Saray Panangiliktar nen Jehova Natan

IBABAGA ed sikatayo na Biblia so onia nipaakar ed si Jehova: “Amayamay so pakapaermenan na matunong, balet si Jehova iliktar to ya ipaway ed saraya ya amin” tan, “amta na Katawan [Jehova, NW] so pangiliktar to ed saray masantos ed katokso.”​—Salmo 34:19; 2 Pedro 2:9.

Panon a tutulongan nen Jehova so baley to sano sikaray walad inkagipit? Aliwan diad panamegley na mamilagron pangibaliktad ed saray natural a puersa odino antokaman a makapakelaw a gawa, a singa iisipen na dakel a totoo a gawaen to, noagta diad panamegley na sananey a puersa ya agtalagan natatalosan na maslak a totoo​—say aro. On, inaro nen Jehova so baley to, tan binayuboan to ed leet da so aro ed balang sinansakey a mabisbiskeg pian sarag ton gawaen ed sikara so singa mamilagro.​—1 Juan 4:10-12, 21.

Arum so nayarin mangikatunongan a diad panaon na biglaan a pankaukolan, say nakakaukolan et tagano, tambal, tan kagawaan​—aliwan say aro. Siempre, saray tagano, tambal, tan kagawaan so makana. Anggaman ontan, si apostol Pablo so mangikakatunongan na onia: “No wala komon . . . ya amin ed siak so pananisia, ta pian napaalis ko komon so saray kapalandeyan, et no angapo’y arok andi kakanaan ko. Tan no ipayabol ko komon ya ami kayarian ko pian napakan ko’ray duruka, tan no iter ko komon so laman ko a paopoolan, et no angapo’y arok komon, angapo so nagungunak.”​—1 Corinto 13:2, 3.

Mabetbet a nababasa tayo so nipaakar ed tagano tan panustini a niganan makatulong balet akatambak lambengat ed saray pier tan nabubulok odino kakanen na saray otot bangta saray totoon mankaukolan so ompapatey lapud sakit tan eras. Odino mas mauges ni, saratan a tulong so nayarin niiyan ed lima na saray maagum tan maagap a totoo a nabebenipisyoan a tuloy ed saman. No ontan, sakey a bengatla so pakawalaan na saray panustini, balet miduma so pakanengneng a saramay walad kairapan so nagunggunaan ed saratan. Baleg so nagawaan na tuan aro tan panagpaga.

Panangaron Tinekepan na Gawa

Nen Setyembre 1992, si Hurricane Iniki so dinmapo ed pulo na Kauai ed Hawaii, a walaay populasyon a 55,000. Kaiba na saya so dagem a walaay peles a 210 a kilometro ed kada oras tan banesbes na dagem ya anggad 260 a kilometro kada oras, ya anigway na 2 totoo tan 98 so asugatan, dineral to so 75 porsiento na saray ayaman, angitilak na 8,000 totoon andian na ayaman, tan akalkulan $1 bilyon so kantidad na aperdi. Kaiba na saray manaayam ed melag a pulo so kulang-kulang ya 800 a Tastasi nen Jehova ed anemiran kongregasyon. Panon so intalona ra?

Sakbay na aktual ya insabi na Iniki, saray mamatatken ed kongregasyon, diad silong na panangidaulo na managbaroy a manangasikaso, so angipakabat la ed amin na saray membro na kongregasyon pian seguroen a sikaray legyas tan maligen, ya akaparaan ed isabi na bagyo. Say ontan a maaron panagpaga so akatulong pian napaliisan so seryoson kasugatan odino ipapatey ed limog na saray Tasi.​—Ipareng so Isaias 32:1, 2.

Anggaman baleg so deral ya agawa ed komunikasyon tan transportasyon, taloran manangilaman na sangan opisina na Watch Tower Bible and Tract Society ed Honolulu so kabiangan na saray inmunan sinmabi diman kayari na bagyo, lapud sikaray inikdan na nikadkaduman permiso na civil defense pian onlugan ed eroplanon mamaarap ed Kauai. Tampol, sikaray akiabet ed saray lokal a Tastasi tan diad kaimbuasan, angorganisa na sakey a miting pian iplano iray kundang ed panulong. Sakey a komiti na pananulong so niletneg pian amtaen iray pankaukolan tan mangala na nakakaukolan a materyales diad panamegley na sangan opisina ed Honolulu. Diad mantultuloy a pankikimey ya anggapoy tunda, sikaray angiwanwan ed panangipatulor na saray panustini ed saray mankaukolan tan diad panaglinis tan panangapiger ed saray aderal ya ayaman.

Saray Tasi ed arum iran pulo so tamtampol a kinmiwas ed pananulong ed agagi ran mankakaukolan. Diad bektan alukasan so airport ed Kauai, 70 a Tasi so nan-eroplano pian ontulong. Saray panustunin mankantidad na $100,000, pati saray generator, kusinilya, lamparaan, tan tagano, so impatulor. Sakey ed saray Kingdom Hall ed pulo so inusar bilang pinagkabodega; balet mapaga iray arum ompan natakew. Lapud saman, pigaran trak na Army so pinmarada ed parking lot na Kingdom Hall tan saray drayber so nantepet no nayari dan iparada diman iray trak da. Lapud saray sundalon impasen diman pian manbantay na saray trak, saray panustini diman so agginalaw na saray matakew.

Saray generator so inawit na saray agagi ed kaabungan, pinaandar ed balang ayaman ed loob na duara odino taloran oras pian natulongan ira ed pangusar na saray freezer. Engrupon agagi so imbaki ed nanduruman ayaman pian linisan tan apigeren iray deral. Sanen sikaray nantrabaho ed ayaman na agin biin masyadon sumpa so masiken to ed apalabas, agaylan inkatikna na liknaan na asawan laki a sikatoy anggapolay agawaan noagta manbantay tan onakis. Sakey a bisita a nanlapud mismon kontinente ya akanengneng ni ed sakey a grupo na saray Tasi a nankimey so ontanlan mandinayew ed kondukta tan organisasyon da a sikaray inasinggeran to tan nantepet no akin a sikaray duman tuloy. Sanen insalaysay na sakey ya agin laki a say rason et say aro ra ed Dios tan ed kapara ran Kristiano, say too so inmebat: “Panon kon nakabatan so Dios?” (Mateo 22:37-40) Insan inyarum to: “Sikayo so peteg ya organisado, seguro wala so sakey ed sikayon manaalagar ed abung ko diad isempet ko’d Florida!”

Ami-amin, saray Tasi nen Jehova so tinmulong ed impanlinis tan impangapiger ed 295 ya ayaman ed Kauai. Diad saraya, 207 so nankaukolan na daiset a panag-apiger, balet saray 54 so aderal a tuloy, tan 19 so sigpot a nagba. Say kimey da et laktipen to so panagdalaw met ed amin a kabkabat a Tasi ed pulo pian naseguro a balang sakey so naasikaso. Sanen saray panustini so nidiliber ed sakey ya agin bii, sakey a kaabay a Budista so akaimano a sikatoy ag-akaawat na anggan sakey a bag na tsa manlapud grupo to. Sakey nin bii, a nilinisan na sakey a grupo na saray Tasi abung to, so nankuan: “Abayag kayo lan ondadalaw ed ayaman ko, tan naisip kon sikayoy maong a kaabay, balet sayan panangipatnag na aro ed kaabay so mangipapanengneng ed siak no anton klase so organisasyon yo. Salamat ed impasyan kimey yo.”

Nilikud ed panangasikaso na amin a materyal a pankaukolan na kapara ran Kristiano, saramay mangidadaulo ed pananulong so walaan met na panagpaga nipaakar ed espiritualidad da. Anggapo ni duaran agew kayari na bagyo, dakel a kongregasyon so nanmiting la. Maples, ankekelag a grupo na saray panagaral na libro so nipawil la. Samploran mamatatken a nanlapud sananey iran pulo so linma diman ed Kauai pian tulongan iray lokal a mamatatken diad idalaw ed kada Tasi ed pulo. Diad tinmumbok a Simba, amin ya anemiran kongregasyon so angikondukta na Panagaral na Panag-Bantayan, sakey a 30-minuton paliwawa na sakey a membro na Komiti ed Pananulong nipaakar ed saray paraan na pananulong, tan sakey a pansaran 30-minuton paliwawa na sakey a membro na Komiti na Sanga a nanlapud Honolulu para’d sayan gagala. Sakey ya akatasi so nanreport na onia: “Amin so aligliwa ed maabig a panangiwanwan ya inter tan akaparaan ed espiritual pian resolbien iray natitilak a problema ra. Dakel so akanangis ed saray wadman a dumerengel legan a nasusumpal so programa, tan maksil so tipak.”

Sakey a Sankamundoan ya Impanaagi

Say ontan ya aro tan panagpaga so sakey a tanda na totoo nen Jehova ed mundo. Sanen say Cyclone Val so dinmapo ed Western Samoa ngalngali sakey taon la so linmabas, baleg met so aderal, balet saray Tasi nen Jehova ed arum iran dalin so tamtampol ya akitulongan ed saray agagi ra diman. Saginonor, sanen angitarok so gobierno na saray pundo para’d amin a relihyon​—pati saray Tasi nen Jehova​—pian apigeren iray sular da, impawil na saray Tasi iray pundo a tekep na sulat a mangibabagan naapiger lan amin so aderal ed sikara, tan say pundo so nausar ed pangapiger na paalagey na gobierno. Sayan ginawa ra so inbalita na sakey a lokal a peryodiko. Diad impakabasa ed saya, inkuan na sakey ya opisyal na gobierno ed sakey a Tasi a medyo ibabaing to so sarilin simbaan to lapud inawat da so kuartan nanlapud gobierno anggaman amin a paalagey da ya aderal et kokobrian met na insurance.

Mipadpara, nen Setyembre 1992, sanen say Ouvèze River ed abalaten na Pransya so anelap tan aneral ed Vaison-la-Romaine tan say 15 akaliber a komunidad, kinmiwas a tampol iray Tasi. Sanlabi, makasengeg ed delap, 40 totoo so atigway, 400 ya ayaman so aderal, aderal iray nilasus ni, tan nilibon pamilya so andian na danum odino koryente. Kaimbuasan, saray Tasi a nanlapud lokal iran kongregasyon so akaunan sinmabi pian tulongan iray biktima na delap. Saramay mankakaukolan na panayaman so maaron tuloy ya inabrasa na saray pamilya na Tasi ed interon rehyon. Nilasus a Tastasi so nanlapu ed arawi tan asingger pian mangiyopresi na tulong. Sakey a komiti na pananulong so inletneg ed kabangibang a syudad na Orange pian mitulongan ed apatiran grupo na saray boluntaryo, ya angekal ed pitek tan nanlinis ed saray abung, nampesak na abunton a kawes a niyanep ed pitek, tan angiparaan na tagano tan danum ya inumen ed amin ya apektadon lugar. Sikaray nanboluntaryo ni ingen a linisan so sakey a lokal ya eskuelaan tan pigaran paalagey na munisipyo. Say anggapoy kesaw iran sagpot da so inapresya na saray agagi ra tan saray totoo ed komunidad.

Diad dakel niran lugar, saray Tasi nen Jehova so anagmak na kairapan manlapud saray desyang, a singa saray delap, bagyo, tan yegyegyeg, a singa nasasagmak tayo met. Diad pakatalos a saraya so pansumpalan na ag-iilaloan odino agnapokpokan iran nagawgawa, agda tetetelen so Dios odino siopaman. (Eclesiastes 9:11) Imbes, sikaray matalek a saray dilin-panagsakripisyon aro na saray kapananisiaan da so mangilegyas ed sikara ed antokaman a mairap a kipapasen ya onsabi ed sikara. Saratan a maaron kiwas so bunga na pananisia a wala ed balang sakey ed sikara. Isasalaysay nen babangatan a Santiago: “No sakey’a agin laki o bii nalakseban tan naandian iray kanen da ed agew-agew. Et sakey ed sikayo inkuan to ed sikara: Onla kayo la ed kareenan, naimengan tan napesel kayo komon; anta ag yo iter ed sikara so bengatla ya antokaman a kaokolan na laman; anto so gunguna ra? Ontan met so pananisia, no angapo so saray gawa to, inatey ed inkasikaton dili.”​—Santiago 2:15-17.

Say Lapuan na Peteg a Salimbeng

Imbes a manilalo ed saray milagro ed pormay madibinon panangiliktar ed antokaman a nengneng, moriaen na saray Tasi nen Jehova a say salimbeng so naromog ed sankamundoan a Kristianon impanaagi. Diad katuaan to et nagawaan na satan ya impanaagi diad panaon na gonigon so singano milagro. Nanonotan daray salita nen Jesus a naromog ed Mateo 17:20: “No wala komo’y pananisia yo a singa say sakey a bokel na mostaza, kuan yo naani ed saya’n palandey, Onalis ka a manlapu dia ya anga ed saman a pasen; et sikara’y onalis; tan angapo naani agnayari ed sikayo.” On, saray pinmalandey iran babeng so onandi sano say tuan Kristianon pananisia, ya atekepan na aro a tinekepan na gawa.

Say baley nen Jehova ed sankamundoan so makakalikna na mananalimbeng a lima na Dios da ed sarayan panaon na ag-inkaligen tan kapeligroan. Nalilikna ra so singa ed alikna na salmista: “Siak ondokol ak naani ed kareenan tan naugip ak; ta sika labat, Jehova, so mamaayam ed siak ed andi kaatapan.” (Salmo 4:8) Tekep na talek, iyaapasakey da so imano ra ed kimey natan: “Saya ya evangelio na panarian nipulong naani ed sankamundoan ya onkanan pamintuaan ed saray amin a naciones; et saman la onsabi angaan.” (Mateo 24:14) Tan tekep na pananeguro et iilaloan da so kapetegan na insipan nen Jehova a sakey a mareen, matunong a balon mundo, a ditan et aglara makasagmak na antokaman a nengneng na saray desyang, ginawa man na too odino natural.​—Miquias 4:4.

[Saray litrato ed pahina 12]

Saray Tasin nanlapu ed arawi tan asingger pian ontulong ed saray biktima na delap