Ipaparungtal nen Jehova so Gloria To ed Saray Mapaabeba
“Say tumang na kauyamoan tan say takot ed Jehova sikato so saray kayamanan, tan dayew, tan bilay.”—ULIRAN 22:4.
1, 2. (a) Panon ya ipapabitar na libro na Gawa a si Esteban so “napno na pananisia tan espiritu santo”? (b) Anto so walan ebidensya a si Esteban et mapaabeba?
SI Esteban so “napno na pananisia tan espiritu santo.” Sikato met so “napno na grasya tan pakayari.” Bilang sakey ed saray inmuunan babangatan nen Jesus, sikato so nanggawa na angkakabaleg iran tanda tan pakelaw ed limog na totoo. Diad sakey ya inkagawa, walaray lalakin sinmuppiat ed sikato, “balet agda naraeg so kakabatan tan espiritu a pisasalita to.” (Gawa 6:5, 8-10) Mapatnag, si Esteban so maseet ya estudyante na Salitay Dios, tan satan so mapuersan indepensa to diad arap na saray Judion relihyoson lider ed panaon to. Say detalyadon impantasi to, a nikurit ed Gawa kapitulo 7, so mamaneknek ed pirmin interes to ed kalkalnan kipaparungtal na gagala na Dios.
2 Si Esteban so mapaabeba, ya aliwan singa saray relihyoson lider a minelmelag da iray kabanyakan a totoo lapud talindeg tan pikakabat da. (Mateo 23:2-7; Juan 7:49) Anggaman kabkabisado to so Kasulatan, nanliketan ton maong so asainmin ton ‘manlingkor ed saray dulang’ odino manangibunog na tagano, ta pian nitalaga na saray apostol so inkasikara dia ed “pikakasi tan dia ed panangipulong na salita.” Si Esteban so walaan na maabig a reputasyon ed limog na saray agagi kanian sikato so apili bilang sakey ed pitoran lalaki a maong so dengel da pian mangasikaso ed satan ya inagew-agew a panangibunog na tagano. Mapaabeba ton inawat itan a kimey.—Gawa 6:1-6.
3. Anton matalonggaring ya inkipatnag na agkanepegan a panangasi na Dios so naeksperiensya nen Esteban?
3 Naimano nen Jehova so mapaabeban awawey nen Esteban tan say maespiritual a panmoria tan integridad to. Sanen pupulongan nen Esteban so agmakaaron ulop na saray lider a Judio diad Sanhedrin, saray onsusumpa ed sikato et “apatnagan da so lupa to a singa lupa na sakey ya anghel.” (Gawa 6:15) Say itsura na lupa to so mipadpara ed sakey ya ibabaki na Dios, a walaan na kareenan a nanlapu ed Dios na gloria, si Jehova. Kayari na makpel ya impantasi to ed saray membro na Sanhedrin, naeksperiensya nen Esteban so matalonggaring ya inkipatnag na agkanepegan a panangasi na Dios. “Sikato balet a napno na espiritu santo, tinmangay a maligen ed tawen, et anengneng to so gloria na Dios, tan si Jesus a manal-alagey ed kawanan na Dios.” (Gawa 7:55) Parad si Esteban, sayan makapasagyat a pasingawey so amekder ed posisyon nen Jesus bilang Anak na Dios tan say Mesias. Satan so amabiskeg ed mapaabeban si Esteban tan kinmana itan a panamaseguro a sikatoy inabobonan nen Jehova.
4. Diad siopa so pangipaparungtalan nen Jehova ed gloria to?
4 Unong ed iyiilustra na pasingawey a nipanengneng ed si Esteban, ipaparungtal nen Jehova so gloria tan gagala to ed saray matakot ed Dios ya indibidual a mapaabeba tan mamapabli ed relasyon da ed sikato. Inkuan na Biblia: “Say tumang na kauyamoan tan say takot ed Jehova sikato so saray kayamanan, tan dayew, tan bilay.” (Uliran 22:4) Importante sirin a natalosan tayo so kabaliksan na tuan kauyamoan odino kapaabebaan, no panon tayon nabayuboan itan ya importantin kalidad, tan no panon itayon nagunggonaan ed pangipatnag ed satan diad amin ya aspekto na bilay.
Kapaabebaan—Sakey a Maridios a Kalidad
5, 6. (a) Anto so kapaabebaan? (b) Panon ya impatnag nen Jehova so kapaabebaan? (c) Panon itayon naapektaan ed kapaabebaan nen Jehova?
5 Nayarin nasurprisa so arum a totoo a si Jehova a Dios, say sankatageyan tan sankamagloriaan ed uniberso, so sankatalonggaringan ya ehemplo na kapaabebaan. Oniay inkuan nen Arin David nipaakar ed si Jehova: “Sika initer mo met ed siak so kinlong na panangilaban mo; tan say limam a kawanan inampatot to ak, tan say inkadunong [“kapaabebaan,” NW] mo pinabaleg to ak.” (Salmo 18:35) Diad impaneskribe to ed si Jehova bilang mapaabeba, inusar nen David so angalaan a salita diad Hebreo a mankabaliksay “iyuko.” Nilikud ed salitan “kapaabebaan,” say arum a salita a misiglaotan ed satan ya angalaan a salita so mangilaktip ed “kaabebaan,” “inkauyamo,” tan “pampaabeba.” Kanian impatnag nen Jehova so kapaabebaan sanen inyabeba to so inkasikato pian pidenengan so ag-ayadyarin too a si David tan sikatoy inusar to bilang ari a mangilalaman ed Sikato. Unong ed ipapabitar na superscription na Salmo 18, sinalimbengan tan tinulongan nen Jehova si David, ya inliktar to “ed saray lima na saray kabusol to, tan ed lima nen Saul.” Ontan met, amta nen David ya antokaman ya inkatalonggaring odino gloria a nayarin agegemtan to bilang ari so makasengeg ed mapaabeban inkiwas nen Jehova ed biang to. Satan so tinmulong ed si David a mansiansian mapaabeba.
6 Komusta itayo balet? Denesidi nen Jehova ya ibangat ed sikatayo so katuaan, tan nayarin iikdan to itayo na nikaduma iran pribilehyo na serbisyo diad panamegley na organisasyon to, odino nayarin uusaren to itayo ed arum a paraan pian sumpalen so linawa to. Anto so liknaan tayo ed saya? Agta nepeg itayon magmaliw a mapaabeba? Agta nepeg itayon misalsalamat ed kapaabebaan nen Jehova tan paliisan so pampaatagey, a maseguron mangitonton ed desyang?—Uliran 16:18; 29:23.
7, 8. (a) Panon a nipatnag so kapaabebaan nen Jehova diad impideneng to ed si Manases? (b) Diad anton paraan ya impatnag nen Jehova, ontan met ed si Manases, so alimbawa ed sikatayo a tumboken sano ipapatnag tayo met so kapaabebaan?
7 Aglambengat impatnag nen Jehova so matalonggaring a kapaabebaan diad impideneng to ed saray ag-ayadyarin totoo noagta impatnag to met so inkamabulos a manginatnat na panangasi ed saramay mapaabeba ed kanonotan, ya agwaten, odino intandoro, to ni ingen iramay mapaabeba. (Salmo 113:4-7) Alimbawa, ikonsidera pa so kipapasen nen Arin Manases na Juda. Aliwa so impangusaran to ed magalang a posisyon to bilang ari lapud inyalibansa to so palson panagdayew tan “nanggawa na dakel a kaugsan dia ed pakanengneng nen Jehova, pian sikato so sagyaten to a manpasnok.” (2 Awaran 33:6) Diad kaunoran, dinusa nen Jehova si Manases, ya inabuloyan To so ari na Asirya a mangekal ed si Manases bilang ari. Diad prisoan et “inanap [nen Manases] si Jehova a Dios to, tan nampaabeba na balbaleg ed arap na Dios,” kanian sikato so impawil nen Jehova ed trono ed Jerusalem, tan “naamtaan [nen Manases] a si Jehova sikato so Dios.” (2 Awaran 33:11-13) On, diad kaunoran, say mapaabeban kanonotan nen Manases so amaliket ed si Jehova, kanian impatnag To met so kapaabebaan diad impamerdona tan impangipawil To ed sikato bilang ari.
8 Say inkamabulos nen Jehova a mamerdona tan say magbabawin awawey nen Manases so mangiter ed sikatayo na importante iran leksion nipaakar ed kapaabebaan. Nepeg tayon tandaan lawas a say paraan a pantrato tayo ed saramay nayarin angopendi ed sikatayo tan say awawey ya ipatnag tayo sano mankasalanan itayo so mangapekta ed paraan na pideneng nen Jehova ed sikatayo. No mabulos tayon perdonaen iray impankasalanan na arum tan mapaabeba tayon bidbiren iray kalilingoan tayo, makapanilalo tayo ed panangasi nen Jehova.—Mateo 5:23, 24; 6:12.
Niparungtal so Gloria na Dios ed Saray Mapaabeba
9. Kasin say kapaabebaan et tanda na kaleteyan? Ipaliwawa.
9 Balet, say kapaabebaan tan saray misiglaotan a kalidad so agnepeg a nabaloan a tanda na kaleteyan odino tendensian mangonsenti ed makapuy. Unong a pepekderan na Masanton Kasulatan, si Jehova so mapaabeba, ingen ta ipapatnag to so matunong a sanok tan makapakelaw a pakapanyari sano kinaukolan na kipapasen. Lapud kapaabebaan to, paborablin iimanoen odino nikaduman ikokonsidera, nen Jehova iramay mapaabeba ed kanonotan, bangta iyaarawi to so inkasikato ed saramay mapaatagey. (Salmo 138:6) Panon ya impatnag nen Jehova so nikaduman konsiderasyon ed saray mapaabeban lingkor to?
10. Anto so ipaparungtal nen Jehova ed saray mapaabeba, unong ya impatnag na 1 Corinto 2:6-10?
10 Diad dugan panaon to tan diad panamegley na pinili ton paralanan na pitatalosan, imparungtal nen Jehova ed saray mapaabeba iray detalye nipaakar ed pakasumpal na gagala to. Sarayan maglorian bengatla so niyamot ed saramay mapaatagey a manmamatalek, odino anawet-tenten a manutumbok, ed kakabatan tan panag-isip na too. (1 Corinto 2:6-10) Balet saray mapaabeba, a naikdan na suston pakatalos ed gagala nen Jehova, so napapakiwas a lalon mangidalangirang ed si Jehova lapud papablien da so makapadinayew a gloria to.
11. Nen inmunan siglo, panon ya impatnag na arum so kakulangan na kapaabebaan, tan panon itan ya apaneknekan a makaderal ed sikara?
11 Nen inmunan siglo, dakel a totoo, kalaktip la iramay mankuan a Kristiano, so ag-angipatnag na kapaabebaan tan agapol ira ed imparungtal ed sikara nen apostol Pablo nipaakar ed gagala na Dios. Si Pablo so nagmaliw ya ‘apostol na saray Gentil,’ balet aliwan lapud nasyonalidad, edukasyon, edad, odino abayag lan rekord na maabig iran ginawa to. (Roma 11:13) Mabetbet et minoria iratan na saray agmaespiritual a totoo bilang saray pangibabasiyan nen Jehova ed no siopa so nepeg ton usaren. (1 Corinto 1:26-29; 3:1; Colosas 2:18) Balet, si Pablo so pinili nen Jehova, a mitunosan ed maaron-kaabigan tan matunong a gagala to. (1 Corinto 15:8-10) Saramay deneskribe nen Pablo bilang “manunaan ya apostoles,” ontan met ed arum niran onsusumpa, so ag-angawat ed si Pablo tan ed impankatunongan to manlapud Kasulatan. Say kakulangan da na kapaabebaan so angamper ed sikara a makagamor na pikakabat tan pakatalos ed maglorian paraan a panusumpal nen Jehova ed gagala to. Agtayon balot komon leleglemewen odino huhusgaan iramay pinili nen Jehova ya usaren pian sumpalen so linawa to.—2 Corinto 11:4-6.
12. Panon ya impatnag na alimbawa nen Moises a bebendisyonan nen Jehova iramay mapaabeba?
12 Diad biek a dapag, walay dakel ya alimbawa ed Biblia a mangipapabitar ed no panon ya apribilehyoan iray mapaabeban totoo a napasimaran da so gloria na Dios. Si Moises a “mauyamon tuloy” ed amin a totoo, so akanengneng ed gloria na Dios tan nanggayagaan to so maapit a relasyon ed sikato. (Numeros 12:3) Sayan mapaabeban too, a nagmaliw ya ordinaryon managpastol ed loob na 40 taon, ya angusar ed dakel ed saratan a taon ed Peninsula na Arabia, so benendisyonan na Manamalsa diad dakel a paraan. (Exodo 6:12, 30) Diad tulong nen Jehova, si Moises so nagmaliw a pinagkasangiyan tan manunan manangorganisa ed nasyon na Israel. Sikato so awalaan na lukas a pitatalosan ed Dios. Diad panamegley na pasingawey, anengneng to so “ereng nen Jehova.” (Numeros 12:7, 8; Exodo 24:10, 11) Saramay amidbir ed sayan mapaabeban lingkor tan manangilaman ed Dios so abendisyonan met. Mipadpara, nabendisyonan itayo no bidbiren tan tuloken tayo so propeta a babaleg nen say si Moises, salanti, si Jesus, ontan met ed “matoor tan makabat ya aripen” a tinuro to.—Mateo 24:45, 46; Gawa 3:22.
13. Panon a niparungtal so gloria nen Jehova ed saray mapaabeban managpastol nen inmunan siglo?
13 Siopara so ‘niliktob na gloria na Katawan’ diad impangiyanunsio na anghel ed maong a balita na kianak na “Manangilaban, a sikato so Kristo a Katawan”? Aliwan saray mapaatagey a relihyoson lider odino dederlengen a totoo noagta saray mapaabeban managpastol a “manaayam ed uma, tan babantayan da a pampupuyatan ed labi so ayayep da.” (Lucas 2:8-11) Sarayan indibidual so agdinerleng lapud kualipikasyon da tan dunong da. Ingen, sikara so inimano nen Jehova tan pinili ton pakabatan ya unona nipaakar ed kianak na Mesias. On, imparungtal nen Jehova so gloria to ed saray mapaabeba tan matakot ed Dios.
14. Antoran bendisyon na Dios so nipagamor ed saramay mapaabeba?
14 Anto so ibabangat ed sikatayo na sarayan alimbawa? Ipapatnag na saratan ed sikatayo ya aabobonan nen Jehova iray mapaabeba tan ipaparungtal to ed sikara so pikakabat tan pakatalos ed gagala to. Pipilien to iray indibidual a nayarin agmakakapet ed saray estandarte na too tan uusaren to ira pian ipaamta ed arum so maglorian gagala to. Saya so nepeg a mamakiwas ed sikatayon mantultuloy a manilalo ed panangidirehi nen Jehova, say mapropetikon Salita to, tan say organisasyon to. Makapanseguro itayo a pakabatan nen Jehova iray mapaabeban lingkor to nipaakar ed kiparungtal na maglorian gagala to. Oniay inyabawag nen propeta Amos: “Anggapo naani gawaen nen Katawan a Jehova, ya agnaani nipuyan so inamot to ed saray aripen to a propeta.”—Amos 3:7.
Bayuboan so Kapaabebaan tan Panggayagaan so Panangabobon na Dios
15. Akin a nepeg tayon panggunaetan a pansiansiaen so kapaabebaan, tan panon itan a nipabitar diad kipapasen nen Arin Saul na Israel?
15 Pian nagamoran so magnayon a panangabobon na Dios, nepeg itayon mansiansian mapaabeba. Say pagmaliw a mapaabeba so agmankabaliksan a lawas lan mapaabeba. Nayarin naandi ed sakey a too so kapaabebaan to tan magmaliw a makinon tan mapaatagey, a manresulta ed panagpalakbat tan desyang. Ontan so nagmaliwan nen Saul, say primeron nilanaan ya ari na Israel. Sanen sikatoy primeron apili, nilikna ton sikatoy ‘melag ed dili a pakanengneng to.’ (1 Samuel 15:17) Balet, kayari lambengat na duay taon a panuuley to, sikato so kinmiwas lan mapalakbat. Agto inngalngalep so uksoyan nen Jehova diad panangiyapay ed saray bagat panamegley nen propeta Samuel, tan sikato so nankatunongan sanen ginawa to itan. (1 Samuel 13:1, 8-14) Saya so gapoan la na nantutumbokan ya ebento a maseguron angiparungtal ed kakulangan toy kapaabebaan. Say resulta et naandi ed sikato so espiritu tan panangabobon na Dios, ya angitonton ed saginonor diad makapabaing ya impatey to. (1 Samuel 15:3-19, 26; 28:6; 31:4) Malinew so leksion: Nepeg tayon panggunaetan a pansiansiaen so kapaabebaan tan panagpasakop tayo tan iwaklit tayo so liknaan a paimportante, ta pian napaliisan tayo so antokaman a mapalakbat iran gawa a manresulta ed agpanangabobon nen Jehova.
16. Panon a makatulong ed sikatayo so pannonot ed relasyon tayo ed si Jehova tan ed kapara tayon too pian nabayuboan so kapaabebaan?
16 Anggaman say kapaabebaan et agkabiangan ed bunga na espiritu na Dios, sakey itan a maridios a kalidad a nepeg tayon bayuboan. (Galacia 5:22, 23; Colosas 3:10, 12) Lapud lalanoren na satan so kipapasen na kanonotan, salanti, no panon tayon moriaen so inkasikatayo tan say arum—say pamayubo ed kapaabebaan so mankaukolan na impasyan pansagpot. Say seryoson pannonot tan pandalepdep ed relasyon tayo ed si Jehova tan ed kapara tayon too so makatulong pian mansiansia itayon mapaabeba. Diad imaton na Dios, amin ya ag-ayadyarin totoo et singa birdin dika ya ontubo, insan namagaan tan nalenes. Saray totoo et singa duroduron ed uma. (Isaias 40:6, 7, 22) Kasin walay rason na sakey a bulong pian manlastog lapud mas andukey itan nen say arum a bulong? Kasin walay rason na sakey a duron pian manlastog lapud sarag toy onlukso na mas aragdawi nen saray arum nin duron? Makulangkulang so panisip na ontan. Sirin, oniay impanonot nen apostol Pablo ed saray kapara ton Kristiano: “Siopa so manggawa ed sika ta pian miduma ka ed arum? Tan anto so wala ed sika ya agmo naawat? Et no inawat mo akin et manpaspasirayew ka a singa agmo naawat?” (1 Corinto 4:7) Say pandalepdep ed saray teksto na Biblia a singa saraya so ontulong ed sikatayo pian nabayuboan tan nipatnag tayo so kapaabebaan.
17. Anto so akatulong ed si propetan Daniel pian nabayuboan to so kapaabebaan, tan anto so ontulong ed sikatayo pian nabayuboan met itan?
17 Niyabawag so Hebreon propeta a si Daniel bilang “sakey a too ya inad-aro a maong” diad imaton na Dios lapud “impaabeba” to so inkasikato, salanti, lapud kapaabebaan to. (Daniel 10:11, 12) Anto so akatulong ed si Daniel pian nabayuboan so kapaabebaan? Unona ed amin, impatnag to so agnagiing a panagmatalek ed si Jehova, a maparanay ya ontutupleg ed sikato diad pikakasi. (Daniel 6:10, 11) Niarum ni, si Daniel so maseet tan walaan na dugan motibo ed impanaral to na Salitay Dios, ya akatulong itan ed sikato pian lawas ton niyapasakey so imano to ed maglorian gagala na Dios. Sikato so mabulos met ya amidbir ed dilin kalilingoan to, ya aliwa labat ed kalilingoan na totoo to. Tan sikato so peteg ya interesado ed panangiyalibansa ed inkatunong na Dios, aliwa ed dili to. (Daniel 9:2, 5, 7) Kasin makaaral itayo ed alay abig ya alimbawa nen Daniel tan manggugunaet itayon bayuboan tan ipatnag so kapaabebaan ed amin ya aspekto na bilay tayo?
18. Anton gloria so manatalaran ed saramay mangipapatnag na kapaabebaan natan?
18 “Say tumang na kauyamoan tan say takot ed Jehova sikato so saray kayamanan, tan dayew, tan bilay,” so inkuan na Uliran 22:4. On, aabobonan nen Jehova iramay mapaabeba, tan manreresulta itan ed gloria tan bilay. Sanen intalirak to lawari so panaglingkor to ed Dios insan inuman nen Jehova ed saginonor so panag-isip to, oniay mapaabeban inawat nen salmistan Asap: “Sika ibasbas mo ak a pati pamilin mo, tan naani awaten mo ak ed gloria.” (Salmo 73:24) Komusta met natan? Anton gloria so manatalaran ed saramay mangipapatnag na kapaabebaan? Niarum ni, diad panggayaga ed naabobonan tan maliket a relasyon ed si Jehova, makapanilalo ira ed pakanengneng ed kasumpalan na saray apuyanan a salita nen Arin David: “Saray mauyamo tawiren da naani dalin: tan manliket ira a dili ed inkadaakan na kareenan.” Talagan magloria itan ya arapen!—Salmo 37:11.
Kasin Natandaan Yo?
• Panon a si Esteban et ehemplo na sakey a mapaabeban too ya angiparungtalan nen Jehova ed gloria To?
• Diad antoran dalan ya impatnag nen Jehova a Dios so kapaabebaan?
• Antoran alimbawa so mangipatnag ya ipaparungtal nen Jehova so gloria to ed saray mapaabeba?
• Panon a makatulong ed sikatayo so alimbawa nen Daniel pian nabayuboan tayo so kapaabebaan?
[Kahon ed pahina 12]
Mapekder Ingen ta Mapaabeba
Diad kombension na saray Estudyante na Biblia (a kabat la natan bilang saray Tasi nen Jehova) nen 1919 diad Cedar Point, Ohio, E.U.A., say 50-años a si J. F. Rutherford, a mangaasikaso nensaman ed kimey, so maliket a namboluntaryo bilang managlibit na saray bagahe tan managpatnubang ed saray kombensionista diad saray kuarto ra. Diad unor ya agew na kombension, pinabiskeg to so 7,000 a dumerengel ed oniaran salita: “Sikayoray embahador na Ari na saray arari tan Katawan na saray katawan, a mangiyaabawag ed totoo . . . na maglorian panarian na Katawan tayo.” Anggaman si Brother Rutherford et walaan na mabiskeg iran kombiksion, a kabkabat ed mapuersan panagsalita to tan agmikompromiso ed papanisiaan ton katuaan, sikato met so peteg a mapaabeba ed arap na Dios, a mabetbet ton ipapatnag itan diad saray pikakasi to ed morning worship diad Bethel.
[Litrato ed pahina 9]
Si Esteban, a mikabisadon tuloy ed Kasulatan, so mapaabeban angibunog na tagano
[Litrato ed pahina 10]
Say mapaabeban kanonotan nen Manases so amaliket ed si Jehova
[Litrato ed pahina 12]
Anto so nanggawa ed si Daniel a “too ya inad-aron maong”?