo.”—Uliran 3:5, 6.

Naaralan tayo met ed alimbawa nen Moises ya agtayo nepeg ya ikdan na alablabas ya imano so posisyon odino pribilehyo a niiter ed sikatayo.

Kasin nagunggonaan tayo no aligen tayoy inkamapaabeba nen Moises? Segurado! No ipapatnag tayoy tuan inkamapaabeba, agnairapan iray totoon mideneng ed sikatayo tan mas aroen da itayo. Balet say sankaimportantian ed amin et aroen itayo nen Jehova, ya mangipapanengneng na sayan kualidad. (Salmo 18:35) “Kabusol na Dios iray mapaatagey, balet iiter toy agnaparaan a kaabigan ed saray mapaabeba.” (1 Pedro 5:5) Talagan maabig iyan rason pian aligen tayoy inkamapaabeba nen Moises!