Saray Alimbawa na Inkamapaabeba a Nepeg ya Aligen
“Say inkadunong mo [inkamapaabebam, NW] pinabaleg toak.”—SALMO 18:35.
1. Anton ebidensya na inkamapaabeba so nanengneng ed sakey a datin presidente na Watch Tower Society?
SI Joseph F. Rutherford so walaan na makasagyat a talindeg, masulok ya anemiran piye so tagey to tan manbelat na masulok a 90 a kilo. Makbaw met so boses to, a satan so uusaren to aliwa lambengat pian ipakabat so ngaran nen Jehova a diad saman et anggapo ni so kapara noagta pian iwalwal so panamalikdo na saray relihyoson pangulo na Kakristianoan, a tinawag so relihyon da a “sakey a patit tan panamalikdo.” Balet anggaman mabiskeg iray paliwawa to, sano sikatoy manpipikasi a kaibay pamilya na Bethel hedkuarter, sikato so singa sakey a melag ya ugaw a mitotongtong ed ama to, diad ontan et mamapaneknek ed namparan maapit a pisiglaotan to ed Manamalsa to tan say inkamapaabeba to. On, sikato so mapaabeba a singa ed sakey a melag ya ugaw.—Mateo 18:3, 4.
2. Diad anton partikular a paraan a duman tuloy iray aripen nen Jehova ed saray totoo na mundo?
2 Agpanduaruwaan, amin a tuan ariripen nen Jehova a Dios so mapaabeba. Nipaakar ed saya, sikaray duman tuloy ed totoo’y mundo Natan, a nagkalalo nen kapiganman a napno na makinon a totoo. Saray atagey ed ranggo tan makapanyarin totoo, saray mayaman tan walaay aral, tan anggan dakel ed duruka tan saramay kaskasian et mapaatagey ed arum a paraan.
3. Anto so nibaga nipaakar ed saray bunga na atagey-a-linawa?
3 Say atagey-a-linawa so sengegan na dakel a tuloy a kolkolan tan kairapan. On, amin a panirap ed talba so ginmapo lapud walay sakey ya anghel a nagmaliw a mapaatagey, a say labay to et nadayew ed paraan a kanepegan lambengat na Manamalsa, si Jehova a Dios. (Mateo 4:9, 10) Sakey ni, satan a sakey a ginawa to so inkasikato a Diablo tan Satanas, so tinmalonan anangguyor ed inmunan bii, si Eva, diad impanagyat ed atagey-a-linawa to. Insipan to a no sikato so mangan ed isesebel a bunga et sikato so magmaliw a singa say Dios a mismo, ya amta to so maong tan mauges. No sikatoy nagmaliw komon a mapaabeba, nayarin ikuanto, ‘Akin a kaliktanen ko so magmaliw a singa say Dios?’ (Genesis 3:4, 5) Sano kunsideraen tayo so pakaskasin kipapasen na katooan, diad pisikal, mental, tan moral, agaylan anggapoy nibaraan na totoo no nipaakar ed atagey-a-linawa! Agpankelawan a nabasa tayo a kagula nen Jehova so “pangta tan karangalan”! (Uliran 8:13) Mapatpatnag so pandumaan na amin a mapaatagey ed saray alimbawa na inkamapaabeba a naromog ed Salita’y Dios, say Biblia.
Si Jehova a Dios So Mapaabeba
4. Antoran kasulatan so mangipapanengneng a si Jehova so mapaabeba?
4 Si Jehova a Dios—say Sankatagyan, say Soberano ed Sankatalbaan, say Ari ed andi-angaan—so mapaabeba. (Genesis 14:22) Kasin posiblin ontan? Peteg ya ontan! Inkuan nen Arin David, unong a nirekord ed Salmo 18:35: “Sika initer mo met ed siak so kinlong na panangilaban mo; tan say limam a kawanan inampatot toak, tan say inkadunong mo pinabaleg toak.” Malinew, say inkamapaabeba nen Jehova so kinomendaan nen Arin David ed impagmaliw to a baleg. Kayari to, nabasa tayo ed Salmo 113:6 a si Jehova so “mampaabeba ya onnengneng ed saray bengabengatla ed tawen, tan dia ed dalin.” Nabasa tayo ed arum a patalos, “ontutuek pian onnengneng,” (New International Version) “onuusdong a tuloy pian mangimano.”—The New English Bible.
5. Antoran agawgawa so mamapaneknek a si Jehova so mapaabeba?
5 Si Jehova a Dios so talagan mapaabeba diad paraan na pidedeneng to’d Abraham, ya inabuloyan to’y Abraham a mantepet nipaakar ed inkatunong To diad getma ton paneral ed marelmeng a syudad na Sodoma tan Gomorra.a (Genesis 18:23-32) Tan sanen imbalikas nen Jehova so kanonotan ton paneral ed nasyon na Israel—aminsan lapud panagtalintao, sananey nin pankanawnawa nisesengeg ed rebelyon—diad kada pankanawnawa et akikatunongan si Moises ed si Jehova a kuanmono sikatoy mitotongtong ed sakey a too lambengat. Kinmiwas a paborabli si Jehova ed amin a panaon. Angipanengneng itan na inkamapaabeba para’d Sikato ya ipagamor iray kerekerew nen Moises nipaakar ed baley Ton Israel. (Exodo 32:9-14; Numeros 14:11-20) Arum niran alimbawa na mapaabeban pidedeneng nen Jehova ed totoo dependi ed kada too, a singa panangibaga, et nanengneng ed siglaotan to ed si Gideon tan ed si Jonas a nirekord ed Uko-ukom 6:36-40 tan Jonas 4:9-11.
6. Anton personalidad nen Jehova so mangipapanengneng ni ed inkamapaabeba to?
6 Diad tua, ag-onkulang ed siameran danay, a si Jehova so nikuan a “mapalna ya onsanok.”b Say pagmaliw ya andukey-ed-panagtepel, mapalnan onsanok nen Jehova ed pidedeneng ed ag-ayadyarin totoon pinalsa ed amin a milenyo so sananey nin prueba ed pagmaliw ton mapaabeba. Saray mapaatagey a totoo so agmakaanos, magmainomay ya onsanok, andian a tuloy na andukey-a-panagtepel. Talagan anggapoy katunongan na panagpaatagey na ag-ayadyarin totoo no ipareng ed inkamapaabeba nen Jehova! Labud nibaga ed sikatayo ya ‘aligen so Dios, a singa anak ton inararo,’ sikatayoy nepeg a magmaliw a mapaabeba a singa sikato.—Efeso 5:1.
Say Alimbawa nen Kristo ed Inkamapaabeba
7, 8. Anto so ibabaga na Kasulatan nipaakar ed inkamapaabeba nen Jesu-Kristo?
7 Say komaduan mapatpatnag ya alimbawa na inkamapaabeban kaukolan ya aligen tayo et say sasalambiten na 1 Pedro 2:21: “Ta saya so inkatawag yo, ta si Cristo nairapan met lapu ed sikayo, dia ed impangitilak to na panoliranan, pian tomboken yo so baka’to.” Sakbay ni insabi to dia ed dalin bilang sakey a too, nipropesiya so nipaakar ed sikato diad Zacarias 9:9: “Oneyag ka, O bii ya anak na Jerusalem; nia, say arim onsabi ed sika; sikato so maptek, tan walaan na panangilaban; maoyamo, tan onkabayo ed sakey ya asna a kabatyan.” No si Jesu-Kristo so nagmaliw a mapaatagey, inawat to komon so opresi na Diablo ya iter ya amin so panarian ed mundo kasalat na sakey a kiwas na panagdayew ed sikato. (Mateo 4:9, 10) Impanengneng to met so inkamapaabeba to diad impangiter ed si Jehova na amin a panamagalang nisesengeg ed bangat to, ya angikuan: “Sano inpaalage’yo la so Anak na too, saman la nakabatan yo a siak iman, tan angapo so gawaen ko ed inkasiak, noag onong na inbangat na Ama ed siak, salitaen ko so saraya’n bengatla.”—Juan 8:28.
8 Manepenepeg met so pangibaga to ed saray dumerengel to: “Ala yo’y pakok ed sikayo, tan manaral kayo’d siak; ta maoyamo ak tan mapaabeba ak a puso; et naromog yo’y inawa nipaakad ed saray kamarerwa yo.” (Mateo 11:29) Tan agaylan maabig ya alimbawa na inkamapaabeba so impanengneng to diad impanguras to ed sali na apostoles to diad kaunoran a labin sikatoy kaulop da bilang sakey a too! (Juan 13:3-15) Matukotukoy, diad Filipos 2:3-8, si apostol Pablo so manisimbawa ed saray Kristiano a nawalaan na “kaabebaan na kalakal,” a sinaglawi si Jesu-Kristo bilang sakey ya alimbawa: “Yatol yo so sayan kalakal ed sikayo, ya wala met nensaman ed Cristo Jesus; a bangta sikato’y wala ed ereng na Dios, ag to inbilang a say inkaparpara to ed Dios sakey a bengatla’n bebenbenan to nen saman, noag ingen nilokpos to so inkasikato, ya inala to so ereng na sakey ya aripen, ya agawa’n kaolibay na saray totoo; tan bangta aromog a singa nengneng na sakey a too, nanpaabeba a nagmaliw a matolok ya anga’d say ipapatey, on, say ipapatey ed cruz [panamairapan a kiew, NW].” Sanen nidunget ed sankabalgan ya irap ed bilay to, sipapaabeban nampikasi ed Ama to: “Aliwa’n unong ed kaliktan ko, ingen unong ed kaliktan mo,.” (Mateo 26:39) Maseguro, pian sikatayoy magmaliw ya umaalig nen Jesu-Kristo, ya ontutumbok a maapit ed saray bakat to, sikatayo so nepeg a magmaliw a mapaabeba.
Si Apostol Pablo, Maabig ya Alimbawa na Inkamapaabeba
9-12. Diad antoran paraan ya angipanengneng si apostol Pablo na maabig ya alimbawa na inkamapaabeba?
9 Nansulat si apostol Pablo: “Mialig kayo komon ed siak, singa siak met ed Cristo.” (1 Corinto 11:1) Inalig ta nen apostol Pablo si Jesu-Kristo ed pagmaliw ya abeba ed kalakal, diad ontan et mangiiter ed sikatayo na sananey nin alimbawa na inkamapaabeba a nepeg ya aligen? Maseguron ontan. Manuna, sipapaabeban binidbir to a sikatoy aripen nen Jesu-Kristo. (Filipos 1:1) Imbaga to ed saray mamatatken ed Efeso so nipaakar ed ‘impanlinkor to ed Katawan ed amin a kaabebaan na linawa, tan saray lua, tan saray inkasalsali a sinmabi ed sikato lapu ed kasiliban na saray Judio.’ (Gawa 20:17-19) No sikatoy agnampaabeba, agto nisulat ed kapiganman iray salitan walad Roma 7:18, 19: “Amtak a dia ed siak, salanti, dia ed laman ko, angapo so manayam a bengatlan maong . . . Ta ag ko gawaen so kaabigan a labay ko komon, sabalet so mauges ya ag ko labay, sikato ya so gawaen ko.”
10 Sakey nin mangipapanengneng na inkamapaabeba nen Pablo et say insulat to ed saray Kristiano ed Corinto, a singa nirekord ed 1 Corinto 2:3: “Akiayam ak ed sikayo ed kakapuyan tan takot, tan baleg a giwgiw.” Diad sipapaabeban impanukoy to ed datin kabibilay to sakbay a sikatoy nagmaliw a Kristiano, insulat to: “Angan siak a nen saman maayew-ak, tan manamaseg-segang tan managdumsis ak; . . . si Cristo Jesus so linma dia ed mundo pian ilaban to so saray managkasalanan; a dia ed sikara siak so manonaan.”—1 Timoteo 1:13, 15.
11 Say sakey nin mangipanengneng ed inkamapaabeba to et say pamidbir a si Jehova a Dios so nanlapuan na amin na intalona to ed saray sagpot to. Sikatoy nansulat nipaakar ed ministeryo to: “Siak so angitamen, si Apolos so analog; bangbalet say Dios so amabaleg. No ontan sirin say mantanem tan manalog andi gapo’ra, no ag say Dios a sikato so mamabaleg.” (1 Corinto 3:6, 7) Kinerew to met ed saray agagi to a sikatoy ipikasi pian makapangiter na sakey a maabig a pantasi, unong a nabasa tayo ed Efeso 6:18-20: “Ya onkerew kayo . . . na pikakasi . . . lapud siak, pian niiter komon ed siak so pansalita . . . pian dia ed onia mansalita ak komon [ed sagradon sekreto na maong a balita] a sitetepel, a singa kanepegan kon panagsalita.”
12 Impanengneng met nen Pablo so inkamapaabeba to diad paraan na impitulongan to ed arum ya apostoles: “Si Santiago tan si Cefas tan si Juan, . . . inter da ed siak tan si Bernabe so limara’n kawanan a tanda na panoolop, pian onla kami ed saray Gentiles, tan sikara ed panpagalsim.” (Galacia 2:9) Impanengneng to met so inkamabulos ton mitulongan ed mamatatken ed kongregasyon na Jerusalem diad impangantabay ed apatiran lalaki a linma ed templo tan manbabayar ed saray gastos da legan a sikaray manusumpal ed sakey a sipanan.—Gawa 21:23-26.
13. Anto so nanggawan makatantanda ed inkamapaabeba nen Pablo?
13 Say inkamapaabeba nen Pablo so nagkalalon makatantanda sano imanoen tayo a sikatoy inusar nen Jehova a Dios ed makapanyari iran gawa. Alimbawa, nabasa tayo a “say Dios so nangawa na makapakelaw a tanda ed panamegley na saray lima nen Pablo.” (Gawa 19:11, 12) Nagkalalo nen say satan, sikatoy naikdan na saray mamilagron pasingawey tan puyan. (2 Corinto 12:1-7) Agtayo met lilingwanan a sikato so pinuyanan pian mansulat na 14 ed 27 a libro (aktual et saray sulat) na Kristianon Griegon Kasulatan. Amin na saratan so ag-anagdag ed sikato a magmaliw a mapangta, a singa panangibaga. Sikatoy nantultuloy a nampaabeba.
Saray Modernon-Agew ya Alimbawa
14-16. (a) Panon a sakey a maabig ya alimbawa na inkamapaabeba so inmunan presidente na Watch Tower Society? (b) Say alimbawa to so duman tuloy ed alimbawa na siopa?
14 Diad Hebreos 13:7, nabasa tayo so simbawa nen apostol Pablo: “Nonot yo so saray manuley ed sikayo, a sikara so nansalita ed sikayo na salitay Dios; tan motektek yo no anto so asumpalan na inpanbilay da, alig yo so pananisia’ra.” Diad panumbok ed sayan prinsipyo, nayari tayon laen a sakey a modernon alimbawa so inmunan presidente na Watch Tower Bible and Tract Society, si Charles Taze Russell, a nayari tayon aligen so pananisia to. Sikato ta’y sakey a toon mapaabeba? Peteg ya ontan! A singa naimanon tuloy ed teksto na Studies in the Scriptures to, diad anemiran tomo na 3,000 a pahina, anggan aminsan et agto sinalambit so inkasikato. Saray publikasyon na Watch Tower Bible and Tract Society so manutumbok natan ed onian prinsipyo diad ag-impangipaimano ed totoo ed pakabidbiran ed saray managsulat na artikulo.
15 Diad Watch Tower, aminsan et insulat nen Russel ya anggapoy amta to ed tatawagen a “Russellism” tan “Russellite,” saray terminon inusar na saray sumusumpa to bangbalet andi-duaruwa ton impulisay iya. Insulat to: “Say kimey tayo . . . et say pandagup ed abayag lan ataytayak a pira-pirason katuaan tan itarok ed totoo na Katawan—aliwan bilang balo, aliwan bilang kien min dili, noagta bilang kien na Katawan. . . . Say kimey a mamaliket ed Katawan a mangusar ed samet a talento mi so aliwan tanton sakey a kimey mi noagta sakey a kimey na panangipaalagey lamet, panangiyarunsa, pantutunosan.” Peteg, imbalikas to so liknaan nen apostol Pablo, a walad 1 Corinto 3:5-7.
16 Say awawey to so sigpot a kasuniyan ed awawey nen Charles Darwin. Diad inmunan edisyon to ed The Origin of Species nen 1859, naulit-ulit a sinaglawi nen Darwin so teorya “to,” ya ag-inimano no antoy imbaga na saray akauna ed sikato nipaakar ed ebolusyon. Sakey a kabkabat a managsulat ed saman a siglo, si Samuel Butler, so angataki ed si Darwin, ya indanet ton dakel la so inmunan anibukel ed ideya nipaakar ed ebolusyon; a diad antokaman a paraan et ag-iman nanlapu ed si Darwin.
17. Anto niray arum ya alimbawa na inkamapaabeba nen Brother Rutherford?
17 Say sananey nin matoor ya aripen ed modernon panaon a sigpot ya inusar nen Jehova a Dios et si Joseph F. Rutherford, a sinalambit la ed akauna, sikatoy sakey a makpel a manangiyalibansa na katuaan na Biblia tan nagkalalo ed ngaran nen Jehova. Anggaman nibantog bilang Judge Rutherford, diad puso to et sakey a toon mapaabeba. Alimbawa, aminsan et sikatoy nanggawa na pigaran dogmatikon balikas no anto so nailaloan na saray Kristiano nen 1925. Sanen saray ebento so sinmaew ya anuporta ed saray iilaloan to, sipapaabeban imbaga to ed pamilya ed Brooklyn Bethel a sikato manaya’y kinmulang na maong a panagdesisyon. Sakey ya alanaan a Kristiano ya asingger ed sikato so amaneknek a dakel a danay a nadngel to si Brother Rutherford a kinmerew na dispensa a mitukoyan ed espiritu na Mateo 5:23, 24, namparan diad publiko tan ed pribado, lapud say sakey a kaparan Kristiano so asakitan ed salitan makapasakit na liknaan. Say inkamapaabeba so nakakaukolan para’d sakey a walad posisyon na autoridad ya onkerew na dispensa ed saray sasakupen to. Angipanengneng na sakey a maabig ya alimbawa si Brother Rutherford para’d amin a manangasikaso, balanglan diad loob na kongregasyon, diad panagbaroy a kimey, odino diad sakey ed saray sanga na Sosyedad.
18. Anto so imbalikas na komatlon presidente na Sosyedad a mangipaparungtal ed mapaabeban panagnonot to?
18 Say komatlon presidente na Watch Tower Bible and Tract Society, si Nathan H. Knorr, so angipanengneng met ed satan ya, anggaman sikatoy prominente ed limog na totoo nen Jehova, agto nilikna a sikatoy atagey lapud posisyon to. Anggaman sikatoy mas maong nen saray arum ed abilidad na panangorganisa tan diad mapublikon panagpaliwawa, sikatoy walaan na baleg a respeto ed agawaan na arum. Kanian, aminsan et binisita to so sakey a membro na Departamento na Panagsulat ed opisina to tan inkuanto: “Dia nagagawa so sankaimportantian tan ontan met ed sankairapan a kimey. Kanian manggagawa ak na samet ed saya.” On, sipapaabeban inyaplika to so simbawa a walad Filipos 2:3, a “dia ed kaabebaan na kalakal balang sinansakey ibilang to so arum a magmaong nen say sikato’n dili.” Inapresya to ya anggaman say pagmaliw a presidente na Sosyedad so importanti, saray arum met a kimey so importanti. Say inkamapaabeba ed biang to a manlikna na ontan tan pian ibalikas iman na ontanlan malinew. Sikato so sananey nin maabig ya alimbawan aligen na amin, nagkalautla ed saramay walaan na prominentin posisyon ed panangasikaso.
19, 20. (a) Anton alimbawa na inkamapaabeba so impanengneng na komapat a presidente na Sosyedad? (b) Anton tulong so iter ed sikatayo na ontumbok ya artikulo nipaakar ed pangagamil tayo na inkamapaabeba?
19 Say komapat a presidente na Sosyedad, si Fred W. Franz, so sakey met a maabig ya alimbawa na inkamapaabeba. Bilang bise presidente na Sosyedad ed loob na 32 a taon, sikatoy nansulat na dakel ed saray artikulo para’d saray magasin tan para’d saray programa na kumbension; bangbalet nipaakar ed saya et agto inabuloyan a niyapasakey ed sikato so imano, agton balot nanggunaetan so pangalay imano. Sakey a mipapadparan kadaanan ya alimbawa so nayarin isitas. Sanen tinalo nen Joab iray Amonita ed Rabbah, sinegurado ton si Arin David so makaawat na galang lapud saman ya impanbiktorya.—2 Samuel 12:26-28.
20 On, dakel iray maabig ya alimbawa, nensaman tan natan, a mangiiter ed sikatayo na mabiskeg iran rason ed pagmaliw a mapaabeba. Anggaman ontan, dakel niray rason pian sikatayoy magmaliw a mapaabeba tan saraya pati ed saray katulongan ed pagmaliw tayon mapaabeba so nakunsidera ed ontumbok ya artikulo.
[Saray paimano ed leksab]
a Say “mampaabeba” so mabetbet ya uusaren a walaay kabaliksan a “mankuankuanan ya atatagey.” Balet say manunan kabaliksan na saya—tan say kabaliksan to ed New World Translation—so “diretso,” “onsener ed saray pribilihyo na ranggo.”—Nengnengen so Webster’s Ninth New Collegiate Dictionary.
b Exodo 34:6; Numero 14:18; Nehemias 9:17; Salmo 86:15; 103:8; Joel 2:13; Jonas 4:2; Nahum 1:3.
Kasin Natandaan Mo?
◻ Antoray nagmaliw a bunga na atagey-a-linawa?
◻ Siopa so angipanengneng na sankaabigan ya alimbawa na inkamapaabeba?
◻ Anto so mangipapanengneng no siopa so komaduan sankabalagan ya alimbawa na inkamapaabeba?
◻ Anton maabig ya alimbawa na inkamapaabeba so impanengneng nen apostol Pablo?
◻ Antoran prominentin alimbawa tayo na inkamapaabeba ed modernon-agew?
[Litrato ed pahina 15]
Angipanengneng si Jesus na sakey a maabig a panangipanengneng na inkamapaabeba
[Litrato ed pahina 16]
Inletneg nen Pablo so sakey a maabig ya alimbawa na inkamapaabeba
[Litrato ed pahina 17]
Ag-inala nen Brother Russell so kredito ed saray bengatlan insulat to